ދެމެހެއްޓެނިވި ތަރައްޤީ ޙާޞިލްކުރުމުގައި ރާއްޖެއަށް ދިމާވެފައިވާ އެންމެބޮޑު ގޮންޖެހުމަކީ މޫސުމަށް އަންނަ ބަދަލުތަކުގެ ސަބަބުން ދިމާވާ މައްސަލަތައްކަމަށް އެންވަޔަރަންމަންޓް މިނިސްޓަރ ވިދާޅުވެއްޖެއެވެ. އެންވަޔަރަންމަންޓް މިނިސްޓަރ ޠާރިޤް އިބްރާހީމް މިހެން ވިދާޅުވީ ދެމެހެއްޓެނިވި ތަރައްޤީގެ ލަނޑުދަނޑިތައް ހާޞިލްކުރާނެ ގޮތްތަކާ ބެހޭގޮތުން ކަމާބެހޭ ފަރާތްތަކާއެކު ޤައުމީ ފެންވަރުގައި ބާއްވަވާ ސެމިނާރ އިފްޠިތާޙްކޮށްދެއްވައި މިއަދު ވާހަކަފުޅު ދައްކަވަމުންނެވެ.
ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލްކުރުމުގައި ރާއްޖޭން ކުރާނެ މަސައްކަތްތައް ބައްޓަންކުރައްވާނެ ގޮތްތައް ކަނޑެޅުއްވުމަށް ބަނޑޮސް އައިލެންޑްގައި ފެއްޓެވި މި ސެމިނާރުގައި ރާއްޖޭގެ ކަމާބެހޭ އިދާރާތަކުން ގިނަ އަދަދެއްގެ މަންދޫބުން ބައިވެރިވެވޑައިގަންނަވާ މި ސެމިނާރުގައި ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލްކުރުމަށް ރާއްޖެއިން މަސައްކަތްތައް ކުރިޔަށްގެންދަވާނެ ގޮތްތަކުގެ އިތުރުން، މިމަސައްކަތްތައް ޢިލްމީގޮތުން ވަޒަންކުރެއްވުން ކުރިޔަށްގެންދަވާ ގޮތް ބެއްލެވުމުގައި ގެންގުޅުއްވާނެ އުސޫލްތަކާ ބެހޭގޮތުންވެސް ފުޅާދާއިރާއެއްގައި މަޝްވަރާކުރައްވާނެއެވެ. ދެމެހެއްޓެނިވި ތަރައްޤީގެ ލަނޑުދަނޑިތަކަކީ ސާސްކަފްގެ ލަނޑުދަނޑިތަކުގެ މުއްދަތު 2015 ވަނަ އަހަރު ހަމަވުމާ ގުޅިން ދެން ޢަމަލުކުރުމަށް ޤައުމުތަކުން ފާސްކުރި 17 ލަނޑުދަނޑިއެކެވެ. މި 17 ލަނޑުދަނޑީގެ އިތުރުން މީގެ ދަށުން 169 އަމާޒަކަށް މަސައްކަތްކުރަންޖެހެއެވެ.
މި ސެމިނާރ އިފްޠިތާޙްކޮށްދެއްވައި ވާހަކަފުޅު ދައްކަވަމުން އެންވަޔަރަންމަންޓް މިނިސްޓަރ ޠާރިޤް އިބްރާހީމް ވިދާޅުވީ މިހާރު ސަރުކާރުން އެކުލަވާލައްވާފައިވާ ޕޮލިސީތަކާއި ސަރުކާރުގެ މެނިފެސްޓޯގައި ހުރި ކަންކަމާ މި ލަނޑުދަނޑިތަކާ ގުޅުވައިގެން 2030 ވަނަ އަހަރު އަންނަންވާއިރަށް މިލަނޑުދަޑިތައް ޙާޞިލްކުރެވޭނެ ގޮތްތަކާބެހޭ ގޮތުން މި ސެމިނާރުގައި މަޝްވަރާ ކުރައްވާނެ ކަމަށެވެ. އަދި މިހުރިހާ ލަނޑުދަނޑިއެއް ޙާޞިލްކުރެއްވުމަށް ސަރުކާރުން މަސައްކަތް ކުރައްވާނެކަމަށް މިނިސްޓަރ ވިދާޅުވިއެވެ.
އދ. ން ރާއްޖެއަށް ކަނޑައަޅާފައި ހުންނަވާ ރެސިޑެންޓް ކޯޑިނޭޓަރ ސެމިނާރ ހުޅުއްމުގެ ރަސްމިއްޔާތުގައި ދެއްކެވި ވާހަކަފުޅުގައި ސާސްކަފްގެ ލަނޑުދަނޑިތައް ޙާޞިލްކުރުމުގައި ރާއްޖެއިން ހޯދާފައިވާ ކުރިއެރުންތަކުގެ މައްޗަށް އަލިއަޅުވާލައްވާފައިވެއެވެ. މިގޮތުން ސާސްކަފްގެ 8 ލަނޑުދަނޑީގެ ތެރެއިން 5 ލަނޑުދަނޑި ރާއްޖެއިން ކާމިޔާބުކޮށްފައިވާކަން ފާހަގަކުރެއްވިއެވެ. ސާސްކަފްގެ ލަނޑުދަޑިތަކުގެ ތެރޭގައި 2030 ވަނަ އަހަރުގެ ނިޔަލަށް ދުނިޔެއިން ފަޤީރުކަން ނައްތާލުމާއި، އިންސާނީ ހަމަހަމަކަން ޤާއިމުކުރުމާއި، މޫސުމީ ބަދަލުތަކުން ރައްކާތެރިވެ ތިބުމަށް ފިޔަވަޅު އެޅުންފަދަ އަމާޒުތައް ހިމެނެއެވެ.