ބަނޑޭރި ކޮށީގައި މަރުވެފައި އޮއްވާ ފެނުނު މީހާގެ ހަށިގަނޑު ޕޯސްޓްމޯޓަމް ހަދަން އިންޑިއާއަށް ފޮނުވައިފި
-
އެއީ އުމުރުން 30 އަހަރުގެ ދިވެހި ފިރިހެނެއް
-
މަރުވެފައި އޮތް މީހާ ފެނުނީ އެއްވެސް ބަޔަކު ދިރިނޫޅޭ އެޕާޓްމަންޓަކުން
ބަނޑޭރި ކޮށީގައި މަރުވެފައި އޮއްވާ ފެނުނު މީހާގެ ހަށިގަނޑު ޕޯސްޓްމޯޓަމް ހަދަން އިންޑިއާއަށް ފޮނުވައިފިއެވެ.
ބަނޑޭރި ކޮށީގެ އެޕާޓްމަންޓެއްގެ ތެރޭގައި މަރުވެފައި އޮތް މީހަކު ފެނުނީ މިދިޔަ ހަފުތާގެ ހޯމަ ދުވަހުއެވެ. އެއީ ގދ.ހޯޑެއްދޫ ވިލިނގިލީގެ އުމުރުން 30 އަހަރުގެ ހައްމާދު ސަޢީދު ކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.
މަރުވެފައިވާ މީހާގެ ހަށިގަނޑު ފުލުހުންނަށް ފެނުނީ، މެއި 13 ވަނަ ދުވަހުގެ ހަވީރުގެ ވަގުތެއްގައި ފުލުހުންނަށް ލިބުނު މައުލޫމާތަކާއި ގުޅިގެން ބަނޑޭރިކޮށީގެ އެޕާޓްމަންޓެއް ބަލައި ފާސްކުރުމުގެ ތެރޭގައެވެ.
އެމީހާ ފެނުނު އެޕާޓްމަންޓަކީ މިވަގުތު އެއްވެސް ބަޔަކު ދިރިނޫޅޭ އަދި ބޭނުން ނުކުރާ އެޕާޓްމަންޓެއް ކަމަށް ޔަޤީން ކުރެވިފައިވާ ކަމަށް ފުލުހުން ވިދާޅުވެއެވެ.
ފުލުހުންގެ ޚިދުމަތުންދަނީ މި މައްސަލަ އިތުރަށް ތަޙުޤީގުކުރަމުންނެވެ.