ފެނަކަ ކޯޕަރޭޝަންގެ އެމްޑީ ސައީދުވެސް އިސްތިއުފާ ދެއްވަނީ

ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަޙްމަދު ސައީދު މުޙައްމަދު އެ މަޤާމުން އިސްތިއުފާ ދެއްވުމަށް ހުށައަޅުއްވައިފިއެވެ.

ޕީއެސްއެމް ނިއުސްއަށް މައުލޫމާތު ލިބިފައިވާގޮތުގައި ފެނަކައިގެ މެނޭޖިންގ ޑިރެކްޓަރުކަމުގެ މަޤާމުން ސައީދު އިސްތިއުފާ ދެއްވުމަށް ހުށައަޅާފައިވަނީ މިމަހުގެ 17 ވަނަ ދުވަހުން ފެށިގެންނެވެ. އެއީ އައު ސަރުކާރު ވެރިކަމާއި ހަވާލުވެވަޑައިގަންނަވާ ދުވަހެވެ.

ސައީދު މަޤާމުން އިސްތިއުފާ ދެއްވަން ހުށައަޅާފައިވާއިރު ފެނަކާއާ ގުޅޭ 75 މައްސަލައެއް އެންޓި ކޮރަޕްޝަން ކޮމިޝަނުން އަންނަނީ ތަޙްޤީޤު ކުރަމުންނެވެ. މި ތުޙުމަތުތަކާ ގުޅިގެން ފެނަކައިން އެންމެފަހުން ބޭއްވި ނޫސްވެރިންގެ ބައްދަލުވުމުގައި، ސަޢީދު ވަނީ މި ހިނގާ ސަރުކާރުގެ 5 އަހަރު ދުވަހުގެ ތެރޭގައި ފެނަކައިން ދެމުންދާ ޚިދުމަތްތަކާއި އެހެނިހެން މަސައްކަތްތަށް ކުރިއަށް ގެންގޮސްފައިވާނީ ރާއްޖޭގެ ޤާނޫނާއި ގަވާއިދުތަކާއި އެއްގޮތަށް ކަމަށް ވިދާޅުވެފައެވެ. އަދި ސިޔާސީ ގޮތުން އެއްވެސް މީހަކަށް ވަޒީފާ ދީފައިނުވާނެކަމަށް ސައީދު ވިދާޅުވެފައިވެއެވެ..

ފެނަކައަށް އަމާޒުކުރެވޭ އެކި ތުހުމަތުތަކާއި ގުޅިގެން ވާހަކަފުޅު ދައްކަވަމުން ސައީދު މުހައްމަދު ވިދާޅުވީ، މި ނިމޭ 5 އަހަރުގެ ތެރޭގައި ފެނަކައިން ފޯރުކޮށްދީފައިވާ ހުރިހާ ޚިދުމަތްތަކަކީ ގާނޫނާއި، ގަވާއިދާއި އެއްގޮތަށް ފޯރުކޮށްދީފައިވާ ޚިދުމަތްތަކެއް ކަމަށެވެ.

އެގޮތުން ފެނަކައިގެ އެއްވެސް ވަޒީފާއަކަށް ސިޔާސީ ގޮތުން އެއްވެސް ފަރާތެއް އައްޔަން ކޮށްފައިނުވާނެ ކަމަށް އޭނާ ވިދާޅުވިއެވެ. ހަމައެއާއެކު ފެނަކަ ކޯޕަރޭޝަންގެ ކޮރަޕްޝަނާއި ރޫޓިން މަސައްކަތާއި އެ ކުންފުނޏަށް އަމާޒުކުރާ ކޮރަޕްޝަންގެ ތުޙުމަތުތަކަކީ ޙަޤީޤަތާ ޚިލާފު ވާހަކަތަކެއްކަމަށްވެސް ސަޢީދު ވިދާޅުވިއެވެ.