ކުނި މެނޭޖުކުރަން ބޭނުންކުރާ އާލައްތައް 4 އަތޮޅެއްގެ 45 ރަށަކަށް!

ކުނި މެނޭޖުކުރުމަށް ބޭނުންކުރާ އާލާތްތައް 4 އަތޮޅެއްގެ 45 ރަށަކަށް ފޯރުކޮށްދިނުމުގެ މަސައްކަތް ކުރުމަށް ބޭރުގެ ކުންފުންޏަކައެކު އެއްބަސްވުމެއްގައި ސޮއިކުރައްވައިފިއެވެ.

މިއެއްބަސްވުމުގައި ސޮއިކުރައްވާފައިވަނީ މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއާއި އިންޑިއާ ކުންފުންޏެއް ކަމަށްވާ ލަކީ ގްލޯބަލް ޕްރޮޖެކްޓް ޕްރައިވެޓް ލިމިޓެޓާ ދެމެދުގައެވެ. އެއްބަސްވުމުގެ ދަށުން ނ، ރ، ބ، ޅ މިއަތޮޅުތަކުގެ 45 ރަށަކަށް ރަށުފެންވަރުގައި ކުނި މެނޭޖުކުރުމަށް ބޭނުންކުރާނެ އާލާތްތައް ފޯރުކޮށްދޭނެއެވެ.

މިއީ ވަރލްޑް ބޭންކުގެ ހިލޭ އެހީގައި ތިމާވެއްޓާބެހޭ ވުޒާރާއިން ހިންގަވަމުންދާ "މޯލްޑިވްސް ކްލީން އެންވަޔަރަންމަންޓް ޕްރޮޖެކްޓް"ގެ ދަށުން ކުރިއަށްދާ މަޝްރޫޢެކެވެ. މިމަޝްރޫޢުގެ ޖުމުލަ އަގަކީ 12.9 މިލިޔަން ދިވެހި ރުފިޔާއެވެ. މި އެއްބަސްވުމުގައި މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޠާރިޤް އިބްރާހީމެވެ. އަދި "ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓެޑް"ގެ ފަރާތުން ސޮއިކުރެއްވީ އަލީ ޝިއާނެވެ.

ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤް އިބްރާހީމް ވިދާޅުވީ ކުނި މެނޭޖުކުރުން ހަރުދަނާކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުގެ 14ހަފްތާގެ އެޖެންޑާގައި އިސްކަމެއް ދެއްވާފައިވާ ދާއިރާއެއްކަމަށެވެ. އެހެންކަމުން މިމަޝްރޫޢަކީ ވަރަށް ބޭނުންތެރި މުހިންމު މަޝްރޫޢެއްކަން ވަޒީރު ވާހަގަކުރެއްވިއެވެ.

"ރައީސުލްޖުމްހޫރިއްޔާގެ ހަފްތާ 14ގެ ޕްލޭންގައި އަޅުގަނޑުމެން އިތުރަށް ހުންނާނެ އެހެން ބައިވަރު މަސައްކަތްތަކެއް ރާވާފައި. އެހެންވީމާ، އެކަންތައްތައް ކުނިމެނޭޖްކުރުމުގެ ދާއިރާއިން ކުރަން ހުރި ބައެއްކަންތައްތަކުގެ ތެރޭގައި ތަފްސީލީ މަގުޗާޓެއް ކުރަހައި ރަށްރަށަށް ބޭނުންވަނީ ކޮންކޮން ކަންތައްތައްކެއްތޯ ބަލާނެ." ވަޒީރު ވިދާޅުވިއެވެ.

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވީ 45 ރަށަކަށް ފޯރުކޮށްދޭން ކަނޑައަޅާފައިވާ ކުނިމެނޭޖުކުރާ އާލާތްތަކުގެތެރޭގައި އެކި ބާވަތްތަކުގެ ކުނި ރައްކާތެރިގޮތުގައި ނައްތާލުމަށް ބޭނުންކުރާ މެޝިނަރީޒްއާއި އެހެންވެސް އާލާތްތައް ހިމެނެއެވެ. މި އާލާތްތައް ފޯރުކޮށްދިނުމުގެ މަޝްރޫޢަކީ 4 މަސްދުވަހުގެ މުއްދަތެއްގެ ތެރޭގައި މުޅިން ނިންމައި ފުރިހަމަކުރުމަށް ހަމަޖެހިފައިވާ މަޝްރޫޢެކެވެ.

ތިމާވެއްޓާބެހޭ ވުޒާރާއިން ވިދާޅުވީ މިމަޝްރޫޢުގެ ސަބަބުން ކުނީގެތެރޭގައި ހިމެނޭ ދަގަނޑު، ޕްލާސްޓިކު، ކަރުދާސް ފަދަ ކުނިތައް ވަކޮށް ރައްކާތެރި ޒަމާނީ ނިޒާމެއްގެ ދަށުން ރަށްރަށުން ބޭރުކުރުމަށް މަގުފަހިވާނެކަމަށެވެ.

އެ ވުޒާރާއިން ވިދާޅުވީ މިމަޝްރޫޢުގެ އިތުރުންވެސް ރަށްރަށުގައި ކުނި އުފުލުމަށް ބޭނުންވާ އުޅަނދުތަށްވެސް ހޯދުމުގެ މަސައްކަތް އެވުޒާރާއިން ފަށާފައިވާކަމަށެވެ. އެގޮތުން މިހާރު އެ ވުޒާރާއިން ފަށާފައިވާ މަސައްކަތްތަކުގެ ތެރެއިން ރާއްޖޭގެ މީހުންދިރިއުޅޭ ހުރިހާ ރަށަކަށްވެސް އުޅަނދުތައް ފޯރުކޮށްދެއްވާނެކަމަށް ވިދާޅުވެފައިވެއެވެ.