ޢާންމުކޮށް ވިއްކާ ގެދޮރާއި ފުލެޓް ގަތުމަށް އެމީހެއްގެ ޕެންޝަން އެކައުންޓުގައިވާ ފައިސާ ގެރެންޓީއެއްގެ ގޮތުގައި ބޭނުންކުރެވޭގޮތަށް ރައްޔިތުންގެ މަޖިލީހުން ފާސްކުރައްވައިފިއެވެ. މިގޮތަށް ފާސްވީ ވޯޓުގައި ބައިވެރިވެ ވަޑައިގެންނެވި 61 މެމްބަރުންގެ އަޣްލަބިއްޔަތުންނެވެ.
ޢާންމުކޮށް ވިއްކާ ގެދޮރާއި ފުލެޓްގަތުމަށް ބޭނުންވާ ޑައުންޕޭމަންޓްގެ ފައިސާ، އެމީހެއްގެ ނަމުގައި ޕެންޝަން ފަންޑުގައި ބަހައްޓާފައި ހުންނަ ފައިސާއިން ކޮލެޓަރަލް ނުވަތަ ސެކިއުރިޓީއެއްގެ ގޮތުގައި ބެހެއްޓޭގޮތަށް ޕެންޝަނާބެހޭ ޤާނޫނަށް އިޞްލާޙު ހުށައެޅުއްވީ އިނގުރައިދޫ ދާއިރާގެ މެމްބަރު އިބްރާހީމް ފަލާޙުއެވެ. ޕެންޝަނާބެހޭ ޤާނޫނަށް ގެންނެވި އިޞްލާޙުގެ މަޤްޞަދަކީ ރައްޔިތުންނަށް ދިމާވެފައިވާ އެންމެ ބޮޑު ދަތިކަމަކީ ގެދޮރުގެ ދަތިކަން ކަމަށްވާތީ، ސޯޝަލް ސެކިއުރިޓީ ނިޒާމްގެ ތެރެއިން ޙައްލެއް ހޯދައިދެއްވުންކަމަށް ފަލާޙު ވިދާޅުވިއެވެ
މި އިޞްލާހު ދިރާސާ ކުރައްވާ ނިންމެވި ގޮތުގެ ރިޕޯޓަށް ބަޙުސްކުރެއްވި ގިނަ މެމްބަރުން ވިދާޅުވީ، ފަހަށް ރައްކާކުރެވޭ ފައިސާ ދިރިއުޅުމުގައި ބޭނުންކުރުމަކީ ރަނގަޅު ކަމެއްކަމަށާއި، ބޭސްފަރުވާކުރުމާއި ޙައްޖަށް ދިއުންފަދަ މުހިއްމު ކަންކަމުގައި ބޭނުންކުރެވޭނެ ގޮތެއް ހެދުމަށް ތާއީދުކުރައްވާ ކަމަށެވެ. މި ޤާނޫނުގެ ދަށުން ކޮލެޓެރަލައިޒް ކުރުމާބެހޭ އުޞޫލެއް މިޤާނޫނަށް ޢަމަލުކުރަން ފަށާ ތާރީޚުން ފެށިގެން 3 މަސް ދުވަހުގެ ތެރޭގައި ޕެންޝަން އޮފީހުގެ ބޯޑުން ކަނޑައަޅުއްވައި ޝާއިޢުކުރައްވަން ޖެހިވަޑައިގަންނަވާނެއެވެ.