ދައުލަތުގެ މުވައްޒަފުންގެ މުސާރާގެ ސިޔާސަތު ކަނޑައެޅުމަށް ޕޭ ކޮމިޝަނެއް އުފެއްދެވުމަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ. ސަރުކާރުގެ ފަރާތުން ފުވައްމުލަކު އުތުރު ދާއިރާގެ މެމްބަރު ޢަލީ ޝާހު، ހުށައެޅުއްވި ދައުލަތުގެ މުސާރައިގެ ސިޔާސަތުގެ ބިލު ފާސްވީ 49 މެމްބަރުންގެ އިއްތިފާޤުންނެވެ.
ދައުލަތުގެ މުވައްޒަފުންގެ މުސާރަ ކަނޑައެޅުމާއި، މުސާރައިގެ ކުރިއެރުން ދިނުމާއި، ދައުލަތުގެ މުވައްޒަފުންގެ އުފެއްދުންތެރިކަން އިތުރުކުރުމަށް ދެވިދާނެ ޢިނާޔަތްތަކުގެ ސިޔާސަތުތަކާއި މިންގަނޑު ކަނޑައެޅުމުގެ ބިލަކީ، މުވައްޒަފުންގެ މުސާރައާއި ޢިނާޔަތްތައް ކަނޑައެޅުމުގައި އަޅާކިޔާނެ ނުވަތަ ބުރަވާނެ ނުވަތަ ޕްރޮފެޝަނަލް މިންގަނޑުތަކެއް ދުރާލައި ކަނޑައެޅުމަށް ހުށައެޅުއްވި ބިލެކެވެ. މަޖިލީހުން ފާސްކުރެއްވި މި ބިލުގައި މުވައްޒަފުންގެ މުސާރާގެ ސިޔާސަތު ކަނޑައެޅުމަށް ފަސް މެމްބަރުންގެ މައްޗަށް އެކުލެވޭ ޕޭ ކޮމިޝަނެއް އުފައްދަން ޖެހޭނެކަމަށް ބުނެފައިވެއެވެ. ޕޭ ކޮމިޝަނަކީ ދައުލަތުގެ މުވައްޒަފުންގެ މުސާރަ ކަނޑައެޅުމާއި، މުސާރައިގެ ކުރިއެރުން ދިނުމާއި، ދައުލަތުގެ މުވައްޒަފުންގެ އުފެއްދުންތެރިކަން އިތުރުކުރުމަށް އެމީހުންނަށް ދެވިދާނެ ޢިނާޔަތްތަކާއި، ވަޒީފާއިން ނުވަތަ މެމްބަރުކަމުން ވަކިވާއިރު، ޢިނާޔަތް ދޭނެ ސިޔާސަތުތަކާއި މިންގަނޑުތަކާއި ހަމަތައް ކަނޑައަޅައިދޭ ކޮމިޝަނެއް ކަމަށް ބަޔާންކުރައްވާފައިވެއެވެ. މި ބިލަކީ މުސާރައިގެ ތަފާތުކުރުންތައް ނައްތާލުމަށް ލިބިގެންދާ ފުރުޞަތެއްކަން މެމްބަރުން ފާހަގަކުރެއްވިއެވެ.
މި ޤާނޫނުގެ ދަށުން އުފައްދާ ޕޭ ކޮމިޝަނަށް މެމްބަރުން ޢައްޔަންކުރައްވާނީ ރައީސުލްޖުމްހޫރިއްޔާކަމަށް ކަނޑައެޅުމަށް މަޖިލީހުން މިއަދު ފާސްކުރައްވާފައިވެއެވެ.