ދުނިޔޭގެ ޞިއްޙަތު ދުވަހާ ގުޅުވައިގެން ދ. ކުޑަހުވަދޫގައި ހިންގި ޙަރަކާތްތަކުގައި 239 މީހުން ހަކުރު ބައްޔަށް ސްކްރީންކޮށްފިއެވެ. ދުނިޔޭގެ ޞިއްޙަތު ދުވަހާއި ގުޅުވައިގެން ޑައިބެޓީސް ސޮސައިޓީ އޮފް މޯލްޑިވްސް އާއި ދ. އަތޮޅު ހޮސްޕިޓަލާއި އަދި އަމިއްލަ ބައެއް ޖަމްޢިއްޔާ ޖަމާޢަތްތައް ގުޅިގެން ކުޑަހުވަދޫގައި ވަނީ ގިނަ ޙަރަކާތްތަކެއް ހިންގާފައެވެ.
ޞިއްޙަތު ދުވަހާ ގުޅުވައިގެން ކުޑަހުވަދޫގައި ހިންގި މިޙަރަކާތްތައް ފަށާފައިވަނީ ގްލޯފިޓްގެ ފަރާތުން ކުޑަހުވަދޫ ރައްޔިތުންނަށް އަމާޒުކޮށް ހިންގި ކަސްރަތު ހަރަކާތަކުންނެވެ. ކުޑަހުވަދޫގައި ހިންގި ޙަރަކާތްތައް އަމާޒުކޮށްފައިވަނީ މިއަހަރުގެ ދުނިޔޭގެ ޞިއްޙަތުދުވަހުގެ ޞިއާރުކަމަށްވާ، "ރައްކާތެރިވަމާ، ފަރުވާކުރަމާ، ހަކުރުބަލީގެ މައްޗަށް ކުރިހޯދަމާ" މިޝިޔާރުގެ މައްޗަށެވެ. މިޙަރަކާތްތަކުގެ ތެރޭގައި 40 އަހަރުން މަތީގެ ފިރިހެނުންނަށް އަމާޒުކޮށް ފުޓްބޯޅަ މެޗެއްވެސް ކުޅެފައިވެއެވެ. ކުޑަހުވަދޫގައި ހިންގި ޙަރަކާތްތަކުގައި ޚާއްޞަ ގޮތެއްގައި ހަކުރުބައްޔާއި ބެހޭގޮތުން ރައްޔިތުން ހޭލުންތެރިކުރުމަށް ތަފާތު ޕްރޮގްރާމްތަކެއް ހިންގާފައިވެއެވެ.
ޞިއްޙީ ދާއިރާގެ ގިނަ ފަރާތްތަކެއް ޝާމިލްވެގެން ކުރިޔަށްދިޔަ މިހަރަކާތްތަކުގައި ޑޮކްޓަރުންވެސް ބައިވެރިވެ ހަކުރުބައްޔާބެހޭ މައުލޫމާތު ޞިއްޙީދާއިރާގެ ފަރާތްތަކާއި ޢާންމު ރައްޔިތުންނަށް ފޯރުކޮށްދީފައިވެއެވެ. މިގޮތުން މިޙަރަކާތްތަކުގައި ބައިވެރި ޑޮކްޓަރުން ވަނީ ހަކުރުބައްޔާމެދު ޢާންމުންގެ މެދުގައި ހުރި ކަނބޮޑުވުންތަކަށް ޖަވާބުދެއްވައި، ހަކުރުބަލިން ރައްކާތެރިވުމަށް އެޅިދާނެ ފިޔަވުތަކާ ބެހޭގޮތުން މަޢުލޫމާތު ދެއްވާފައެވެ.
ކުޑަހުވަދޫގައި ހިންގި ޙަރަކާތްތަކުގައި ބައިވެރިވި ޖަމްޢިއްޔާތައް ކަމަށްވާ މޯލްޑިވްސް މެޑިކަލް އެސޯސިއޭޝަން، ކެންސަރ ސޮސައިޓީ، ސޮސައިޓީ ފޮރ ހެލްތް އެޑިއުކޭޝަން، ޓައިނީ ހާރޓްސް އޮފް މޯލްޑިވްސް އާއި އިދާރާތަކުގެ ގޮތުގައި ބައިވެރި، ދ. އަތޮޅު ހޮސްޕިޓަލާއި، އައިޖީއެމްގެ މެޑިކަލް ޑިޕާޓްމެންޓް އަދި ގްލޯފިޓްގެ ޓީމުން ވަނީ އެ އިދާރާއެއް، ނުވަތަ ޖަމްޢިއްޔާއެއް ޚާއްޞަވެފައިވާ ދާއިރާއަކުން މަޢުލޫމާތު ދިނުމުގެ ސެޝަންތަކެއްވެސް ބާއްވާފައެވެ.
މިފަރާތްތަކުގެ އިތުރުން ކުޑަހުވަދޫގައި ހުރި މުއައްސަސާތަކާ ގުޅިގެން ކުޑަކުދިންނަށް ޚާއްޞަ ކުޅިވަރުތައްވެސް ހިމެނޭގޮތަށް އަދި ޞިއްޙީ މައުލޫމާތުތައްވެސް ލިބޭގޮތަށް ގިނަ ސްޓޯލްތަކެއް ހިމެނޭ ފެއަރއެއްވެސް ބާއްވާފައިވެއެވެ. ދުނިޔޭގެ ޞިއްޙަތުދުވަސް ފާހަގަކުރުމަށް ހިނގި ހަރަކާތްތަކުގެ ތެރެއިން އެންމެ މުހިންމު އެއް ހަރަކާތަކީ ހަކުރުބައްޔަށް ސްކްރީންކުރުމުގެ ހަރަކާތެވެ. ރަށުގެ ދެސަރަހައްދެއްގައި ހަކުރުބައްޔަށް ސްކްރީން ކުރުމުގެ ހަރަކާތް ކުރިޔަށްގެންދިޔައިރު އެސަރަހައްދުތަކަށް ރަށުގެ ގިނަ އަދަދެއްގެ ރައްޔިތުން ޒިޔާރަތްކޮށް ހަކުރުބައްޔަށް ޓެސްޓްކޮށްފައިވެއެވެ.