ކިނބިދޫ-ވޭމަންޑޫ ކޯޒްވޭ ހަގީގަތަކަށް ހަދައި ދެރަށް އެއްފަސްކޮށްދޭނަން: ރައީސް

ރައްޔިތުން އެދޭގޮތަށް ކޮޅުމަޑުލު ވޭމަންޑުއާއި ކިނބިދޫ ކޯޒްވޭއަކުން ގުޅާލާ އެއްފަސްކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ކިނބިދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ކޯޒްވޭއަކުން ވޭމަންޑުއާއި ކިނބިދޫ ގުޅުވާލުމަކީ ކުރީ ސަރުކާރުގައިވެސް ވަޢުދެކެވެ. ކިނބިދޫ ކައުންސިލްގެ ރައީސް ޢަލީ ޙުސައިން ވިދާޅުވީ، ސަރުކާރުގެ ހުރިހާ ބާރެއް އޮވެމެ އެ މަޝްރޫއު ނުފުއްދި "ބިލާހަކަށް" ވެފައިވާކަމަށެވެ. އެހެންކަމުން ރައްޔިތުންގެ އުންމީދަކީ ދެ ރަށް ގުޅުވާލާ އެއްފަސްކުރުން ކަމަށް ކައުންސިލްގެ ރައީސް ވިދާޅުވިއެވެ.

ކިނިބިދޫ ކައުންސިލުން ވަނީ ޒުވާނުންނަށް ކުޅިވަރުގެ ވަސީލަތްތައް ނެތުމާއި، އެރަށުގެ ބިމުގެ ދަތިކަމާއި، ކިނބިދުއާއި ވޭމަންޑޫ އެއްފަސްކުރުމަށް ބޭނުންވާކަން ރައީސަށް ހުށައަޅާފައެވެ. މީގެ އިތުރުން ފަތުރުވެރިކަން ކުރިއެރުމަށް ހުރި ދަތިތަކާއި ތ.އަތޮޅުގައި ރިސޯޓުތައް ނެތުންވެސް ކަންބޮޑުވުމެއްގެ ގޮތުގައި ކައުންސިލުން ފާހަގަކުރެއްވިއެވެ.

މިކަންކަމަށް އިޝާރާތްކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރައްޔިތުންގެ އުންމީދުތައް ހަގީގަތަކަށް ހައްދަވައިދެއްވާނެކަމަށެވެ. ކިނބިދޫގައި ވާހަކަފުޅު ދައްކަވަމުންވެސް ރައީސް ތަކުރާރުކުރެއްވީ އިޤްތިޞާދީ ހާލަތު ރަނގަޅުކުރުމުގެ ވާހަކަފުޅެވެ. އެގޮތުން އިޤްތިޞާދު ރަނގަޅުކުރުމުގައި ދަތުރުފަތުރު މުހިންމު ދައުރެއް އަދާކުރާކަމަށާއި، ކަނޑާ ވައިގެ މަގުން އެއް ރަށުން އަނެއް ރަށަށް އަދި އެއް އަތޮޅުން އަނެއް އަތޮޅަށް ދަތުރުކުރެވޭނެ ނިޒާމެއް އޮންނަންޖެހޭކަމަށް ރައީސް ވިދާޅުވިއެވެ. ދުނިޔޭގެ ކުރިއަރާފައިވާ ޤައުމުތައްވެސް ކުރިއަރައިގެން ދިޔައީ ދަތުރުފަތުރުން ގުޅުވާލާ ކޯޒްވޭތަކާއި ބްރިޖުތައް އަޅައިގެންކަމަށް ރައީސް ވިދާޅުވިއެވެ.

ރައީސް ވިދާޅުވީ، ރާއްޖޭގައި މިހާތަނަށް އެެޅުނީ އެންމެ ބްރިޖެއް ކަމަށާއި، ނަމަވެސް އެފަދަ އައު މަޝްރޫއުތައް ކުރިއަށް އޮތްތަނުގައި ފެންނާނެކަމަށެވެ. ކިނބިދޫގެ ރައްޔިތުންނަށް އެންމެ މުހިންމީ ކިނބިދޫއާއި ވޭމަންޑޫ ކޯޒްވޭއަކުން އެއްފަސްކުރުން ކަމަށްވާއިރު އެކަން ކޮށްދެއްވާނެކަމުގެ ޔަޤީންކަން ދެއްވާކަމަށް ރައީސް ވިދާޅުވިއެވެ.

"އަޅުގަނޑު ކޮންމެ ވާހަކައެއް ދަންނަވާފައިވާނީ ހިތުގެ އެންމެ ފުންމިނުން. ރައްޔިތުން ރުއްސަން ދެއްކި އެއްވެސް ވާހަކައެއް ނޯންނާނެ. ދެއްކީ ކޮށްދޭހިތުން ކުރާހިތުން ދެއްކި ވާހަކައެެއް. އެހެންކަމުން ކޯޒްވޭ ބިލާހަކަށް ވެފައި އޮތް އޮތުން ހަގީގަތަކަށް ހަދައިދޭނަން". ރައީސް ވިދާޅުވިއެވެ

ރައީސް ވިދާޅުވީ ތ.އަތޮޅުގައި 2 ކޯޒްވޭ އަޅަންޖެހިފައިވާކަމަށާއި، އެގޮތުން މަޑިފުއްޓާއި ދިޔަމިގިލިވެސް ކޯޒްވޭއަކުން ގުޅުވާލާނެކަމަށެވެ. އިޤްތިޞާދު ރަނގަޅުކޮށްގެން ނޫނީ ދެމެހެއްޓެނިވި ތަރައްޤީ ނުގެނެވޭނެކަމަށާއި، އެހެންކަމުން ކަންކަން ކުރިއަށްގެންދަވާނީ އެގޮތަށްކަމަށް ވިދާޅުވިއެވެ. އަދި ކޯޒްވޭ މަޝްރޫޢަށް އެންމެ އިސްކަން ދިނުމަށްފަހު އެހެން މަޝްރޫޢުތައްވެސް ކުރިއަށް ގެންދަވާނެކަމަށް ވިދާޅުވިއެވެ.

ރައީސް ވިދާޅުވީ ޤައުމުތަކުގެ އިޤްތިޞާދީ ހާލަތު ބަލައި، އައިއެމްއެފުން ރާއްޖޭގެ އިޤްތިޞާދީ ހާލަތު އެންޑޯޒްކޮށްފައިވާ ކަމަށެވެ. އެހެންކަމުން އިޤްތިޞާދީ ފިޔަވަޅުތަކާއެކު ހުރިހާ ކައުންސިލަކާ ވުޒާރާތައް ގުޅިގެން މަޝްރޫއުތައް ތަރުތީބުކުރުމުން، އާމްދަނީ އިތުރުކުރުމާއެކު ރައްޔިތުން ބޭނުންވާ ތަރައްޤީ ގެނެސް ރައްޔިތުންނަށް އުންމީދުތައް ހާސިލްކޮށްދެއްވާނެ ކަމަށް ވިދާޅުވިއެވެ.

" ޒުވާނުން، ކަނބަލުންގެ ކަންބޮޑުވުންތައް، ހުރިހާކަމެއް، ފުޓްބޯލް، ހޭންޑްބޯލް ކިޔާނެކަމެއް، މިހުރިހާ ކަމަކީވެސް އަޅުގަނޑުމެންނަށް ކުރެވޭނެ ކަމެއް". ރައީސް ވިދާޅުވިއެވެ.

ރައީސްގެ ވާހަކަފުޅުގައި ކޮންމެ ރަށެއްގައިވެސް ވަކިވަކި ފަރުދުންގެ ކުރިއެރުމަށް އިސްކަންދެއްވާނެ ކަމަށާއި، ކަނބަލުންނަށްވެސް ވިޔަފާރިކުރުމުގެ ފުރުޞަތު ފަހިކޮށްދެއްވާނެކަމަށެވެ. އެކަމަށް އޮތް އެންމެ ފަހި ފުރުޞަތަކީ ރަށުގެ އިޙްތިޞާސްގެ ބޭރުންވެސް އާމްދަނީ ހޯދުމަށް ފަޅުރަށް، ކައުންސިލަށް މަންފާ ލިބޭގޮތަށް ވިޔަފާރި ކުރެވޭނެ ގޮތް ހަމަޖައްސާ ދެއްވުންކަމަށް ވިދާޅުވިއެވެ. އެހެންކަމުން އެކަން ހުރިހާ ކައުންސިލަކަށްވެސް ފަހިކޮށްދެއްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ ދަތުރުފަތުރުގެ ނިޒާމާއެކު އެއަރޕޯޓާއި ރިސޯޓުތަކާއި، އެނޫންވެސް ތަރައްޤީ މުޅި
ތ. އަތޮޅަށް ގެނެސްދެއްވާނެކަމަށެވެ.