ޝަހީމާއި، އުޝާމާއި، ހައިދަރު އަނެއްކާވެސް ވަޒީރުކަމަށް އައްޔަންކުރައްވައިފި

އިސްލާމީ ކަންތައްތަކާއި ބެހޭ ވަޒީރުކަމަށާއި، ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރުކަމަށާއި ބަންޑާރަ ނައިބުކަމަށް 3 ބޭފުޅުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުއަދު ޢައްޔަންކުރައްވައިފިއެވެ.

އިސްލާމީ ކަންތައްތަކާއި ބެހޭ ވަޒީރުކަމަށް އައްޔަންކުރެއްވީ ޑރ. މުޙައްމަދު ޝަހީމް ޢަލީ ސަޢީދެވެ. ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރުކަމަށް އައްޔަންކުރެއްވީ ޑރ. ޢަލީ ހައިދަރު އަޙްމަދެވެ. އަދި ބަންޑާރަ ނައިބުކަމަށް ޢައްޔަންކުރެއްވީ އަލްއުސްތާޛް އަޙްމަދު އުޝާމެވެ. މި ތިން ބޭފުޅުންނަކީވެސް ކުރިން އެ މަޤާމުތަކުގައި ތިއްބެވި ބޭފުޅުންނެވެ.

އެ ތިން ބޭފުޅުންނަށް މަޤާމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛް ޙުސްނުއްސުޢޫދެވެ. މަޤާމުގެ ހުވާ ކުރެއްވުމަށްފަހު އެބޭފުޅުންވަނީ މަޤާމުގެ އިޤްރާރުގައި ސޮއިކުރައްވާފައެވެ.

ބަންޑާރަ ނައިބުގެ މަޤާމަށް އުޝާމް އައްޔަންކުރެވުމުގެ އިތުރުން، ޖުޑީޝަލް ސަރވިސް ކޮމިޝަންގެ މެންބަރުކަމުގެ މަޤާމަށް އަޙްމަދު އުޝާމް، ރައީސުލްޖުމްހޫރިއްޔާ އައްޔަންކުރެއްވުމާއި ގުޅިގެން އެމަޤާމުގެ ހުވާވެސް އުޝާމް ވަނީ ކުރައްވާފައެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ އެ ތިންބޭފުޅުންނަށް ރުހުން ހޯއްދެވުމަށް ވީހާވެސް އަވަހަށް މަޖިލީހަށް ފޮނުއްވުމަށް މަސައްކަތްކުރައްވަމުން އަންނަކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓުގައި ބަންޑާރަ ނައިބު ހިމެނިވަޑައިގަންނަވާހެން 22 ބޭފުޅުން ތިއްބަވައެވެ. އޭގެތެރެެއިން 19 ބޭފުޅަކަށް ވަނީ މަޖިލީހުން މިއަދު ރުހުން ދެއްވާފައެވެ. އަދި 3 ބޭފުޅުންނަށް ރުހުންދޭން ނުފެންނަކަމަށް މަޖިލީހުން ވަނީ ނިންމާފައެވެ.