ނިލަންދެއަތޮޅު ދެކުނުބުރީ ކުޑަހުވަދޫގައި ތަރައްޤީކުރައްވާ އެއަރޕޯޓްގެ ފަސްދޮޅަސް އިންސައްތަ މަސައްކަތް ނިމިއްޖެކަމަށް ކޮންޓެކްޓަރާ ޙަވާލާދެއްވައި ކުޑަހުވަދޫ ކައުންސިލުން ވިދާޅުވެއްޖެއެވެ.
ކުޑަހުވަދޫ އެއަރޕޯޓަކީ އެރަށާއި، އެސަރަޙައްދުގެ ރައްޔިތުންގެ އުންމީދާ ގުޅިފައިވާ މަޝްރޫޢެކެވެ. މިހާރު އެއަރޕޯޓްގައި އަޅަންޖެހޭ ހުރިހާ ޢިމާރާތެއްގެ ނިމިފައިވާއިރު، މިވަގުތު ކުރިއަށްދަނީ ޓާރމިނަލްގެ މަސައްކަތެވެ. އަދި ރަންވޭ ހެއްދެވުމަށް ހަމަޖެހިފައިވާ ސަރަޙައްދުގެ ބިންހިއްކައި މިހާރު ވަނީ ނިންމާލާފައެވެ.
އެއަރޕޯޓް ހެދުމުގެ މަސައްކަތަށް ކުޑަހުވަދޫ ދެކުނު ފަރާތުން ފަސްދޮޅަސް ދޭއް ޕޮއިންޓް އަށެއް އެކެއް ހެކްޓަރުގެ ބިން ހިއްކާފައިވެއެވެ. ކޮންޓްރެކްޓަރ ފައިނޭންސް އުޞޫލުން ކުޑަހުވަދޫ އެއަރޕޯޓް ތަރައްޤީކުރުމުގެ މަސައްކަތް، ޙަވާލުކުރައްވާފައިވަނީ ރިއޮއްލޯ އިންވެސްޓްމެންޓް ޕްރައިވެޓް ލިމިޓެޑާ. ކޮންޓެކްޓަރާ ޙަވާލާދެއްވައި ކުޑަހުވަދޫ ކައުންސިލްގެ ރައީސް މުޙައްމަދު ޒަމީރު ވިދާޅުވީ، މިމަހުގެ ތެރޭގައި ރަންވޭގައި ތާރުއަޅުއްވަން ފަށްޓަވާނެކަމަށެވެ.
ކުޑަހުވަދުއަކީ ދަތުރުފަތުގެ ނިޒާމަށް ފަހި ރަށެކެވެ. ރާއްޖޭގެ ނިސްބަތުން ބޮޑެތި އުޅަނދުފަހަރު މާލެއަށް ޝެޑިއުލް ދަތުރުތައް ކުރާއިރު، ކައިރި ރިސޯޓްތަކުން ސީޕްލޭންގައިވެސް ކުޑަހުވަދޫ ރައްޔިތުން މާލެއަށް ދަތުރުކުރެއެވެ. ނަމަވެސް ސީޕްލޭނަށް އޮންނަ ޑިމާންޑު ބޮޑުވެ، ގިނަފަހަރު އޮންނަނީ ޖާގަނުލިބިފައި ކަމަށް ކައުންސިލްގެ ރައީސް ވިދާޅުވިއެވެ. އެހެންކަމުން ކުޑަހުވަދޫގައި އެއަރޕޯޓް ނިމުމުން އެރަށުގެ ރައްޔިތުންނަށާއި، އެސަރަޙައްދުގެ ރައްޔިތުންނަށް ވަރަށް ބޮޑު ލުއިފަސޭހަކަމެއް ލިބިގެންދާނެކަމަށް ކުޑަހުވަދޫ ކައުންސިލުން ޤަބޫލުކުރައްވައެވެ.
ޒަމީރު ވިދާޅުވީ، ދ.އަތޮޅަކީ ވަރަށް ފުޅާ ދާއިރާއެއްގައި ޓޫރިޒަމް ތަރައްޤީވަމުން އަންނަ އަތޮޅަކަށްވާއިރު، ކުޑަހުވަދޫގައި ލޯކަލް ޓޫރިޒަމް ފުޅާވަމުން އަންކަމަށް. އެހެންކަމުން އެއަރޕޯޓް ތަރައްޤީވުމުން އިޤްތިޞާދީ ގޮތުންނާއި އުމްރާނީ ގޮތުން ރަށަށް ބޮޑު ކުރިއެރުމެއް ލިބޭނެކަމަށް ކައުންސިލްގެ ރައީސް ވިދާޅުވިއެވެ. ކުޑަހުވަދޫގައި ސަރުކާރުން ތަރައްޤީކުރައްވާ އެއަރޕޯޓަކީ ޕްރައިވެޓް ޖެޓް ޖެއްސޭގޮތަށް ޒަމާނީ ފެންވަރަށް ތަރައްޤީކުރައްވާ އެއަރޕޯޓެކެވެ. ކުޑަހުވަދޫގައި ތަރައްޤީކުރައްވާ އެއަރޕޯޓުގައި ކުރިން 1200 މީޓަރުގެ ރަންވޭއެއް އެޅުއްވުމަށް ހަމަޖެހިފައިވީނަމަވެސް ކޮންޓެކްޓަރ ފައިނޭންސް އުޞޫލުން ހެދޭ އެއަރޕޯޓޭއްކަމުން އެކުންފުނިން މިހާރު ނިންމާފައިވަނީ 1800 މީޓަރުގެ ރަންވޭއެއް އެޅުމަށެވެ. މިއީ ރަށާ އިންވެގެން ހިއްކައިގެން ތަރައްޤީކުރެވޭ އެއަރޕޯޓެކެވެ.
ކުޑަހުވަދޫ ދާއިރާގެ މެމްބަރު އަޙްމަދު އާމިރު ވިދާޅުވީ، މި އެއަރޕޯޓަކީ ރީޖަނަލް އެންމެ ރީތި އެއަރޕޯޓަށް ހެދުމަށް މަސައަތްތަކެއް ކުރެވެމުންދާ ކަމަށާއި، ދެން އެންމެ ބޮޑު އުންމީދަކީ އެއަރޕޯޓާ އެކީ ސީޕޯޓް ނުވަތަ ވިޔަފާރި ބަނދަރެއް ތަރައްޤީކުރުންކަމަށެވެ. ކުޑަހުވަދުއަކީ ފުޅާ ދާއިރާއެއްގައި ވިޔަފާރި ހިންގާ ރަށެކެވެ.
ކުޑަހުވަދޫގައި އެއަރޕޯޓެއް ތަރައްޤީވެގެން ދިއުމަކީ ރަށަށް ޒިޔާރަތްކުރާ މީހުން އިތުރުވެ ޢާންމު ފަރުދުންގެ ވިޔަފާރި އިތުރުވެ، ފަތުރުވެރިކަން ފުޅާވާނެ ކަމެއްގެ ގޮތުގައި އެރަށު ޢާންމުން ދެކެއެވެ. މި އެއަރޕޯޓް ތަރައްޤީކުރުމުގެ މަސައްކަތް ރިއޮއްލޯ އިންވެސްޓްމެންޓް ޕްރައިވެޓް ލިމިޓެޑާ ސަރުކާރުން ޙަވާލުކުރެއްވީ ދެހާސް ތޭރަވަނަ އަހަރުގެ ތެރޭގައެވެ.