ކާބޯތަކެތީގެ ރައްކާތެރިކަމުގެ ބިލު މަޖިލީހުން ފާސްކޮށްފި

ދެ އަހަރަށްވުރެ ގިނަ ދުވަސްވެފައިވާ ކާބޯތަކެތީގެ ރައްކާތެރިކަމުގެ ބިލު ރައްޔިތުންގެ މަޖިލީހުން ފާސްކޮށްފިއެވެ.

މި ބިލް ފާސްކޮށްފައި ވަނީ 19 ވަނަ މަޖިލީހުގެ އެންމެ ފަހު ޖަލްސާގައެވެ.

ކާބޯތަކެތީގެ ރައްކާތެރިކަމުގެ ބިލު މަޖިލީހަށް ހުށަހެޅުއްވީ ކުރީ ސަރުކާރުގެ ފަރާތުން މަނަދޫ ދާއިރާގެ މެންބަރު އަހުމަދު ހާރޫނެވެ. މި ބިލް ހުށަހެޅުއްވީ އޮގަސްޓް 2021ގައެވެ.

މި ބިލުގައި ރާއްޖެއަށް އެޔެތެކުރާ ކާބޯތަކެއްޗާއި ރާއްޖޭން ބޭރަށް ފޮނުވާ ކާބޯތަކެތީގެ ރައްކާތެރިކަމުގެ ފެންވަރު ރަނގަޅު ކުރުމަށް އުސޫލުތައް ވަނީ ކަނޑައަޅައިފައެވެ. އެގޮތުން، މި ބިލު ޤާނޫނަކަށް ވެގެންދިއުމުން ގަޑުބަޑުކޮށްފައިވާ ކާބޯތަކެތި ނުވަތަ ގަޑުބަޑު ކުރުމަށް ބޭނުންކުރާ ބާވަތްތައް، އެޑަލްޓްރަންޓް ގަނެވިއްކުން މަނާވާނެއެވެ. އަދި އަސްލު އޮޅޭގޮތަށް ލޭބަލްކޮށްފައިވާ ކާބޯތަކެއްޗާއި ސިއްޙަތަށް ގެއްލުންދޭ ކާބޯތަކެތި ވެސް މި ބިލު ޤާނޫނަކަށް ވުމުން ރައްޖެ އެތެރެކުރުމާއި އުފެއްދުން މަނާވާނެއެވެ.

މި ބިލު މަޖިލީހުން ފާސްކޮށްފައިވަނީ ވޯޓުގައި ބައިވެރިވި 47 މެންބަރުންގެ ވޯޓުންނެވެ. މި ބިލު ޤާނޫނަކަށް ވެގެންދިއުމޔުން ކާބޯތަކެތީގެ ރައްކާތެރިކަން ކަށަވަރު ކުރުމަށް އެކުލަވާލާފައިވާ ބައެއް ޤާނޫނުތައް އުވިގެންދާނެ ކަމަށް ކޮމިޓީ ރިޕޯޓުގައި ވަނީ ބަޔާންކޮށްފައެވެ.

އެގޮތުން، މި ބިލު ޤާނޫނަކަށް ވެގެންދިއުމުން ރާއްޖެއަށް އެތެރެކުރާ ކާބޯތަކެއްޗާއި އުފައްދައި ގުދަންކޮށް ވިއްކާ ކާބޯތަކެއްޗަކީ ވެސް ސިއްހީގޮތުން ރައްކާތެރި ތަކެތި ގޮތުގައި ކަށަވަރު ކުރުމަށް އަމަލު ކުރަންޖެހޭ އުސޫލުތަކާއި މިންގަނޑުތައް ކަނޑައެޅުމަށް ޤާނޫނީ އޮނިގަނޑެއް އުކުލަވައިލެވޭނެއެވެ.