ޔޫކޭ މަޝްވަރާ، މިއީ އިޤްތިޞާދު ކުރިއެރުވަން ކުރެވުނު ކާމިޔާބު މަސައްކަތެއް: ވަޒީރު ސައީދު

އިނގިރޭވިލާތާއެކު ކުރެވުނު މަޝްވަރާތަކަކީ މިހާތަނަށް ވިޔަފާރި ތަރައްޤީކުރުމާއި އިޤްތިޞާދު ކުރިއެރުވުމަށް އެ ޤައުމާއިއެކު ސަރުކާރަކަށް ކުރެވުނު އެންމެ ކާމިޔާބު މަސައްކަތްކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، އިނގިރޭސިވިލާތުގައި ހުންނަވާ ޕީއެސްއެމް ނިއުސްއަށް ދެއްވި ބަސްދީގަތުމެއްގައެވެ.

ކޮމަންވެލުގެ ވިޔަފާރިއާއި އިންވެސްޓްމަންޓްތަކާބެހޭ ބައްދަލުވުމަކަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު އިނގިރޭސިވިލާތައް ވަޑައިގަތީ މިމަހުގެ މިމަހުގެ 14 ވަނަ ދުވަހުއެވެ.

މި ދަތުރުފުޅުގެ ކާމިޔާބީއާއި ބެހޭގޮތުން މައުލޫމާތުދެއްވަމުން އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވީ، ފައިނޭންޝިއަލް ސެކްޓަރ ތަރައްޤީކުރުމުގައި އަދި ޑިވެލޮޕްމެންޓް ބޭންކް ޤާއިމްކުރުމުގައި އިނގިރޭސިވިލާތުގެ މަޝްވަރާއާއި ހިޔާލު ހޯދުމަކީ ވަރަށް އެދެވިގެންވާކަމެއްކަމަށެވެ. ސަބަބަކީ ދުނިޔޭގެ ފައިނޭންޝިއަލް މާކެޓަށް ބަލާއިރުގައި ލަންޑަންއަކީ މިކަމުގެ އެންމެ ތަޖުރިބާ ހުރި އަދި އެންމެ ފުންނާބު އުސްކޮށް މިކަން ކުރިމީހުންކަމަށެވެ.

މި ދަތުރުފުޅުގައި ވަޒީރު ސައީދު ވަނީ ލަންޑަންގައި ފަންނީ ގޮތުންނާއި ތަޖުރިބާގެ ގޮތުން އެންމެ ކުރިއަރާފައި ތިބި މާލީ ދާއިރާގެ ބޭފުޅުނާއިއެކު ރައުންޑް ޓޭބަލް ޑިސްކަޝަންއެއް ކުރިއަށްގެންގޮސްފައެވެ. އަދި ވަޒީރު ސަޢީދު ވަނީ އިނގިރޭސިވިލާތުގެ ޓްރޭޑް މިނިސްޓަރާއި، އިންވެސްޓްމަންޓާއި ބެހޭ އެންމެ އިސް މިނިސްޓަރާއިވެސް ބައްދަލުކުރައްވާފައެވެ.

ވަޒީރު މުޙައްމަދު ސައީދު ވިދާޅުވީ، މި މަޝްވަރާތަކަކީ އިނގިރޭސިވިލާތާއިއެކު މިހާތަނަށް ސަރުކާރަކަށް ކުރިއަށްގެންދެވުނު ވިޔަފާރިއާއި ގުޅޭ އެންމެ ކާމިޔާބު އެއް މަޝްވަރާތައްކަމަށެވެ.

"މިހާތަނަށް ރާއްޖެއިން ބައިވެރިވި އެންމެ ކާމިޔާބު ވިޔަފާރި ތަރައްޤީކުރުމާއި އިޤްތިޞާދު ކުރިއެރުވުމަށް އެއްވެސް ސަރުކާރަކުން ހިންގި އެންމެ ފުޅާދާއިރާއެއްގައި ގެންދެނު މަސައްކަތޭ އަޅުގަނޑު ދަންނަވާނީ ޔޫކޭއާއި އެއްކޮށް. ހަމައެއާއިއެކުގައި މިނިވަން ވިޔަފާރީގެ އެއްބަސްވުމެއް ޔޫކޭ ސަރުކާރާއިއެކު ކުރިއަށްގެންދިއުމަށްޓަކައި މީގެކުރިން ކުރެވެމުން އައި މަސައްކަތެއް. އެ މަސައްކަތް އަޅުގަނޑުމެންގެ ރައީސްއަށް ފެނިވަޑައިގަތީ އެއަށްވުރެ މާ ފުޅާދާއިރާއެއްގައި އެދިވަޑައިގަތުމަށް ޕްރީ ޓްރޭޑް އެގްރީމަންޓް އިތުރަށް ފުޅާކޮށް އަދި އޭގެ ފުރިހަމަ ނަފާ ރާއްޖެއަށް ލިބޭނެކަހަލަ ގޮތަކަށް ކުރިއަށްގެންދަން" ވަޒީރު ވިދާޅުވިއެވެ.

މި ދަތުރުފުޅުގެ ތެއިން މިނިވަން ވިޔަފާރީގެ އެއްބަސްވުމާއި ބެހޭގޮތުންވެސް ވަނީ މަޝްވަރާތައް ބާއްވާފައެވެ. ވަޒީރު ވިދާޅުވީ، މަސްވެރިކަމުގެ ދާއިރާގައި މަސައްކަތް ކުރައްވާ ހުރިހައި ފަރާތްތަކަށް ފަސޭހަކަމާއިއެކު ރާއްޖެއިން މަސް އެކްސްޕޯޓް ކުރެވޭނެ ގޮތްތައް އަދި ކުރާއިރުގައި ނަގަން ނުޖެހޭނެކަމަށް ގަބޫލުކުރާ އެތައް ފީއަކާއި، އަދި މަސްވެރިންނަށާއި މަސް އެކްސްޕޯޓްކުރާ ފަރާތްތަކަށް ލިބެންޖެހޭ އެންމެ ފުރިހަމަ ހައްޤުތައް ލިބޭނެކަހަލަ އިންތިޒާމެއް ހަމަޖެހޭނެގޮތަކަށް ފްރީ ޓްރޭޑް އެގްރިމަންޓްވެސް ކުރިއަށްގެންދިއުމަށް މި ދަތުރުގެ ތެރެއިން މަޝްވަރާކޮށްފައިވާނެކަމަށެވެ.