ރާއްޖޭގެ އިޤްޞާދު ކުރިއެރުވުމުށް ސަރުކާރުން ކުރިއަށްގެންދަވާ މަޝްރޫޢުތަކުގެ ދަށުން، ތިލަފުށީގައި ޓްރާންސްޝިޕްމަންޓް ބަނދަރެއް ތަރައްޤީކުރުމުގެ މަސައްކަތް ވަރަށް އަވަހަށް ފެށިގެންދާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވިދާޅުވެއްޖެއެވެ.
އިބްރާހިމް ނާޞިރު އިންޓަރނޭނޝަނަލް އެއަރޕޯޓް ތަރައްޤީކުރުމުގެ އަމަލީ މަސައްކަތް ފެއްޓެވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވިދާޅުވީ، ގުޅިލާމެހިފައިވާ ނިޒާމެއްގެ ތެރެއިން ރާއްޖޭގެ އެއަރޕޯޓްތަކާއި އެއް ފެންވަރަށް ޕޯޓްތައްވެސް ތަރައްޤީކުރެވިއްޖެނަމަ، ރާއްޖެއަށް ވަންނަ ޢާމްދަނީގެ ނިސްބަތް އަހަރެއްގެ މައްޗަށް އެތައް ގުނައެއް އިތުރުވެގެންދާނެކަމަށެވެ. އެގޮތުން މާލޭގެ ބަނދަރު ތޮއްޖެހި، މިފަދަ މަސައްކަތެއް ކުރާނެ އިތުރު ޖާގަ ނެތުމުގެ ސަބަބުން، ބޭރުގެ ފަރާތެއްގެ އެހީތެރިކަމާއެކު ތިލަފުށީގައި ވަރަށް އަވަހަށް ޓްރާންސްޝިޕްމަންޓް ބަނދަރެއް ހެދިގެންދާނެ ކަމަށް އެމަނިކުފާނު ވިދާޅުވިއެވެ.
img:http://s2.psmnews.mv/images/660x400/14599809918230.jpg|އިބްރާހިމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރުމުގެ އަމަލީ މަސައްކަތް ފެއްޓެވުމަށް ބޭއްވި ރަސްމިއްޔަތުގެ ތެރެއިން / ފޮޓޯ: ރައީސް އޮފީސް
ރައީސް ޔާމިން ވިދާޅުވީ، ތިލަފުށި މެދުވެރިކޮށް ރާއްޖެއަށް އެތެރެ ކުރެވިގެން އަންނަ ކާގޯ އެއަރޕޯޓަށް ގެންދެވި އެއަރ ކާގޯގެ ގޮތުގައި ރާއްޖެއިން ބޭރަށް ފޮނުވޭނޭ ފުރުޞަތު ލިބިގެންދާނެ ކަމަށެވެ.
ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވިދާޅުވީ، މާލޭ ސިޓީގެ ތޮއްޖެހުން ކުޑަކުރުމުގެ ގޮތުން މާލޭ ޓީ-ޖެޓީ ސަރަހައްދުގައި ތަރައްޤީކުރާ އިންޑަސްޓްރިއަލް ވިލެޖްގެ މަސައްކަތް މިއަހަރުގެ ޖުލައި 26 ގެ ނިޔަލަށް ނިންމުމަށް ސަރުކާރުން މަސައްކަތް ކުރައްވަމުންދާކަމަށެވެ. އަދި ތަރައްޤީވެފައިވާ ތަނެއްގައިވެސް ކުނި ނައްތާލާ، ކުނި އެއް ކުރެވޭނެ ނިޒާމެއް ތަރައްޤީކުރެވިދާނެކަން މިތަނުގެ މަސައްކަތް ނިމިގެންދިއުމުން އާއްމުންނަށް ފެނިގެންދާނެކަމަށް އެމަނިކުފާނު ވިދާޅުވިއެވެ.
ރާއްޖޭގެ އިޤްތިޞާދު ތަރައްޤީކުރުމަށް ސަރުކާރުން ކުރިއަށްގެންދަވާ ބޮޑެތި މަޝްރޫޢުތަކުގެ ސަބަބުން، ވަޒީފާގެ ފުރުސަތުތައް އިތުރުވަމުންދާއިރު، މިފަދަ ވަޒީފާތަކަށް ކުރިމަތިލެއްވުމަށް ދިވެހި ޒުވާނުންނަށް ރައީސް ޔާމިން ވަނީ ގޮވާލައްވާފައެވެ.
img:http://s1.psmnews.mv/images/660x400/14599809771724.jpg|އިބްރާހިމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރުމުގެ އަމަލީ މަސައްކަތް ފެއްޓެވުމަށް ބޭއްވި ރަސްމިއްޔަތުގެ ތެރެއިން / ފޮޓޯ: ރައީސް އޮފީސް
އެގޮތުން އެއަރޕޯޓާއެކު، ފަތުރުވެރިކަމަށް ސަރުކާރުން ފާއިތުވި 2 އަހަރު ދުވަހު ތެރޭ ދޫކޮށްފައިވާ 70 އަށްވުރެ ގިނަ ރިސޯޓާއެކު ރާއްޖޭގެ ފަތުރުވެރިކަމުގެ ސިނާޢަތުން، އެތައް ވަޒީފާތަކެއް އުފެދިގެންދާއިރު، މިވަޒީފާތަކަށް ޤާބިލު ޒުވާނުން ބިނާކުރެއްވުމަށް ޓޫރިޒަމް މިނިސްޓްރީއާއި އެޑިއުކޭޝަން މިނިސްޓްރީން ގުޅިގެން މަސައްކަތް ކުރައްވަމުންދާކަން ރައީސް ފާހަގަކުރެއްވިއެވެ.