އެމްއޭސީއެލްގެ މެރިޓް އެވޯޑް ސީއެޗްއެސްއީގެ 4 ދަރިވަރަކަށް

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްގެ މެރިޓް އެވޯޑު ސެންޓަރ ފޮރ ހަޔަރ ސެކަންޑްރީ އެޑިއުކޭޝަން، ސީ.އެޗް.އެސް.އީގެ 4 ދަރިވަރަކަށް ދީފިއެވެ.

އެމް.އޭ.ސީ.އެލް މެރިޓް އެވޯޑަކީ ކުންފުނީގެ އިޖްތިމާއީ ޒިންމާގެ ދަށުން ސީ.އެޗް.އެސް.އީގެ ގްރޭޑް 11 ނިންމާ ދަރިވަރުންގެ ތެރެއިން އެންމެ މަތީ މާކްސް ހޯދާ އަންހެން 2 ދަރިވަރަކަށާއި ފިރިހެން 2 ދަރިވަރަކަށް ދޭ އެވޯޑެކެވެ.

ސީއެޗްއެސްއީގެ 4 ދަރިވަރުންނަށް މެރިޓް އެވޯޑް ދިނުމަށް ސީ.އެޗް.އެސް.އީގައި ވަނީ ޚާއްސަ ރަސްމިއްޔާތެއް ބާއްވާފައެވެ.

އެވޯޑު ލިބުނު ހަތަރު ދަރިވަރުންނަށް އެވޯޑު ހަވާލުކޮށްދެއްވީ އެމް.އޭ.ސީ.އެލްގެ ސީ.އީ.އޯ އަދި މެނޭޖިން ޑިރެކްޓަރ އިބްރާހިމް ޝަރީފް މުހައްމަދެވެ.

މިއަހަރު އެވޯޑު ހާސިލްކުރި 4 ދަރިވަރުން:

* އިބްރާހިމް ރިފާއު
* ހަސަން ލާޔާން މުހައްމަދު
* އަފާފް އަހުމަދު މުސްތަފާ
* އައިޝަތު އީޝަލް އަހުމަދު އަސްލަމް

މެރިޓް އެވޯޑް ދިނުމަށް ބޭއްވި ރަސްމިއްޔާތުގައި ވާހަކަދައްކަވަމުން އެމް.އޭ.ސީ.އެލްގެ ސީ.އީ.އޯ އަދި އެމް.ޑީ އިބްރާހިމް ޝަރީފް މުހައްމަދު ވިދާޅުވީ މިއެވޯޑަކީ އެމް.އޭ.ސީ.އެލްގެ އިޖްތިމާއީ ޒިންމާގެ ދަށުން ރާއްޖޭގެ ތައުލީމް ކުރިއެރުވުމަށް ކުންފުނިން ކުރާ ހޭދައެއްކަމަށެވެ. މިކަމުގެ ސަބަބުން ދަރިވަރުންނަށް ކިޔެވުމުގައި އައު ހިތްވަރެއް ލިބިގެންދާނެކަމަށް އުއްމީދު ކުރައްވާ ކަމަށް އިބްރާހިމް ޝަރީފް ވިދާޅުވިއެވެ.

ވެލާނާ އިންޓަރނޭޝަނަލް އެއަރޕޯޓުގައި ހުރި ވަޒީފާގެ ފުރުސަތުތައް ފާހަގަކުރައްވަމުން ޝަރީފް ވިދާޅުވީ އެއަރޕޯޓުގައި މިވަގުތު ކުރިއަށްގެންދެވޭ ތަރައްގީގެ މަޝްރޫއުތަކަށް ގިނަ އަދަދެއްގެ މުވައްޒަފުން ބޭނުންވާކަމަށާއި ކުރިމަގުގައި ސީ.އެޗް.އެސް.އީ ނިންމާ ދަރިވަރުން އެ ވަޒީފާތަކަށް ކުރިމަތިލާނެ ކަމަށް އުއްމީދު ކުރައްވާކަމަށެވެ. އަދި ކުރިއަށް އޮތްތާގައި ކުންފުނީގައި ހުރި ވަޒީފާތަކަށް މުވައްޒަފުން ހޯދުމުގެ ގޮތުން ސްކޫލް ނިންމާ ދަރިވަރުންނަށް ޚާއްސަކުރެވޭ އިންޓަރންޝިޕް ޕްރޮގްރާމެއް ތައާރަފްކުރެވި އެ ފުރުސަތު ހުޅުވާލައްވާނެ ކަމަށްވެސް ޝަރީފް ވިދާޅުވިއެވެ.

"އަޅުގަނޑުމެންނަކީ އެކަކު އަނެކަކަށް އިހްތިރާމްކުރާ މުޖްތަމައުން ބަލައިގަންނަ، ތެދުވެރި ބައެއް ކަމުގައި އެބަ ވާންޖެހޭ. އެހެންވީމަ އަޅުގަނޑުގެ ނަސޭހަތަކީ ސީއެޗްއެސްއީގެ ހުރިހައި ދަރިވަރުންނަކީވެސް މިކަންކަން ހަމައެކަނި އަޅުގަނޑުމެން ތިއަރެޓިކަލް ސަބްޖެކްޓްތައް ކިޔެވުމުގެ ބަދަލުގައި މީހާގެ ތެދުވެރިކަމާއި މަސައްކަތުގެ އަޚުލާގާއި ވަގުތައް ކަމޭހިތުމާއި މިކަންކަން އަށަގަނެގެން ނިކުންނާނެ ކުދިބަޔަކަށްވުން،. އޭރުން ތިކުދިން ގޮއްސަ ގުޅޭ ކުންފުންޏަކަށް ނުވަތަ އޮފީހަކަށް ވަރަށް މުހިންމު ކުދިންތަކަކަށްވާނެ." އިބްރާހިމް ޝަރީފް ވިދާޅުވިއެވެ.

މިއެވޯޑާއެކު ދަރިވަރުންނަށް ލެޕްޓޮޕްގެ އިތުރުން، ޑާޓާ ޕެކޭޖް އަދި ކޮންމެ މަހަކު 2000 ރުފިޔާގެ އެލަވަންސެއް އެއްއަހަރު ދުވަހަށް ލިބޭނެއެވެ. އަދި މިއެވޯޑު ލިބުނު ދަރިވަރުންނަށް އެމްއޭސީއެލްއިން ހިންގަމުން އަންނަ ވެލާނާ އިންޓަރނޭޝަނަލް އެއަރޕޯޓުގައި އެކުއްޖަކު ޝައުގުވެރިކަން ހުރި ދާއިރާއަކުން މަސައްކަތުގެ ތަޖުރިބާއާއި ތަމްރީނު ހޯދުމުގެ ފުރުސަތު ފަހިވެގެންދާނެ ކަމަށް އެކުންފުނިން ވަނީ ބުނެފައެވެ.

އެވޯޑް ދިނުމުގެ ހަފްލާގައި ސީ.އެޗް.އެސް.އީގެ އިސްވެރިންގެ އިތުރުން ގްރޭޑް 11ގައި މިވަގުތު ކިޔަވަމުންދާ ދަރިވަރުން ބައިވެރިވިއެވެ.