ދިވެހިބަހަށް ޚިދުމަތްކުރައްވާ ފަރާތްތަކުގެ އަގުވަޒަން ކުރުމުގެ ގޮތުން، އެކަޑަމީ އިނާމާއި އެކަޑަމީ ޝަރަފްގެ އިނާމް ތަޢާރަފްކުރައްވައިފިއެވެ. ދިވެހި ބަހުގެ ދުވަސް ފާހަގަކުރުމަށް ރޭ ޣިޔާސުއްދީން ސްކޫލްގައި ބޭއްވެވި ރަސްމިއްޔާތުގައި މި ދެއިނާމް އިފްތިތާޙްކޮށްދެއްވީ އިންފޮމޭޝަން ކޮމިޝަނަރު ޢަބްދުލްޢަޒީޒް ޖަމާލް އަބޫބަކުރެވެ.
ދިވެހި ބަހުގެ އެކަޑަމީ އިނާމަކީ ދިވެހި ބަހާއި ތާރީޚާއި ޘަޤާފަތް ދަމަހައްޓާ ކުރިއެރުވުމަށްޓަކައި އެކި ފަރުދުންނާއި ޖަމާޢަތްތަކުން ކުރާ މަސައްކަތުގެ އަގު ވަޒަންކުރުމުގެ ގޮތުން ދިވެހި ބަހުގެ އެކަޑަމީން ދޭން ނިންމެވި އިނާމެކެވެ. މި އިނާމު ދިނުމުގެ މަޤްޞަދަކީ ދިވެހި ބަހާއި ޘަޤާފަތަށް، އެންމެންގެ ހިތްތަކުގައި ލޯތްބާއި ޝައުޤުވެރިކަން އުފެއްދުމެވެ. މި އިނާމު ދިނުމަށް ހަމަޖެހިފައިވަނީ 4 ދާއިރާއަކުން 12 ރޮނގަކުންނެވެ. އެއީ "ދިވެހިބަހުގެ ދާއިރާއިން، "މުޙައްމަދު އަމީން ދީދީ" އިނާމާއި، ދިވެހި އަދަބިއްޔާތުގެ ދާއިރާގެ ލިޔުންތެރިކަމުގެ ރޮނގުން ދެވޭ "ސަލާހުއްދީން އިނާމާ"އި، ޅެންވެރިކަމުގެ ރޮނގުން ދެވޭ "ނައިބު ތުއްތު" އިނާމެވެ. އަދި ދިވެހި ތާރިޚްގެ ދައިރާއިން ދެވޭ "ތާޖުއްދީން އިނާމް'އެވެ.
ދިވެހި ބަހުގެ އެކަޑަމީން ދޭން ނިންމެވި ދެވަ އިނާމަކީ އެކަޑަމީ ޝަރަފްގެ އިނާމެވެ. މިއީ ދިވެހި ބަހާއި ތާރީޚާއި ޘަޤާފަތުގެ ދާއިރާގެ ޤަދަރާއި އިޚްތިރާމާއި ޝަރަފް ބޮޑުކޮށް މަސައްކަތްކުރައްވާ ފަރާތްތަކުގެ މަސައްކަތް ދެމެހެއްޓުމުމަށް ހިތްވަރު ދިނުމަށް ދެވޭ ޝަރަފެވެ. މި އިނާމް ދިނުމަށް ހަމަޖެހިފައިވަނީ 3 ގިންތިއަކުންނެވެ. އެއީ، އެ އެކެޑެމީ ޝަރަފުގެ ރަން ފަތާއި، ރިހި ފަތާއި ސުވާސާ ފަތުގެ ގިންތިއެވެ.
ދެވަނަ ގިންތިއަކީ މަދަރުސީ ޝަރަފްގެ ގިންތިއެވެ. އެއީ ސާނަވީ އަދި މަތީ ސާނަވީ އިމްތިހާނުން ދިވެހި މާއްދާއިން އޭ ތަރި ހޯދާ ދަރިވަރުންނަށް ދޭ ޝަރަފެކެވެ. މި ޝަރަފުގެ ރަމްޒަކަށް ދެވެނީ ރަން ތަރިއެކެވެ. ތިންވަނަ ގިންތިއަކީ ދިވެހިބަހުގެ އެކެޑެމީއިން ކުރިޔަށް ގެންދާ މުބާރާތްތަކުން އެއްވަނައަށް އަންނަ ފަރާތްތަކަށް ދޭ ޝަރަފެވެ. މި ޝަރަފުގެ ރަމްޒަކަށް ދެނީ ރަން މެޑައްޔެކެވެ.
މި ރަސްމިއްޔާތުގައި އިންފޮމޭޝަން ކޮމިޝަނަރު ޢަބްދުލްޢަޒީޒް ޖަމާލް ޢަބޫބަކުރު ދެއްކެވި ވާހަކާގައިވަނީ، މާދަރި ބަހުގެ ދުވަހާއި ދިވެހި ބަހުގެ ދުވަހުގެ ތަފާތުގެ މައްޗަށް އަލިއްޅުއްވާލައްވާ ވާހަކަ ދައްކަވާފައެވެ. އަބްދުލްޢަޒީޒް ވިދާޅުވީ، ބޮޑެތި ޤައުމުތަކާއި ބޮޑެތި އާބާދީތަކުގައި ބޭނުންކުރާ ބަސްތައް ނެތި ދިއުމުގެ ބިރު ހީވެފައި ވީނަމަވެސް، ދިވެހި ބަސް ހީނަރުވެ އުވިދާނެކަމުގެ ބިރެއް ނެތްކަމަށެވެ.
މި ރަސްމިއްޔާތުގައި ވާހަކަދައްކަވަމުން ދިވެހިބަހުގެ އެކަޑަމީގެ ރައީސް އަޝްރަފް ޢަލީ ވިދާޅުވީ، ދިވެހި ބަހަށް ދިމާވެފައިވާ ދަތިތަކާއި ތުރާތަކުންމިންޖުވުމަށް މިއަދު މަސައްކަތް ކުރަންޖެހިފައިވާކަމަށެވެ. ސަރުކާރުގެ އިދާރާތަކާއި އަމިއްލަ ފަރުދުންނާއި އޮފީސް ތަކުން އަދަޔާ ޚިލާފަށް ޤައުމީ ބަހަށްޓަކައި މަސައްކަތްކުރަން ޖެހިފައިވާކަމަށެވެ. މި ރަސްމިއްޔާތުގައިއެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވީ، ޤައުމީ ބަސް ހިމާޔަތްކޮށް ދިރުވުމަށް ސަރުކާރުން ގިނަ މަސައްކަތަތެކެއް ކުރައްވާކަމަށެވެ.
މި ރަސްމިއްޔާތުގައި ވަނީ ދިވެހި ބަހުގެ ދުވަހާއި ގުޅިގެން ލިއުއްވާފައިވާ ފޮތްތައްވެސް ނެރުއްވައި ދެއްވާފައެވެ. ދިވެހި ބަހުގެ ދުވަހުގެ ގޮތުގައި ފަހަގަކުރަނީ ކޮންމެ އަހަރެއްގެ އޭޕްރީލް މަހުގެ ސާދަވަނަ ދުވަހެވެ. މިދުވަސް ފާހަގަކުރުމަށް ނިންމާފައިވަނީ 2015 ވަނަ އަހަރުއެވެ.