ކުރިއަށް އޮތް ދެ ދުވަހުވެސް އުތުރަށް ވަރަށް ވިއްސާރަކުރާނެ: މެޓު

ކުރިއަށް އޮތް ދެ ދުވަހުވެސް އުތުރުގެ ރަށްތަކަށް ގުގުރުމާއެކު ބޯކޮށް ވާރޭ ވެހޭނެކަމަށް ލަފާކުރެވޭކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ. ރާއްޖެއަށް މިހާރު ކުރަމުންދަނީ ހުޅަނގު މޫސުމުގެ ނިމޭ ހިސާބުގައި ކުރާ ވިއްސާރަކަމަށް އެ އިދާރާއިން ވިދާޅުވެއެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ ބޮޑަށް ވިއްސާރަ ކުރަކުރާނީ އުތުރާއި މެދު ރާއްޖެތެރެއަށްކަމަށެވެ. އެގޮތުން މިއަދާ މާދަމާވެސް އެ ސަރަހައްދުތަކަށް ގުގުރުމާއެކު ވިއްސާރަކުރާނެކަމަށް ލަފާކުރެވޭކަމަށްވެސް އެ އިދާރާއިން ވިދާޅުވިއެވެ.

އެ އިދާރާއިން ވަނީ ރ. އަތޮޅުން ފެށިގެން ދ. އަތޮޅާއި ހަމައަށް ހުދު ސަމާލުވެސް ނެރެފައެވެ. ހުދު ސަމާލު ނެރެފައިވަނީ މެންދުރު ކުރި 11:30 އިން ހަވީރު 17:30 އަށެވެ. އުތުރާއި މެދުރާއްޖެ ތެރެއަށް ވިއްސާރަކުރިނަމަވެސް ވައިގަދަ ނުވާނެކަމަށާއި، ކަނޑުތައްވެސް ގަދަވާނެކަމަށް ލަފާނުކުރެވޭނެކަމަށް މޫސުމާ ބެހޭ ޤައުމީ އިދާރާއިން ވިދާޅުވިއެވެ. އެހެންނަމަވެސް ކަނޑުދަތުރުކުރައްވާ ފަރާތްތަކުން މޫސުމަށް ސަމާލުވެ މޫސުމާއި ގުޅޭ އެންމެ ފަހުގެ މައުލޫމާތު ހޯދުމަށް އެ އިދާރާއިން އިލްތިމާސްކުރައްވައެވެ.

ރާއްޖެއަށް މިހާރު ކުރަމުންދާ ވިއްސާރަ އަންނަ ބުދަ ދުވަހުން ފެށިގެން އަލިވާންފަށާނެކަމަށްވެސް އެ އިދާރާއިން ލަފާކުރައްވައެވެ. އުތުރާއި މެދުރާއްޖެ ތެރެއަށް ވިއްސާރަ ކުރިނަމަވެސް، ދެކުނުގެ އަތޮޅުތަކަށް މޫސުން ރަނގަޅެވެ.