ފުލުހުންގެ އެގްޒެކްޓިވް ރޭންކްގެ ފުރަތަމަ އަންހެން އޮފިސަރަކަށް ނަޝްވާ

ފުލުހުންގެ އެގްޒެކްޓިވް ރޭންކްގެ އޮފިސަރަކަށް ފުރަތަމަ ފަހަރަށް އަންހެން ބޭފުޅަކު ޕްރޮމޯޓްވެއްޖެއެވެ. މި މަޤާމަށް ޕްރޮމޯޓްވެފައިވަނީ ފާތިމަތު ނަޝްވާއެވެ.

ނަޝްވާއަށް މި ރޭންކް ދީފައިވަނީ ރޭ ބޭއްވި ހަފްލާއެއްގައެވެ. މި ހަފްލާގައި އެގްޒެކެޓިވް ފެންވަރަށް އައު ބޭފުޅުން ހަމަޖައްސަވައި ފުލުހުންގެ މުއައްސަސާއަށް 30 އަހަރަށް ވުރެ ގިނަ ދުވަހު ޚިދުމަތްކުރި ފުލުހުންނަށް ޕްރޮމޯޝަން ވަނީ ދެއްވާފައެވެ.

ފުލުހުންގެ އެގްޒެކެޓިވް ރޭންކްގައި ތިއްބަވާނީ ޗީފް ސުޕްރިޓެންޑެންޓުން މަތީ ރޭންކުގެ އޮފިސަރުންނެވެ. ސުޕްރިޓެންޑެންޓުގެ މަޤާމުގައި ހުންނެވި ނަޝްވާ، ޗީފް ސުޕްރިޓެންޑެންޓުގެ މަޤާމަށް ޕްރޮމޯޓުކުރުމާއެކު އޭނާ ވަނީ އެގްޒެކެޓިވް ރޭންކުގެ ފުރަތަމަ އަންހެން އޮފިސަރަށް ވެވަޑައިގެންފައެވެ.

ނަޝްވާ ފުލުހުންގެ މުވައްސަސާގައި މަސައްކަތްކުރާތާ 30 އަހަރަށްވުރެ ގިނަ ދުވަސް ވަނީ ވެފައެވެ. އޭނާ ވަނީ ފުލުހުންގެ މުއައްސަސާގެ އިސް މަޤާމުތަކެއް ފުރުއްވާފައެވެ. ނަޝްވާ ވަނީ ޔުނިވަރސިޓީ އޮފް ސަދަން ކުއީންސްލޭންޑުން ޕަބްލިކް ރިލޭޝަންސް އިން ފުރަތަމަ ޑިގްރީ އަދި ފެޑެރޭޝަން ޔުނިވަރސިޓީ އޮސްޓްރޭލިއާއިން 2012 ވަނަ އަހަރު ބިޒްނަސް އެޑްމިނިސްޓްރޭޝަން އެންޑް މެނޭޖްމަންޓުން މާސްޓާސް ޑިގްރީ ޙާޞިލުކުރައްވައިފައެވެ.