ދާންދޫ ކައުންސިލާ ވަޒީރު ބައްދަލުކުރެއްވުން، ދެއްވީ ގޮންޖެހުންތައް ހައްލުކޮށްދެއްވާނެކަމުގެ ޔަޤީންކަން

ކައުންސިލަށް ދިމާވެފައިވާ ގޮންޖެހުންތައް ޙައްލުކުރުމާއި ގުޅޭގޮތުން، ގއ. ދާންދޫ ކައުންސިލާއި، ސިޓީތަކާއި އިދާރީ ދާއިރާތައް ހިންގުމާއި، ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ބައްދަލުކުރައްވާ މަޝްވަރާކުރައްވައިފިއެވެ. މިސަރުކާރުގެ އެންމެ މުހިންމު އެއް ސިޔާސަތަކީ ކައުންސިލްތަކަށް ދިމާވާ ގޮންޖެހުންތައް ނައްތާލައި، ކައުންސިލްތައް ބާރުވެރިކޮށް، ރައްޔިތުންނާ ވީހާވެސް ގާތުން މަސައްކަތްކުރާ ތަންތަނަށް ހެދުމެވެ. އެކަމަށްޓަކައި ކުރެއްވި އެއް މަސައްކަތަކީ އެކަމަށް ޚާއްޞަ ވުޒާރާއެއް އުފެއްދެވުމެވެ.

ގއ. ދާންދޫ ކައުންސިލްގެ މެންބަރުންނާއި ބައްދަލުކުރެއްވުމަށްފަހު، ކައުންސިލްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވީ، ކައުންސިލް ބާރުވެރިކުރުވުމާއި ގުޅޭގޮތުން މަޝްވަރާކުރެއްވިކަމަށެވެ. މީގެއިތުރުން ކައުންސިލްގެ މަސައްކަތްތަކަށް ކުރިމަތިވާ ގޮންޖެހުންތަކާއި ބެހޭގޮތުން ޚިޔާލުބަދަލުކޮށްފައިވާކަމަށްވެސް ވަޒީރު ވިދާޅުވިއެވެ.

މި ބައްދަލުވުމުގައި ގއ. ދާންދޫ ކައުންސިލްގެ ރައީސްއާއި ނައިބު ރައީސްގެ އިތުރުން އެ ކައުންސިލްގެ ބައެއް މެންބަރުން ވަނީ ބައިވެރިވެވަޑައިގެންފައެވެ.

Ga. Dhaandhoo Council ge Raees aai Naibu Raees aai adhi baeh members aai eku miadhu badhdhalukoh, council baaruveri kuruvumaai gulheygothun mashvaraa kurin. Council ge masakkathah kurimathivaa gonjehunthaa beheygothun khiyaalu badhalu kurin. E council in ekulavaalaafaivaa baeh… pic.twitter.com/yFrddAGUns

— Adam Shareef Umar (@Adamshareefz) November 26, 2023

މި ބައްދަލުވުމުގައި ގއ. ދާންދޫ ކައުންސިލުން ވަނީ އެ ކައުންސިލުން އެކުލަވާލާފައިވާ ބައެއް އުސޫލުތައް ވަޒީރު އާދަމް ޝަރީފް އުމަރާއި ހިއްސާކުރައްވާފައެވެ.

ދާންދޫ ކައުންސިލްގެ ގިނަ މެންބަރުން ސަރުކާރު ހިންގާ ޕީއެންސީއައި ގުޅިވަޑައިގެންފައިވާކަމަށްވެސް ވަޒީރު ވިދާޅުވިއެވެ. ވަޒީރު ވިދާޅުވީ، މިކަމުން ހާމަކޮށްދެނީ ޑރ. މުއިއްޒުގެ ވެރިކަން ދެމެހެއްޓުމަށް ކައުންސިލްތަކުގެ އެއްބާރުލުން ލިބޭނެކަމުގެ ޔަޤީންކަންކަން ވަޒީރު ވަނީ ވިދާޅުވެފައެވެ.

ފަސް މެންބަރުން ހިމެނިވަޑައިގަންނަވާ ދާންދޫ ކައުންސިލުގެ ތިން މެންބަރަކު ވަނީ ޕީއެންސީއަށް ސޮއިކުރައްވާފައެވެ. އޭގެ ތެރޭގައި ހިމެނިވަޑައިގަންނަވަނީ ދާންދޫ ކައުންސިލުގައި އެމްޑީޕީ މެންބަރުން ގޮތުގައި ތިއްބެވި އެކައުންސިލްގެ ނާއިބު ރައީސް އިބްރާހީމް މުޙައްމަދާއި، ކައުންސިލް މެންބަރު އަޙްމަދު އިބްރާހީމްގެ އިތުރުން އަމިއްލަ މެންބަރު ނަޞްރާ ޢަލީއެވެ.


ދާންދޫ ކައުންސިލްގެ ރައީސް މުޙައްމަދު އާސިފް ވިދާޅުވީ އެ ކައުންސިލްގެ ވިސްނުމަކީ ސަރުކާރާ ގުޅިގެން ކުރިއަށް ދިއުންކަމަށެވެ. އަދި އެ ކައުންސިލަށް ދިމާވެފައިވާ ދަތިތައް ހައްލުކޮށް ކުރިއަށް ދިއުމަށް ސަރުކާރުގެފަރާތުން އެއްބާރުލުން ދެއްވާނެކަމުގެ ޔަޤީންކަން ވަޒީރު އާދަމް ޝަރީފް ޢުމަރު ދެއްވިކަމަށްވެސް އާސިފް ވިދާޅުވިއެވެ.