ސަރުކާރުން ކޮންމެ އަހަރަކު ބާއްވަވަމުން ގެންދަވާ ޤުރުއާން މުބާރާތް، އެހެން ޤައުމުތަކުގައިވެސް ބާއްވާގޮތަށް އިންތިޒާމްކުރައްވަން މަސައްކަތްކުރައްވަމުން ގެންދަވާކަމަށް އިސްލާމިކް މިނިސްޓްރީން ހާމަކުރައްވައިފިއެވެ. ސަރުކާރުން ކޮންމެ އަހަރަކު ބާއްވަވާ ޤުރުއާން މުބާރާތް ބާއްވަވަނީ ސްކޫލްތައް ވާދަކުރާ ދަރިވަރުންގެ މުބާރާތެއްގެ ގޮތުގައެވެ. އެހެންނަމަވެސް މި މުބާރާތުގައި ބައިވެރިވާ ކޮންމެ ކުއްޖަކުވެސް އެ ކުއްޖަކު ވާދަކުރަނީ ޤައުމުގެ އެހެން މޮޅު ދަރިވަރުންނާކަން އިޙްސާސްކުރެވި އެ ވާދަވެރިކަމަށް މުބާރާތް ބަދަލުކުރައްވަން ބޭނުންފުޅުވާކަމަށް އިސްލާމިކް މިނިސްޓްރީން ވިދާޅުވިއެވެ.
ސަރުކާރުން ކޮންމެ އަހަރަކު އެއްފަހަރު އަހަރީ ޤުރުއާން މުބާރާތެއް ބާއްވަމުން ގެންދަވާތާ ތިރީސް އަހަރު ވަނީ ފާއިތުވެފައެވެ. މުބާރާތަށް އެކި ދުވަސްވަރު އެކި ކަހަލަ ބަދަލުތައް ވަނީ ގެންނަވާފައެވެ. އޭގެތެރޭގައި މުބާރާތް ބޭއްވުމުގައި ވާދަކުރެވޭ އުޞޫލަށް ގެންނަވާފައިވާ ބަދަލުތަކާއި ޢުމުރުފުރާގެ ވާދަވެރިކަމަށް ގެންނެވި ބަދަލުތަކާއި އިދާރީ އުޞޫލުތަކަށް ގެންނެވި ބަދަލުތައްވެސް ފާހަގަކުރެވެއެވެ.
މިނިސްޓްރީ އޮފް އިސްލާމިކް އެފެއަރޒުން ވިދާޅުވާ ގޮތުގައި މި މުބާރާތަކީ، ދުނިޔޭގެ އެހެން ޤައުމުތަކުގައިވެސް ޤައުމީ މުބާރާތްތައް ބާއްވާ އުޞޫލުތަކާއި މިންގަނޑުތަކަށް މި މުބާރާތް ބޭއްވެވުމަށް ވަނީ އަމާޒުކުރައްވާފައެވެ. އެއް ސްކޫލް އަނެއް ސްކޫލާ ވާދަކުރުމަށްވުރެ ބޮޑަށް ކޮންމެ ކުއްޖަކީވެސް ޤުރުއާން ކިޔެވުމުގެ ޤައުމީ މުބާރާތެއްގައި ޤައުމުގައި ތިބި އެ ކެޓަގަރީއެއްގެ އެހެން މޮޅު ދަރިވަރުންނާ ވާދަކުރާ އުޞޫލަށް މިބަދަލު ގެންނެވުމަށް ވަނީ ކަނޑައަޅުއްވާފައެވެ. މިހިނގާ 2016 ވަނަ އަހަރު ބާއްވަވާ ޤުރުއާން ކިޔެވުމުގެ ޤައުމީ މުބާރާތްވެސް ބާއްވަވާނީވެސް މި އުޞޫލުން ކަމަށް އިސްލާމިކް މިނިސްޓްރީން ހާމަކުރައްވައެވެ. އިސްލާމިކް މިނިސްޓަރުގެ ނާއިބު އިބްރާހީމް އަޙްމަދު ވިދާޅުވި ގޮތުގައި، މިފަހަރުގެ މުބާރާތް އަމާޒުކުރައްވާފައިވަނީ ރާއްޖޭގެ އަތޮޅު ކައުންސިލްތަކަށާއި، ކުލަބް ޖަމްޢިއްޔާތަކަށެވެ. މިފަހަރުގެ މުބާރާތުގައި ކިޔަވަންޖެހޭ ފޮތްތަކުގެ ޢަދަދު އިތުރުވެފައި މުބާރާތް ބެހިފައިވާ ބައިތައް މަދުވެގެންދާނެކަމަށް އިބްރާހީމް އަޙްމަދު ވިދާޅުވިއެވެ. އިސްލާމިކް މިނިސްޓަރުގެ ނާއިބު ވިދާޅުވީ، މުބާރާތުގައި ބައިވެރިވާ ބައިވެރިންގެ ޢަދަދުވެސް މަދުވާނެކަމަށާއި، އެންމެ ދަށްކޮށް މުބާރާތުގައި ހިތުން ކިޔެވުމުގެ ބައިގައި ބައިވެރިވެވޭނީ ފަސް ފޮތް ހިތުން ދަސްކޮށްގެންކަމަށެވެ. މުޅި ރާއްޖެއަށް ހުޅުއްވާލައްއިގެން ބާއްވަވާ މި މުބާރާތުގެ ބަލައިގެން ކިޔެވުމުގެ ގޮފި ބައްސަވާލައްވާފައި ވަނީ 3 ބަޔަކަށެވެ. އެއީ ބަލައިގެން 10 ފޮތް، 20 ފޮތް އަދި މުޅި ޤުރުއާން ކިޔެވުމުގެ ބައެވެ. އަދި ހިތުން ކިޔެވުމުގެ ބައިތައް ބައްސަވާލައްވާފައިވާ ތިން ބަޔަކީ، ހިތުން 5 ފޮތް، 10 ފޮތް އަދި 15 ފޮތް ކިޔެވުމެވެ. މިފަހަރުގެ މުބާރާތް އިންތިޒާމް ކުރައްވާފައިވަނީ ފުރަތަމަ އަތޮޅު ކައުންސިލްތަކާއި ކުލަބު ޖަމިއްޔާތަކުން މުބާރާތް ބޭއްވެވުމަށްފަހު ހޮވާލެވޭ އެންމެ ރަނގަޅު 2 ބައިވެރިން ކޮންމެ ކެޓަގަރީއަކުން ޤައުމީ މުބާރާތުގައި ބައިވެރިކުރާގޮތަށެވެ. މިބަދަލު ގެންނެވީ މުބާރާތުގެ ފެންވަރު މަތިކުރައްވައި ބައިނަލްއަޤްވާމީ މުބާރާތްތަކަށް ދަރިވަރުން ފޮނުވުމަށް ތައްޔާރުކުރެއްވުމުގެ ގޮތުންކަމަށް އިބްރާހީމް އަޙްމަދު ވިދާޅުވިއެވެ. ރާއްޖެއަށް ބައިނަލްއަޤްވާމީ މުބާރާތްތަކުން ގިނަ ފުރުޞަތު ލިބޭކަން ފާހަގަކުރައްވައި، މިފަހަރުގެ މުބާރާތުގައި މުދައްރިސުންނަށާއި، ހަގު އަދި ދޮށީ ޢުމުރުގެ މީހުންނަށް ބައިވެރިވެވޭނެކަމަށް އޭނާ ވިދާޅުވިއެވެ.
އިސްލާމިކް މިނިސްޓްރީން ވިދާޅުވީ، ސްކޫލްކުދިންގެ ޤުރުއާން މުބާރާތް ބޭއްވެވުމަށް މަޝްވަރާކުރެވެމުން އަންނަކަމަށާއި، އެ މުބާރާތް މިއަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު ބޭއްވޭނެކަމަށް ލަފާކުރެވޭކަމަށެވެ.
މިއަހަރު ބާއްވަނީ ޤުރުއާން ކިޔެވުމުގެ 31 ވަނަ ޤައުމީ މުބާރާތެވެ.