މަޖިލިސް ބަހުސް މިފަހަރުވެސް ޕީއެސްއެމުން ގެނެސްދެނީ، ބައެއް ބަހުސްތައް އަތޮޅުތަކުގައި

ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންނަށް ޚާއްޞަކޮށް ޕަބްލިކް ސަރވިސް މީޑިއާ (ޕީއެސްއެމް)އިން އިންތިޒާމުކުރާ "މަޖިލިސް 2024" ބަހުސް އިފްތިތާޙްކޮށްފިއެވެ.

މަޖިލިސް 2024 ބަހުސަކީ ކުރިއަށް އޮތް މަޖިލިސް އިންތިޚާބުގައި ވާދަކުރައްވާ ހުރިހާ ކެންޑިޑޭޓުންގެ މެދުގައި ބާއްވާ ބަހުސެކެވެ. މި ބަހުސް ކުރިއަށް ގެންދާނީ ކޮންމެ ދާއިރާއެއް ވަކިންނެވެ. އެގޮތުން 20 ވަނަ ރައްޔިތުންގެ މަޖިލީހުގައި ހިމެނޭ 93 ދާއިރާގެ ބަހުސް ވަކިން ބާއްވާނެއެވެ.

ކޮންމެ މަޖިލިސް އިންތިޚާބަކާއި ދިމާކޮށް ޕީއެސްއެމުން އިންތިޒާމުކުރަމުން އަންނަ ބަހުސް މިފަހަރު އިންތިޒާމުކުރަނީ ބައެއް ބަދަލުތަކާއެކުއެވެ.

"މަޖިލިސް 2024" ބަހުސް އިފްތިތާހުކޮށްދެއްވާ ވާހަކަފުޅު ދައްކަވަމުން ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވީ، މިފަދަ ބަހުސްތަކަކީ ތަފާތުކޮށް ކުރިއަށް ގެންދެވިދާނެ ކަމެއްކަމަށެވެ. އެގޮތުން އެންމެ ބޮޑަށް ވިސްނެވީ ވީހާވެސް ރައްޔިތުންނާއި ކައުންސިލްތަކާއި ގުޅިގެން ބަހުސް ކުރިއަށް ގެންދެވުމަށްކަމަށް ޒީނާ ވިދާޅުވިއެވެ.

"ރައްޔިތުންގެ މަޖިލީހުގެ އިންތިޚާބުގެ ބަހުސަކީ މުޅި ރާއްޖޭގެ ވަރަށް ގިނަ ޢަދަދެއްގެ ކެންޑިޑޭޓުން ބައިވެރިވާ ބަހުސެއް. އެހެންވީމަ އަޅުގަނޑުމެން ވިސްނީ ސިޓީތަކުގަ ސިޓީތަކުގެ ބަހުސް ކުރިއަށް ގެންދިއުމަށް. މިދެންނެވީ ކުޅުދުއްފުށި ސިޓީ، ފުވައްމުލަކު ސިޓީ އަދި އައްޑޫ ސިޓީގަ އެ ދާއިރާތަކުގެ ބަހުސް ކުރިއަށް ގެންދާގޮތަށް. މިގޮތުން އެންމެ ތަފާތުކަމަކީ މި ބަހުސް ކުރިއަށްދާއިރު، ބަހުސް އަޑުއަހާލުމަށް ބަހުސް ކުރިއަށްދާތަނުގަ ބަލަން ތިބެވޭގޮތަށް." ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވިއެވެ.

ޒީނާ ވިދާޅުވީ، ޕީއެސްއެމް ޓީމުން ބަހުސަށް ތައްޔާރުވަމުން އަންނަކަމަށެވެ. އަދި މިކަމަށް ސިޓީ ކައުންސިލްތަކުން ލިބޭ އެއްބާރުލެއްވުން ޒީނާ ފާހަގަކުރެއްވިއެވެ. ޒިނާ ވަނީ މިއީ ކާމިޔާބު ބަހުސަކަށް ވާނެކަމަށް އުންމީދު ކުރައްވާކަމަށްވެސް ވިދާޅުވެފައެވެ.

ރައްޔިތުންގެ މަޖިލީހުގެ އިންތިޚާބު އޮންނާނީ މާރިޗު މަހުގެ 17 ވާ އާދީއްތަ ދުވަހުއެވެ. އިންތިޚާބުގައި ވާދަކުރުމަށް އިލެކްޝަންސް ކޮމިޝަނުން މިހާރު ވަނީ ހުޅުވާލާފައެވެ. އެގޮތުން މިމަހުގެ 14 ވަނަ ދުވަހުގެ ނިޔަލަށް އިންތިޚާބަށް ކުރިމަތިލެވޭނެކަމަށް އިލެކްޝަންސް ކޮމިޝަނުން ވިދާޅުވެއެވެ.

އިންތިޚާބުގައި ވާދަކުރާ ހުރިހާ ކެންޑިޑޭޓުންނަށް މިބަހުސްގައި ބައިވެރތިވެވަޑައިގަތުމަށް ދަޢުވަތު ދެއްވާނެކަމަށް ޕީއެސްއެމުން ބުންޏެވެ. މި ބަހުސްގެ އެންމެ މުހިންމު އެއް ބޭނުމަކީ މަޖިލިސް އިންތިޚާބުގައި ވާދަކުރައްވާ ކެންޑިޑޭޓުން އެ ދާއިރާއެއްގެ ތަރައްޤީއާއި ކުރިއެރުމަށް އަދި ރައްޔިތުންގެ ލާބައަށާއ މުޅި ޤައުމުގެ ކުރިއެރުމަށް ކުރައްވުމަށް ގެންގުޅުއްވާ ތަސައްވުރު ރައްޔިތުންނަށް ހާމަކޮށްދިނުމެވެ.