"އަބުރު ރައްކާތެރިކޮށްދިނުމާއި ޚިޔާލު ފާޅުކުރުމުގެ މިނިވަންކަމުގެ ބިލް"ގައި ހުށައަޅުއްވާފައިވާ ޖޫރިމަނާގެ ޢަދަދު އިތުރަށް ބޮޑުކުރެއްވުމަށް ރައްޔިތުންގެ މަޖިލީހުގެ ތެރެއިން ބާރު އަޅުއްވާނެކަމަށް މިބިލް ހުށައެޅުއްވި ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަޙްމަދު ނިހާން ޙުސައިން މަނިކު ވިދާޅުވެއްޖެއެވެ.
ޕީއެސްއެމަށް ދެއްވި އިންޓަވިއުއެއްގައި ނިހާން ވިދާޅުވީ، ޖޫރިމަނާގެ ޢަދަދު ބޮޑުކުރުމަށް ބޭނުންފުޅުވަނީ މިކަން ހުއްޓުވުމުގެ ބޭނުމުގައިކަމަށެވެ. މިހާރު މަޖިލީހަށް ހުށާއްޅުއްވާފައިވާ މި ބިލުގައި ވާގޮތުން އަބުރާ ބެހުމާއި، އިސްލާމް ދީނާ ޚިލާފަށް ޚިޔާލު ފާޅުކުރުމުންނާއި، ޤަައުމީ ސަލާމަތަށް ނުރައްކާވާ ގޮތަށް ޚިޔާލު ފާޅުކޮށްފިނަމަ، 50،000 ރުފިޔާއާއި، ފަސް މިލިއަން ރުފިޔާއާ ދެމެދުގެ ޢަދަދުތަކުން ޖޫރިމަނާކުރެވޭނެއެވެ. އަދި މި ފައިސާ ނުދައްކައިފި ނަމަ އެއް އަހަރަށް ޖަލަށް ލެވޭނެކަމަށް ބަޔާންކުރައްވާފައިވެއެވެ.
މިބިލާއި ގުޅޭގޮތުން ޕީއެސްއެމަށް ދެއްވި އިންޓަރވިއުއެއްގައި ނިހާން ވިދާޅުވީ، މިހާރު ޢަމަލުކުރައްވަމުން ގެންދަވާ ޤާނޫނު އަސާސިން، އަސާސީ ޙައްޤުތައް ލިބިދީފައިވާ މިންވަރުގެ ސަބަބުން ބައެއް ފަރާތްތަކުން އަމިއްލަ ބޭނުމަށްޓަކައި އޮޅުވާލައިގެން މީހުންގެ އަބުރު ކަތިލަމުންދާކަމަށެވެ. މިކަން ގިނައިން ކުރަނީ ސިޔާސީ ފަރާތްތަކުންކަން ފާހަގަކުރައްވަމުން ނިހާން ވިދާޅުވީ، ނަތީޖާއެއްގެ ގޮތުން ޢާންމު އިޖުތިމާޢީ މިންގަނޑުގައި މިކަން ވަރަށް ބޮޑު މައްސަލައަށް މިހާރު ވެފައިވާކަމަށެވެ. އިންސާނުންގެ ކަރާމާތަކީ ވަރަށް ބޮޑު އިންސާނީ ޙައްޤެއްކަމަށް ވިދާޅުވަމުން، އިންސާނީ ކަރާމާތް ބޭނުން މިންވަރަކަށް ނަގާލަން ދިނުމަކީ މުސްލިމު މުޖުތަމަޢުއެއްގައި ސީރިއަސް ވިސްނުމަކަށް ދާންޖެހޭ ސަބަބެއްކަން ނިހާން ފާހަގަކުރެއްވިއެވެ.
މަދަނީ ކުށަކުން ޖިނާއީ ކުށަކަށް ފުރޮޅިގެންދާފަދަ ގޮތަކަށް ހުށައަޅުއްވާފައިވާ މިބިލްގެ ޖޫރިމަނާގެ ޢަދަދުތައް ބިލުގައި ކަނޑައަޅުއްވާފައިވާ ޢަދަދަށްވުރެ ބޮޑުކުރުމަށް ކޮމިޓީ މަރުހަލާގައި ބާރު އަޅުއްވާނެކަމަށާއި، ބައެއް މެމްބަރުންވެސް އެގޮތަށް ބޭނުންވާކަމަށް ނިހާން ވިދާޅުވިއެވެ. ނިހާން ވިދާޅުވީ ސިޔާސީ ބޭފުޅެއް ނަމަވެސް އަދި ކިތަންމެ އިސް މަޤާމެއްގައި ހުންނެވި މީހެއް ނަމަވެސް، އެހެން މީހުންގެ އަބުުރު ކަތިލުމަށް އެމީހެއްގެ މަޤާމު ހަތިޔާރަކަށް ބޭނުންކޮށްގެން ނުވާނެކަމަށެވެ. ޚާއްސަކޮށް ރައްޔިތުންގެ މަޖިލީހުގައި މިފަދައިން ހިނގާކަންކަން ނިހާން ފާހަގަކުރެއްވިއެވެ. މީހެއްގެ ނަމާއި އަބުރާ ބެހުމުގެ ޢަމަލެއް ކަމުގައި ބަލަނީ މީހެއްގެ ނަމަށް ނުވަތަ އަބުރަށް ނުވަތަ ގަދަރަށް އުނިކަމެއް ނުވަތަ ގެއްލުމެއް ލިބޭނެ ފަދަ ބަހެއް ބުނުމުންކަމަށް މިބިލުގައިވެއެވެ. އަދި އެ ބުނާ ބަހަކީ ސާބިތު ނުހިފޭ ބަހަކަށް ވާން ޖެހޭނެއެވެ. މިބިލުގެ ސަބަބުން އަބުރާބެހުން ހުއްޓުވޭނެކަމަށް ނިހާން ޤަބޫލުފުޅުކުރައްވައެވެ.
އެއްވެސް މީހަކު، އެ މީހެއްގެ އަބުރާ ބެހިއްޖެކަމަށް ޤަބޫލުކުރެވިއްޖެ ނަމަ ފުލުހުންނަށް ހުށަހެޅުމުގެ ހައްޤު ބިލުން ލިބިދީފައިވެއެވެ. އަދި ފުލުހުން މައްސަލަ ތަޙުޤީޤުކުރެއްވުުމަށް ފަހު، ދައުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވަން ވާނެ ކަމަށްވެސް "އަބުރު ރައްކާތެރިކޮށްދިނުމާއި ޚިޔާލު ފާޅުކުރުމުގެ މިނިވަންކަމުގެ ބިލު" ގައި ބަޔާންކުރައްވާފައިވެއެވެ.