ކައިވެނި ރޫޅުމުން ދެމަފިރިންގެ މަސައްކަތުން ހޯދާފައިވާ މުދަލުން ބައެއް އަންހެންމީހާއަށް ލިބޭގޮތަށް އާއިލާއާއި ބެހޭ ޤާނޫނަށް ހުށައަޅަފައިވާ އިޞްލާޙު ރައްޔިތުންގެ މަޖިލީހުގެ އިޖްތިމާޢީ ކޮމިޓީން ފާސްކުރައްވައިފިއެވެ.
ސަރުކާރުގެ ފަރާތުން ދިއްދޫ ދާއިރާގެ މެމްބަރު ޢަބްދުއްލަޠީފް މުޙައްމަދު ހުށައަޅުއްވާފައިވާ އެއިޞްލާޙު ފާސްވީ ކޮމިޓީގައި ބައިވެރިވެވަޑައިގެންނެވި މެމްބަރުންގެ އިއްތިފާޤުންނެވެ.
މި އިޞްލާޙު ހުށައެޅުއްވުމުގެ މަޤްޞަދުގައި ވަނީ، ކައިވެނި ރޫޅުމުން އާއިލާއަށް ނިކަމެތިވުމުގެ ފުރުސަތު ކުޑަކުރުމަށްކަމަށް ބުނެފައިވެއެވެ. އަދި އަންހެން މީހާއަށް ހައްޤުވާ މިންވަރު ކޯޓުން ކަނޑައަޅާއިރު އެމުދާ ހޯދުމަށް ދެމަފިރިން ވަކިވަކިން މަސައްކަތްކޮށްފައިވާ މިންވަރު ބަލަންޖެހޭނެކަމަށާއި، އެމުދަލާއި ފައިސާއަށް ނިސްބަތްވާ ދަރަންޏެއް އޮތްތޯއާއި، އަށާރަ އަހަރުން މަތީގެ ދަރިންގެ މަސްލަހަތަށް ބަލަންޖެހޭނެކަމަށް އިސްްލާޙުގައިވެއެވެ.
މީގެއިތުރުން ދެމަފިރިން އެކުގައި އުޅުނުއިރު ހޯދާފައިވާ މުދަލެއް އަދުލުވެރި ގޮތެއްގައި ކޯޓުން ބަހަންޖެހޭނީ އެއްބަސްވުމުގައިވާ ގޮތުގެ މަތީން ކައިވެނި ރޫޅޭ ހާލަތުގައި ކައިވެނީގެ މުއްދަތުގައި ދެމަފިރިން އެކުގައި ހާސިލުކޮށްފައިވާ މުދަލާއި މެދު ޢަމަލުކުރާނެގޮތަކާއި މެދުގައި ޚިލާފުވެއްޖެ ހާލަތެއްގައިކަމަށް އިޞްލާޙުގައިވެއެވެ. އެގޮތުން ދެމަފިރިންގެ ދެމެދުގައި މުދާ ބަހާއިރު، އެ ފައިސާއިން ނުވަތަ މުދަލުން އަނބިމީހާ ނުވަތަފިރިމީހާއަށް ހައްޤުވާ ބައި ނުވަތަ މިންވަރު ކޯޓުން ކަނޑައަޅަން ޖެހޭނެކަމަށް ލަޠީފް ހުށައެޅުއްވި އިޞްލާޙުގައިވެއެވެ.