ޕީއެސްއެމް ނިއުސް ޓީމުން ކުރަމުންދަނީ ތައުރީފު ހައްގު، ބުރަ މަސައްކަތެއް: ނައިބު ރައީސް

ޕަބްލިކް ސަރވިސް މީޑިއާ، ޕީއެސްއެމްގެ ނިއުސް ޓީމުން ކުރަމުންދަނީ ތައުރީފް ހައްގު، ބުރަ މަސައްކަތެއްކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަތީފު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕީއެސްއެމް ނިއުސްގެ 7 ވަނަ އަހަރީ ދުވަހުގެ މުނާސަބަތުގައި ތަހުނިޔާ ވިދާޅުވެ، ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަތީފު ވިދާޅުވީ މެދުނުކެނޑި 24 ގަޑިއިރު ރައްޔިތުންގެ ޚިދުމަތުގައި ޕީއެސްއެމް ނިއުސް ޓީމުން ކުރަމުންދާ ބުރަ މަސައްކަތަކީ ތައުރީފު ޙައްގު މަސައްކަތެއް ކަމަށެވެ.

ޕީއެސްއެމް ނިއުސްގެ 7 ވަނަ އަހަރީ ދުވަހާއި ގުޅިގެން ރައީސުލްޖުމްހޫރިއްޔާގެ ނައިބު ވަނީ ޕީއެސް ނިއުސް ޓީމާވެސް ބައްދަލުކުރައްވާފައެވެ. އަދި އަހަރީ ދުވަހާ ގުޅިގެން އެމަނިކުފާނު ދެއްވި ހާއްސަ އިންޓަވިއު މިރޭ 9:00 ގައި ޕީއެސްއެމް ނިއުސްއިން ގެނެސްދިނުމަށް ވަނީ ހަމަޖެހިފައެވެ.

ޕީއެސްއެމްގެ އަހަރީ ދުވަހުގެ އިތުރުން، މިއަދު ފާހަގަކުރަމުންދާ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ތަހުނިޔާ ނޫސްވެރިންނާއި މީޑިއާ ދާއިރާގައި މަސައްކަތް ކުރާ ފަރާތްތަކަށް ނައިބު ރައީސް ފޮނުއްވިއެވެ. އަދި ނޫސްވެރިންނަށް މިނިވަންކަމާއެކު މަސައްކަތް ކުރެވޭނެ ވެއްޓެއް ޤާއިމު ކުރުމަކީ ސަރުކާރުން އިސްކަންދެއްވައި ކަމެއްކަންވެސް އެމަނިކުފާނު ފޮނުއްވި ތަހުނިޔާގެ މެސެޖުގައި ފާހަގަކުރެއްވިއެވެ.