މަސްވެރިންގެ އަޑުއަހައިގެން މައްސަލަތައް ހައްލުކުރެއްވުމަކީ ރައީސް އެންމެ އިސްކަންދެއްވާ ކަންތައް: ޝިޔާމް

މަސްވެރިންނަށް ލިބޭ އާމްދަނީ އިތުރުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިވަގުތު އެންމެ ބޮޑު އިސްކަމެއްދެއްވައިގެން ކުރައްވާ މަސައްކަތްކަމަށް، މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ މީސްމީޑިއާގައި ވަޒީރަށް އެޑްރެސްކޮށް މަސްވެރިއަކު ފޮނުވާފައިވާ ސިޓީއަކަށް ޖަވާބުދެއްވަމުންނެވެ.

މަސްވެރިކަމާ ބެހޭ ވަޒީރަށް އެޑްރެސްކޮށް ސޯޝަލް މީޑިއާގައި މަސްވެރިއަކު ޢާންމުކުރި ސިޓީއެއްގައި ވަނީ ކުރީ ސަރުކާރުގައިވެސް މަސްވެރިންނަށް ގިނަ ވަޢުދުތަކެއްވެ ނުފުއްދޭކަން ފާހަގަކޮށްފައެވެ. ސިޓީގައި ބުނެފައިވަނީ މަސްވެރިން ތިބީ އަނގަޔާ އަތާ ދިމާނުވެކަމަށާއި، ކުދިންގެ ޓިއުޝަންފީއާއި، އިންޓަރވަލާއި، ޤުރުއާން ކުލާސްތަކުގެ ފީ އަދި ބިލްތައް ނުދެއްކިކަމަށެވެ. އަދި އެ ސިޓީގައި، ރިޔާސީ އިންތިޚާބުގައި މިހާރުގެ ރައީސް ޑރ. މުޙައްމަދު މުޢިއްޒު މަސްވެރިންނާ ގުޅޭގޮތުން ދައްކާފައިވާ ވާހަކަފުޅުތަކާއި، ވެވަޑައިގެންފައިވާ ވަޢުދުތައް ވަޒީރަށް ހަނދާންކޮށްދީފައިވެއެވެ.

ސޯޝަލް މީޑިއާގައި މި ސިޓީއަށް ޖަވާބުދެއްވަމުން މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވަނީ ސޯޝަލްމީޑިއާ މެދުވެރިކޮށް އެތައް މަސްވެރިންނެއްގެ ޙައްޤުގައި އުފުލީތީ ޝުކުރު އަދާކުރައްވާފައެވެ. އަދި މި ކަންބޮޑުވުމަކީ ރައީސުލްޖުމުހޫރިއްޔާވެސް މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތްޕުޅުކުރައްވަމުން ގެންދަވާ ކަންބޮޑުވުންތަކެއްކަމަށް ވަޒީރު ވިދާޅުވިއެވެ.

ޝިޔާމް ވަނީ މި ސަރުކާރަކީ ދައްކާ ވާހަކަ ހަނދާންނައްތާލާނެ ބައެއްނޫންކަމުގެ ޔަޤީންކަން ދެއްވާފައެވެ. މަސްވެރި ސިނާޢަތުގައި ހުރި ގޮންޖެހުންތަކަށް ދާއިމީ ހައްލެއް ރައީސް ޑރ.މުއިއްޒުގެ ސަރުކާރުގައި ލަސްތަކެއްނުވެ ހޯދައިދެއްވާނެކަމަށް ވަޒީރު ވިދާޅުވިއެވެ. އެމަނިކުފާނުގެ އަމާޒަކީ މަސްވެރިންގެ އަޑު ގާތުން އަހައިގެން ޖުމްލަ ހައްލަށް މަސައްކަތްކުރުންކަމަށް ވަޒީރު ވަނީ ވިދާޅުވެފައެވެ.

ދާދިފަހުން ވަނީ މަސްވެރިންގެ އަތުން ގަނެފައިވާ މަހަށް ނުދެވި ހުރި ފައިސާ ދެއްކޭނެގޮތެއް ހަމަޖެއްސުމާއި ގުޅޭގޮތުންވެސް މާލީ ވަޒީރާއި މަސްވެރިކަމާއި ބެހޭ ވަޒީރު ބައްދަލުކުރައްވާ މަޝްވަރާވެސް ކުރައްވާފައެވެ.

މަސް ކިލޯއެއްގެ އަގު ވިހި ރުފިޔާއަށްވުރެ ދަށް ނުކުރުމާއި، ކަންނެލި ކިލޯއެއްގެ އަގު 85 ރުފިޔާއަށް މަތިކުރެއްވުމަކީ ރައީސް ޑރ. މުޙައްމަދު މުޢިއްޒުގެ ވަޢުދުފުޅެކެވެ.