ރާއްޖެއާއި އިންޑިޔާއާއި ދެޤައުމު ދެމެދު މިއަދު 6 އެއްބަސްވުމެއްގައި ސޮއިކުރައްވައިފިއެވެ.
މި އެއްބަސްވުންތަކުގައި ސޮއިކުރައްވާފައިވަނީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިހާރު އިންޑިޔާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި އެއްބަސްވުންތަކުގައި ސޮއިކުރެއްވުން އޮތީ، އިންޑިޔާގެ ބޮޑުވަޒީރުގެ ރަސްމީ އޮފީސް ހައިދަރުއާބާދު ހައުސްގައެވެ.
މިއަދު ސޮއިކުރެއްވި މިއެއްބަސްވުންތަކުގެ ތެރޭގައި ބައިނަލްއަޤްވާމީ ވައިގެ ދަތުރުފަތުރުން އާމްދަނީގެ ގޮތުގައި ދެފަހަރަށް ޓެކްސް ނެގޭ ނެގުން ހުއްޓާލުމާއި، ޓެކުހުގެ މުޢާމަލާތްކުރުމާއި، ރާއްޖޭގެ މިސްކިތްތައް މަރާމާތުކޮށް ދެގައުމު ގުޅިގެން ތަޙުލީލްކުރުމާއި، ސާރވޭކުރުމަށް އެއްބަސްވުން ހިމެނެއެވެ. އަދި "ސައުތު އޭޝިއާ ސެޓެލައިޓް"ގެ އޯރބިޓް ފްރިކުއެންސީ ކޯޑިނޭޝަނާއި ގުޅޭގޮތުން ދެޤައުމުގެ ދެމެދުގައި ވެވުނު އެއްބަސްވުމުގެ އިތުރުން ފަތުރުވެރިކަމުގެ ދާއިރާއިން ދެޤައުމުން އެއްބާރުލުން ދިނުންވެސް މިއަދު ވެވުނު އެއްބަސްވުންތަކުގެ ތެރޭގައި ހިމެނެއެވެ.
ރައީސުލްޖުމްހޫރިއްޔާ އިންޑިޔާއަށް ކުރައްވަމުން ގެންދަވާ މިދަތުރުފުޅުގައި މިއަދުވަނީ، އިންޑިޔާގެ ބޮޑުވަޒީރު ނަރެންދުރަ މޯދީއާއި ބައްދަލުކުރައްވާ، ރަސްމީ މަޝްވަރާތައް ބާއްވަވާފައެވެ. އެއަށްފަހު އިންޑިޔާގެ ބޮޑުވަޒީރު ދެއްވި ރަސްމީ ފަރިއްކޮޅެއްގައި ރައީސުލްޖުމްހޫރިއްޔާ ބައިވެރިވެ ވަޑައިގެންނެވިއެވެ.
މިދަތުރުފުޅުގައި މިއަދު ހެނދުނު ރައީސުލްޖުމްހޫރިއްޔާ ވަނީ އިންޑިޔާގެ ޚާރިޖީ ވަޒީރު ޝުޝްމާ ސުވަރާޖްޢާއިވެސް ބައްދަލުކުރައްވާފައެވެ. އަދި މިދަތުރުފުޅުގައި މިއަދު ހަވީރުގެ ވަގުތެއްގައި އިންޑިޔާގެ ރައީސް ޕްރަނާބު މުކަރްޖީއާއިވެސް ރައީސް ބައްދަލުކުރައްވާނެއެވެ.