ޕަބްލިކް ސަރވިސް މީޑިއާ، ޕީއެސްއެމްގެ ފަރާތުން ބޭއްވި އިންޓަރނޭޝަނަލް ފްރެންޗައިޒް ޝޯވް، މޯލްޑިވިއަން އައިޑަލްގެ ފުރަތަމަ ސީޒަންގެ ޓޮޕް ޓެންގައި ހިމެނުނު ކޮންމެ ބައިވެރިޔަކާއި ޕީއެސްއެމްއާ ދެމެދު ވަނީ ޓެލެންޓް މެނޭޖްކރުމުގެ އެއްބަސްވުމެއްގައި ސޮއިކޮށްފައެވެ. އަދި މި އެއްބަސްވުމަށް ޕީއެސްއެމް އިޙްތިރާމްކުރާ ފަދައިން ޓޮޕްޓެންގެ ހުރިހާ ބައިވެރިންވެސް އިޙްތިރާމްކުރާނެ ކަމާމެދު މި ކުންފުނި ޝައްކެއް ނުކުރަމެވެ.
މޯލްޑިވިއަން އައިޑަލްގެ ޓޮޕްޓެންގެ ހުރިހާ ބައިވެރިންގެ ޓެލެންޓް މެނޭޖްކުރުމުގެ އެގްރިމަންޓެއް، އެ ކޮންޓެސްޓަންޓުންނާއެކު ޕީއެސްއެމުން އެކަށައެޅުމުގެ މައިގަނޑު ބޭނުމަކީ، އެ ބައިވެރިންނަށް މޯލްޑިވިއަން އައިޑަލްގެ ތެރެއިން ދަސްކޮށްދެވުނު ކަންތައްތަކާއި ލިބިދެވުނު ހުނަރު ތަރައްޤީކުރުމަށް މުބާރާތުގެ ފަހުންވެސް އެކަށީގެންވާ މުއްދަތެއްގައި އެހީތެރިވެދިނުމާއި ބައިވެރިންގެ ފަންނީ މަސައްކަތުގެ ފޭރާން ދަށްވިޔަނުދިނުމާއި އަގުހިފެހެއްޓުމަށް އެހީތެރިވެދޭންޖެހޭ ކަމަށް މި ކުންފުންޏަށް ޤަބޫލުކުރެވޭތީ އާއި، ބައިވެރިންވެސް އެކަމަށް ބޭނުންވާތީއެވެ.
މޯލްޑިވިއަން އައިޑަލްގެ ޓޮޕްޓެންގެ ޓެލެންޓް މެނޭޖްކުރުމުގެ ކަންތައްތައް މަތީގައި ދެންނެވި ގޮތަށް، އެގްރިމަންޓެއްގެ ދަށުން ކުރިޔަށް ގެންދިއުމަށް ހަމަޖެހިފައިވުމާއެކު، އެއިން އެއްވެސް ބައިވެރިއެއްގެ ޓެލެންޓް މެނޭޖްކުރުމުގެ އެއްވެސް ދައުރެއް، ޕީއެސްއެމް ނޫން އެއްވެސް ފަރާތަކަށް މި އެގްރިމަންޓްގެ މުއްދަތުގައި ލިބިގެނެއް ނުވެއެވެ. އަދި އެއްވެސް ފަރާތަކުން މި ބައިވެރިންގެ ލަވަޔާއި މިޔުޒިކާއި ޕާރފޯމްކުރުމާ ގުޅުންހުރި އެއްވެސް ޓެލެންޓެއް، އެއްވެސް ޕްލެޓްފޯމެއްގައި، ޕީއެސްއެމްގެ މެދުވެރިކުރައްވައިގެން މެނުވީ ކުރުމުގެ ފުރުޞަތެއް ނޯންނާނެއެވެ. މީގެތެރޭގައި އެކި ތަންތާނގައި މިރޮނގުތަކުން ޕާރފޯމްކުރުމާއި އިޝްތިހާރެއްގައި ބޭނުންކުރުމާއި ރެކޯރޑިންގއެއް ހެދުންފަދަ ކަންކަން ކުރުވުންވެސް ހިމެނެއެވެ.
ވީމާ، މަތީގައި ދެންނެވި އުޞޫލާ ޚިލާފަށް އެއްވެސް ފަރާތަކުން މޯލްޑިވިއަން އައިޑަލްގެ ޓޮޕްޓެންގައި ހިމެނޭ ކޮންޓެސްޓަންޓަކާ ގުޅުންހުރި ކަމެއް ނުކުރެއްވުމަށް ދަންނަވަމެވެ. އަދި އެފަދަ ކަންކަން މި ކުންފުނި މެދުވެރިކޮށް، ކުރެއްވުމަށް ބޭނުންފުޅުވާ ފަރާތްތަކުން، [email protected] އަށް މެއިލް ކުރެއްވުމުން، ކަނޑައެޅޭ އުޞޫލެއްގެ މަތީން އެކަމަށް ދެވެން އޮތް އެއްބާރުލުމެއް އަރުވާނަމެވެ.
އަދި ދަންނަވަމެވެ. މޯލްޑިވިއަން އައިޑަލްއަކީ ގިނަ ފަރާތްތަކެއްގެ އެއްބާރުލެއްވުމާއި ތާއީދާއެކު ހިންގުނު މުހިންމު ޙަރަކާތެއްކަމަށްވެފައި، މިމުބާރާތުން އެކި ކާމިޔާބީތައް ޙާޞިލްކުރި ފަންނާނުންނަކީ ރާއްޖެއާއި ދުނިޔޭގެ އެތައްސަތޭކަހާސް ބަޔެއްގެ ރުހުމާއި ތަޢުރީފް އޮތް ފަންނާނުންތަކެއް ކަމަށްވާތީ އާއި މޯލްޑިވިއަން އައިޑަލްއަކީ ބައިނަލްއަޤުވާމީ މިންގަނޑުތަކާ އެއްގޮތަށް އެފަދަ ފަރާތްތަކާ ގުޅިގެން ކުރެވިފައިވާ ކަމަކަށްވާތީ، އެއްވެސް ފަރާތަކުން މި ބައިވެރިންނާ ބެހޭގޮތުން ޙަޤީޤަތެއް ނެތް ވާހަކަތައް ނުފެތުރުއްވުމަށް ވެސް ޕީއެސްއެމުން އިލްތިމާސްކުރަމެވެ.