ޓޫރިޒަމް ކުރިއަރުވައި އިންވެސްޓްމަންޓް ހޯދޭނެގޮތަށް ބޭރުގެ މިޝަންތައް ބައްޓަންކުރާނަން: ޒަމީރު

ރާއްޖޭގެ ފަތުރުވެރިކަން ކުރިއަރުވައި އިންވެސްޓްމަންޓްގެ ފުރުޞަތުތައް ހޯދުމަށް، ބޭރު ޤައުމުތަކުގައި ހުރި ރާއްޖޭގެ މިޝަންތަކުން ޚާއްޞަ މަސައްކަތްތަކެއް ކުރައްވާނެކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޚާރިޖީ ވަޒީރު މޫސާ ޒަމީރު ވިދާޅުވީ ރާއްޖޭގެ އިޤްތިޞާދު ކުރިއަރާނެ ގޮތްތައް ހޯދުމަށް ރައީސް އިސްކަންދެއްވައިގެން ގިނަ މަސައްކަތްތަކެއް ކުރައްވާކަމަށެވެ. އެގޮތުން ރައީސް މިހާތަނަށް ރާއްޖެއިން ބޭރަށް ވަޑައިގެންނެވި 3 ޤައުމުގައިވެސް މިކަމަށް މަސައްކަތްތަކެއް ކުރެއްވިކަން ފާހަގަކުރައްވާ ވަޒީރު ވިދާޅުވީ، ރައީސްގެ އިރުޝާދުގެ ދަށުން އެވުޒާރާއާއި، ބޭރު ޤައުމުތަކުގައިހުރި ރާއްޖޭގެ އެމްބަސީތަކާއި މިޝަންތައް ހިމެނޭހެން 19 އޮފީހުން ރާއްޖެއަށް އިންވެސްޓްމަންޓުތައް ހޯދުމަށާއި، ރާއްޖެއަށް އަންނަ ފަތުރުވެރިން އިތުރުކުރުމަށް މަސައްކަތް ކުރައްވާކަމަށެވެ.

"ރައީސް އަޅުގަނޑުމެންނަށް އަންގަވަނީ މިޝަންތަކުގެ މުވައްޒަފުން އަދި އިތުރު މުވައްޒަފުން ބޭނުންކޮށްގެން ރާއްޖޭގެ އިޤްތިޞާދަށް ކުރިއެރުން ލިބޭނެ މަސައްކަތްކުރުމަށް. އިންވެސްޓަރުން ލިބޭނެގޮތަށް މަސައްކަތް ކުރަން. އެކަމަށް އަޅުގަނޑުމެން ބައްޓަންވެ ބަދަލުވަމުން މިދަނީ. އެއާއެއްކޮށް ޑެސްޓިނޭޝަން ޕްރޮމޯޝަން ރާއްޖޭގެ ޓޫރިޒަމް ކުރިއެރުވުމަށްވެސް އިތުރު މަސައްކަތްތައް ކުރާނެ." ޚާރިޖީ ވަޒީރު މޫސާ ޒަމީރު ވިދާޅުވިއެވެ.

ވަޒީރު ވިދާޅުވީ، ރާއްޖޭގެ އިޤްތިޞާދަށް ދިމާވާ ގޮންޖެހުންތައް ދެނެގަނެއް އެކަންކަމުން އަރައިގަތުމަށްވެސް މިޝަންތައް ތައްޔާރަށް އޮތުމަށްވެސް އިސްކަންދެއްވާނެކަމަށެވެ. އެހެންކަމުން ރާއްޖެއިން ބޭރުގައި ހުރި ރާއްޖޭގެ މިޝަންތަކުގެ މުވައްޒަފުންގެ ޢަދަދު އިތުރުކުރައްވައިގެންވެސް އެ މަސައްކަތްކުރައްވާނެކަމަށް ޒަމީރު ވިދާޅުވިއެވެ. މީގެ ކުރިންވެސް އެފަދަ މަސައްކަތްތައް މިޝަންތަކުން ކުރުމަށް ރޭވިނަމަވެސް އެކަންކަން މާބޮޑަށް ކުރެވިފައި ނެތްކަން ވަޒީރު ފާހަގަކުރެއްވިއެވެ.

"ރާއްޖޭގެ ޓޫރިޒަމަށް ބައެއް ފަހަރު ގޮންޖެހުންތައް ކުރިމަތިވޭ. ބައެއް ފަހަރު އަންނަ ބަލިމަޑުކަމުން ނުވަތަ އެހެންވެސް ބައެއް ކަންކަމުން. މިކަންކަމުންވެސް ނުކުމެ އަޅުގަނޑުމެންނަށް އެކުގަ، އިންޑަސްޓްރީއަށް އަންނަ ޝޮކްތައް އޮބްޒާވް ކުރެވޭނެގޮތަށް މިޝަންތައް ރެޑީކުރުން އެއީ ރައީސް ދެއްވާ ލަފައަކީ. އެހެންވީމަ ޔޫރަޕްގަ އަދި އެހެން ޤައުމުތަކުގައި ހުރި ރާއްޖޭގެ މިޝަންތައް އަޅުގަނޑުމެން އެގޮތަށް އިރާދަކުރެއްވިއްޔާ ބައްޓަންކުރާނަން. މިސާލަކަށް ޗައިނާގަ ޓޫރިޒަމް ކުރިއެރުވުމަށްޓަކައި މި އެމްބަސީގަ އަޅުގަނޑުމެން އިތުރު މުވައްޒަފުންލައިގެން މަސައްކަތްކުރާނަން. ޔޫރަޕްގައިވެސް މިޝަންތައް ބޭނުންކޮށްގެން މަސައްކަތްކުރާނެކަމަށް. މިފަދަ ކަންކަން ކުރިން ރޭވިއަސް މާބޮޑަށް ނުކުރެވޭ. އެހެންނަމަވެސް ރައީސްގެ ވިސްނުންފުޅުހުރީ އެގޮތަށް މަސައްކަތްކުރުމަށް." މޫސާ ޒަމީރު ވިދާޅުވިއެވެ.

ވަޒީރު ވަނީ ވަރަށް އަވަހަށް ތުރުކީވިލާތުގައި ރާއްޖޭގެ އެމްބަސީއެއް ހުޅުވާނެކަން ފާހަގަކުރައްވާފައެވެ. އަދި އެ އެމްބަސީ ފުރަތަމަ ހުޅުވޭއިރުވެސް ރާއްޖޭގެ ވިޔަފާރިއާ އިންވެސްޓްމަންޓާއި، ޓޫރިޒަމް ޕްރޮމޯޝަނަށް ޚާއްޞަ މަސައްކަތްތަކެއް ކުރައްވާނެކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަލާވުވެވަޑައިގެން މިހާތަނަށް ވަނީ 3 ޤައުމަކަށް ދަތުރުފުޅު ކުރައްވާފައެވެ. އެއީ ތުރުކީވިލާތާއި، ޔުނައިޓެޑް ޢަރަބް އެމިރޭޓްސް އަދި ޗައިނާއަށެވެ. އެޤައުމުތަކަށް ކުރެއްވި ދަތުރުފުޅުގައި ވަނީ ރާއްޖޭގެ ޓޫރިޒަމް ކުރިއެރުވުމަށާއި، އިންވެސްޓްމަންޓުގެ ފުރުޞަތުތައް އިތުރުކޮށް އެދާއިރާއިން ރާއްޖޭގައި އިންވެސްތްކުރެވޭނެ ގޮތްތަކާއި ގުޅޭގޮތުން މަޝްވަރާކުރައްވާފައެވެ. އަދި އެޤައުމުތަކުގެ ބޮޑެތި އިންވެސްޓަރުން ވަނީ ރާއްޖޭގައި އިންވެސްޓުކުރުމުގެ ޝަޢުގުވެރިކަން ފާޅުކޮށްފައެވެ.