19 ވަނަ މަޖިލިސް: 513 ޖަލްސާއެއް ބާއްވައި 178 ބިލުގެ މަސައްކަތް ނިންމި
-
3784 ކޮމިޓީ ބައްދަލުވުން ބޭއްވި
-
ވަޒީރުންނާ 384 ސުވާލު ކޮށްފައިވޭ
178 ބިލުގެ މަސައްކަތާއެކު 19 މަޖިލިހަކީ މިހާތަނަށް އެންމެ ގިނަ މަސައްކަތް ކުރި މަޖިލިސް ކަމަށް ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ 19 ވަނަ މަޖިލީހުގެ ދައުރުގެ ފަހު ޖަލްސާ ނިންމަވާލައްވަމުން ދެއްކެވި ވާހަކަފުޅުގައެވެ.
އަސްލަމް ވިދާޅުވި ގޮތުގައި 28 މެއި 2019 އިން ފެށިގެން 19 ވަނަ މަޖިލީހުގެ ދައުރު ނިންމާލިއިރު 513 ޖަލްސާ ވަނީ ބާއްވާފައެވެ. އެއީ 1461 ގަޑިއިރު ކަމަށް އެމަނިކުފާނު ވިދާޅުވިއެވެ.
މަޖިލީހުގެ ޖަލްސާގެ އިތުރުން ކޮމިޓީގެ ވެސް ގިނަ މަސައްކަތްތަކެއް ކުރެވިފައިވާ ކަމަށް އެމަނިކުފާނު ވިދާޅުވިއެވެ. އެގޮތުން، 3784 ކޮމިޓީ ބައްދަލުވުން ބާއްވާފައިވާއިރު އެއީ 4434 ގަޑިއިރާއި 23 މިނެޓުގެ މަސައްކަތް ކަމަށް ވިދާޅުވިއެވެ.
19 ވަނަ މަޖިލީހުން 178 ބިލުގެ މަސައްކަތް ނިންމާލާފައިވާއިރު 73 ޤަރާރުގެ މަސައްކަތް ނިންމާލާފައިވާ ކަމަށް މަޖިލީހުގެ ރައީސް ވިދާޅުވިއެވެ. އަދި ސަރުކާރުން ހުށަހެޅުއްވި 152 މައްސަލައަކާއި ރިޔާސަތުން ހުށަހެޅުއްވި 104 މައްސަލަ އާއި 108 ކުއްލި މައްސަލަ އަދި މެންބަރުން ހުށަހެޅުއްވި 48 މައްސަލައިގެ މަސައްކަތް ނިންމާފައިވާ ކަމަށް ވެސް އެމަނިކުފާނު ވިދާޅުވިއެވެ.
މީގެ އިތުރުން އެކި މައްސަލަތަކާއި ގުޅޭ 153 ރިޕޯޓުގެ މަސައްކަތް ކޮށްފައިވާއިރު ވަޒީރުންނާ 384 ސުވާލު ކޮށްފައިވާ ކަމަށް ވެސް އަސްލަމް ވިދާޅުވިއެވެ. އަސްލަމް ވަނީ 19 ވަނަ މަޖިލިހުން ނިންމާފައިވާ މުހިންމު ބިލުތައް ވެސް ފާހަގަކުރައްވާފައެވެ.
އޭގެ ތެރޭގައި ހިމެނޭ ބައެއް ބިލުތައް:
- ރިޔާސީ ކޮމިޝަންތަކުގެ ބިލް
- ޤާނޫނީ ފަންނުގެ ބިލް
- ސަގާފީ ތަރިކައިގެ ބިލް
- މަސްވެރިކަމާއި ބެހޭ ބިލް
- ކުޑަކުދިންގެ އަދުލުގެ ބިލް
- އާމްދަނީން ޓެކްސްނެގުމުގެ ބިލް
- ޗަރޓަޑް އެކައުންޓެންޓުންގެ ބިލް
- ތަޢުލީމީ ބިލް
- އިންތިގާލީ އިންސާފުގެ ބިލް
- ފޮރިން ސަރވިސްގެ ބިލް
19 ވަނަ މަޖިލީހުގައި 3 ޤައުމެއްގެ ޢިއްޒަތްތެރިން ތަގުރީރުކުރައްވާފައިވެއެވެ. އެއީ އިންޑިއާގެ ބޮޑުވަޒީރު ނަރެންދްރަ މޯދީ އާއި ސްރީލަންކާގެ ބޮޑުވަޒީރު ރަނިލް ވިކްރަމަސިންހަ އާއި ބަންގްލަދޭޝްގެ ބޮޑުވަޒީރު ޝެއިޚް ހަސީނާއެވެ.
އަސްލަމް ވިދާޅުވި ގޮތުގައި 19 ވަނަ މަޖިލީހުން ވަނީ މުޅި ދުނިޔެއަށް ދިމާވި ކޯވިޑް-19ގެ ބަލިމަޑުކަމުގެ ތެރޭގތައި ވެސް ގިނަ ގޮންޖެހުންތަކާއެކު މަސައްކަތްކޮށްފައެވެ. އެގޮތުން އިގްތިޞާދީ ގޮތުންނާއި އިޖުތިމާއީ ގޮތުން ޤައުމު ހަމަމަގަށް އަޅުވައި ބަލިމަޑުކަމުން އަރައިގަތުމަށް މުހިންމު މަސައްކަތްތަކެއް 19 ވަނަ މަޖިލީހުން ކުރެވުނު ކަމަށްވެސް މަޖިލީހުގެ ރައީސް މުޙައްމަދު އަސްލަމް ވިދާޅުވިއެވެ.