މާލޭގެ ކަރަންޓްގެ ކަރަންޓްގެ ޚިދުމަތް ރަނގަޅުކުރެއްވުމަށްޓަކާ 8 އަށްމެގަވޮޓްގެ ޖަނަރޭޓަރެއް ހޯދުމަށް ކޮންޓްރެކްޓަރާއި ޙަވާލުކުރައްވައިފިއެވެ.
ޕްރިޕެއަރިންގ އައުޓަރ އައިލެންޑްސް ފޯ ސަސްޓެއިނަބަލް އެނަރޖީ ޑިވޮލޮޕްމެންޓް، ޕޮއިސްޑް ގެދަށުން ހޯދުމަށް ހަމަޖެހިފައިވާ މި ޖަނަރޭޓަރާއި އަދި ޖަނަރޭޓަރާއި ގުޅުންހުރި ތަކެތި ހޯދުމަށް އެންވަޔަރަންމަންޓް އެންޑް އެނަރޖީ މިނިސްޓްރީއާ ސްރީލަންކާގެ ކުންފުންޏެއްކަމަށްވާ ލަކްދަނަވި ލިމިޓެޑާއެކު މިއަދު ވަނީ އެއްބަސްވުމުގައި ސޮއިކުރައްވާފައެވެ. އެންވަޔަރަންމަންޓް މިނިސްޓްރީގައި މިއަދު ބޭއްވި ރަސްމިއްޔާތެއްގައި ސޮއިކުރި މި އެއްބަސްވުމުގެ ދަށުން ގެނެވޭ 8 މެގަވޮޓްގެ ޖަނަރޭޓަރަކީ ރާއްޖެއިން ތެލަށް ބަރޯސާވާ މިންވަރު ކުޑަކުރުމަށާއި، ރާއްޖެއިން ލިބެންހުރި އިޔާދަކުރަނިވި ހަކަތައިގެ ބާވަތްތައް ބޭނުންކުރުން އިތުރުކުރުމުގެ އިތުރުން، ހަކަތައިގެ އިސްރާފު ކުޑަކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ޕޮއިސްޑް ޕްރޮޖެކްޓްގެ 2 ވަނަ ފިޔަވަހީގެ ދަށުން ގެނެވޭ ޖަނަރޭޓަރެއްކަމަށް އެނަރޖީ މިނިސްޓްރީން މަޢުލޫމާތުދެއްވައެވެ.
މި ކޮންޓްރެކްޓްގައި ސޮއިކުރެއްވުމަށްފަހު މީޑިޔާއަށް މަޢުލޫމާތުދެއްވަމުން އެންވަޔަރަމެންޓް މިނިސްޓަރ ޠޯރިޤް އިބްރާހިމް ވިދާޅުވީ މި ޖަނަރޭޓަރުގެ ސަބަބުން މާލެއަށް ދިމާވާ ކަރަންޓް ކެނޑުމުގެ މައްސަލައަށް ހައްލެއް ގެނެވޭނެކަމަށެވެ. އެހެންނަމަވެސް ރާއްޖޭގައި ކަރަންޓް އިސްރާފްކުރުން ކުޑަކޮށް، ހެޔޮގޮތުގައި ކަރަންޓް ބޭނުން ކުރުމަށް މިނިސްޓަރ ޠޯރިޤް އިލްތިމާސްކުރެއްވިއެވެ.
މި ރަސްމިއްޔާތުގައި ވާހަކަދައްކަވަމުން ސްޓެލްކޯގެ މެނޭޖިންގ ޑިރެކްޓަރ ޢަބުދުއް ޝަކޫރު ޞޯލިޙް ވިދާޅުވީ މާލޭގެ ކަރަންޓްގެ ޑިމާންޑަށް ބަލާއިރު މި ސައިޒުގެ ޖަނަރޭޓަރު ހޯދުމަށް ބޭނުންވެފައިވާތާ ދުވަސްތަކެއް ވެފައިވާކަމަށެވެ. މިގޮތުން މިހާރު މާލޭގެ މިހާރު ކެޕޭސިޓީއަކީ 60 އެއްހާ މެގަވޮޓްކަމަށްވާއިރު ހޫނަގަދަ ދުވަސްވަރަށް 55 އިންސައްތައާ ހަމައަށް މާލޭގައި ކަރަންޓް ބޭނުން ކުރަމުންދާކަމަށެވެ.
މާލެ ސަރަހައްދުގެ ކަރަންޓްގެ ޚިދުމަތުގެ ފެންވަރު މަތިކުރެއްވުމަށް، ކުރައްވަމުން ގެންދަވާ މަސައްކަތުގެ ދަށުން ހުޅުލެއާ މާލެއާ ދެމެދުއަޅާ ބްރިޖުގެ ޒަރީއާއިން މާލެއާ ހުޅުމާލޭގެ ކަރަންޓްގެ ވިއުގަ ގުޅާލެވި ހުޅުމާލޭގައިވެސް 5،000 މެގަވޮޓްގެ ކެޕޭސިޓީއެއް ޤާއިކުރައްވާނެކަމަށް ސަރުކާރުން ވިދާޅުވެއެވެ.