ގުޑުގުޑާ ދޫނި އަނެއްކާވެސް ކުޅުދުއްފުށި ކުޅިއަށް!

ފްލެމިންގޯ ނުވަތަ ދިވެހި ނަމުން ނަމަ ގުޑުގުޑާ ދޫނީގެ ވާހަކަ އެންމެ ބާރަށް ދެކެވުނީ 2021 ވަނަ އަހަރުގެ ފަހުކޮޅުއެވެ. ރާއްޖޭގެ އުތުރުގެ ރަށްތަކަށް އެއިރު ހިޖުރަކުރި މި ދޫނި ހަމަލޮލުން ބަލާލުމުގެ ފުރުސަތު އެ ހިސާބުގެ ދިވެހިންނަށް ލިބުނެވެ. އޭގެފަހުން ދޭތެރެ ދޭތެރެއިން ރާއްޖެއަށް ގުޑުގުޑާ ދޫނި އާދެއެވެ. މި ދޫނި އެންމެ ގިނައިން އަންނަނީ ކުޅުދުއްފުށީ ކުޅިއަށެވެ.

އަނެއްކާވެސް މިވަނީ ކުޅުދުއްފުށީ ކުޅިއަށް ގުޑުގުޑާ ދޫނި އެނބުރި އައިސްފައެވެ. މި ދޫނި އަބަދުވެސް ރާއްޖެއަށް އަންނަނީ އިރުވައި މޫސުން ފެށެން ގާތްވުމުންނެވެ.

މިއަހަރުގެވެސް އިރުވައި މޫސުމް ޑިސެމްބަރު މަހު 10 ގައި ފެށޭއިރު މިހާރު ސޯޝަލް މީޑިއާގައި އާންމުވެފައިވާ ފޮޓޯތަކުން ކުޅުދުއްފުށި ކުޅިއަށް ވަނީ ގުޑުގުޑާ ދޫނީގެ މޫސުން އައިސްފައެވެ. ފޮޓޯތަކުން ފެންނަ ގޮތުން މިފަހަރު އައިސްފައިވަނީ ހުދު ކުލައާއި ގަދަ ރަތް ކުލައެއްގެ ގުޑުގުޑާ ދޫންޏެވެ.

ގުޑުގުޑާ ދޫންޏަކީ މޫސުމީ ހިޖުރަކުރާ ދޫންޏެކެވެ. އެހެން ނަމަވެސް ރާއްޖެއިން މިދޫނި ފެނި އެންމެ ބޮޑު ސަމާލުކަމެއް ލިބިގެން ދިޔައީ 2021 ވަނަ އަހަރުގައެވެ. 2021 ވަނަ އަހަރު ކުޅުދުއްފުށީ ކުޅިއަށް ގިނަ އަދަދެއްގެ ދޫނި އައިއިރު އޭގެ ތެރެއިން ބައެއް ދޫނި އަހަރެއްހާ ދުވަހު، ކުޅުދުއްފުށީ ކުޅީގައި ދިރިއުޅުނެވެ.

ހިތްގައިމު މި ދޫންޏަކީ އާއްމުކޮށް ރާއްޖެއިން ނުފެންނަ ދޫންޏަކަށް ނުވިނަމަވެސް މިއީ ވަކި މޫސުމެއްގައި އެކި ސަރަހައްދުތަކަށް ހިޖުރަކުރަމުން އަންނަ ދޫނިތަކެކެވެ. ބައިބައި ގަނޑަށް ދަތުރުކުރާ މިދޫނިތައް އާއްމުކޮށް ފެންނަނީ ފެން ހެދޭ ކުޅިތައް ހުންނަ ސަރަހައްދުތަކުންނެވެ.

ރާއްޖެއަށް ހިޖުރަކުރާ މި ފަދަ ދޫނިތަކަށް ގޯނާ ކުރުމަކީ މަނާކަމެކެވެ. ރާއްޖެއަށް ހިޖުރަކުރި ގުޑުގުޑާ ދޫންޏެއް ހިފާ އޭގެ ފިޔަ ކޮށާލުމަށްފަހު ވިއްކަން ޖެހި މައްސަލައެއް 2021 ވަނަ އަހަރު ފެންމަތިވެފައިވެއެވެ. ހިމާޔަތްކޮށްފައިވާ އެއްވެސް ޖަނަވާރަކަށް ގޯނާއެއްކޮށް ނުވަތަ އެއެއްޗެއްގެ ހާއްޔެއް ހަލާކުކޮށް އެފަދަ އަމަލެއް ހިނގައިފިނަމަ 30،000 ރުފިޔާއާއި 50،000 ރުފިޔާއާއި ދެމެދު ޖޫރިމަނާ ކުރާނެކަމަށް ޤާނޫނުގައިވެއެވެ.