ހުޅުމާލެ 2 ވަނަ ފިޔަވަހީގައި މުދާ އަރުވާ ބޭލުމަށް ވަގުތީ ޖެޓީއެއް

ހުޅުމާލެ 2 ވަނަ ފިޔަވަހީގައި މުދާ އަރުވާ ބޭލުމަށް ވަގުތީ ޖެޓީއެއް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ޤާއިމްކޮށްފިއެވެ.

އެޗްޑީސީން ބުނީ އެއީ ހުޅުމާލެއަށް މުދާ އަރުވާ ބޭލުމުގެ ދަތިކަން ހުޅުމާލޭގެ ތަރައްޤީގެ މަސައްކަތުގައި އުޅޭ ފަރާތްތަކާއި އެހެނިހެން ވިޔަފާރިކުރާ ފަރާތްތަކަށް ކުރިމަތިވަމުންދާތީ އެ ކަމަށް ޙައްލެއް ހޯދުމަށްޓަކައި ޤާއިމްކުރި ޖެޓީއެއްކަމަށެވެ. ޖެޓީގެ ޙިދުމަތް ބޭނުންވާ ފަރާތްތަކަށް އެޗްޑީސީގެ "މައި ހުޅުމާލެ" ޕޯޓަލް މެދުވެރިކޮށް ޖާގަ ކަށަވަރުކުރުމުގެ އިންތިޒާމް ހަމަޖެހިގެންދާނެ ކަމަށް އެ ކުންފުނިން ވަނީ ބުނެފައެވެ.

ޖެޓީގެ ޙިދުމަތް 18 ފެބްރުއަރީ އިން ފެށިގެން ލިބޭނެއެވެ. ޖެޓީ ބޭނުންކުރުމަށް އެ ކަމަށް ކަނޑައެޅިފައިވާ ފީއެއް ނަގާނެ ކަމަށް އެޗްޑީސީން ވަނީ ބުނެފައެވެ. ފީ ކަނޑައަޅާފައި ވަނީ އުޅަނދުގެ ކުޑަ ބޮޑުމިނަށް އަދި ހޭދަވާ ވަގުތަށް ބެލުމަށްފަހުއެވެ. އެޗްޑީސީން ބުނީ އެ ނޫން ގޮތަކަށް ޖެޓީ ބޭނުންކުރުމަކީ މަނާކަމެއް ކަމަށެވެ.