ދިވެހިރާއްޖެއާ ބޮޓްސްވާނާއާ ދެމެދު ސިޔާސީ ގުޅުން ޤާއިމުކުރުމުގެ އެއްބަސްވުމުގައި ސޮއިކޮށްފިއެވެ.
މިއެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވުޒާރާގެ ސެކެޓްރީ، ބައިލެޓެރަލް، ހާލާ ހަމީދެވެ. އަދި ބޮޓްސްވާނާގެ ފަރާތުން ސޮއިކުރެއްވީ އެޤައުމުގެ ޚާރިޖީ ވަޒީރު ޑރ. ލެމޯހަންގް ކްވާޕޭއެވެ.
އެއް ޤައުުމު އަނެއް ޤައުމަށް އިޙްތިރާމް ކުރާ ޤައުމުތަކާ ހަރުދަނާ ގުޅުންތަކެއް ޤާއިމުކުރުމަކީ ދިވެހި ޚާރިޖީ ސިޔާސަތުގެ މުހިއްމު އަސާސެކެވެ. އެގޮތުން، ބޮޓްސްވާނާއާ ސިޔާސީ ގުޅުން ޤާއިމުކުރުމަކީ ދެ ޤައުމުގެ މަސްލަހަތު އޮންނަ ދާއިރާތަކުން އެއް ލަނޑުދަނޑިތަކެއް ހާސިލުކުރުމަށް އިތުރަށް އެއްބާރުލުން ދިނުމަށް މަގުފަހިކޮށްދޭނެ ކަމެއްކަމަށް ޚާރިޖީ ވުޒާރާއިން ވިދާޅުވިއެވެ.
ބޮޓްސްވާނާ އަކީ ދެކުނު އެފްރިކާގައި އޮންނަ، ގާތްގަނޑަކަށް 2.6 މިލިއަން މީހުންގެ އާބާދީއެއް އޮންނަ ޤައުމެކެވެ. މިއީ ޜާއްޖެއިން ސިޔާސީ ގުޅުން ޤާއިމުކުރި 186ވަނަ ޤައުމެވެ.