ހައިކޯޓު ދެކުނު ގޮފީގެ ފަނޑިޔާރު ޑރ.އަޒްމިރާލްދާ ޒާހިރު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީއަށް ހުށަހެޅުއްވި މައްސަލަ ނުބެއްލެވުމަށް އެކޮމިޓީން ނިންމަވައިފިއެވެ.
ފަނޑިޔާރު އަޒްމިރާލްދާ ކޮމިޓީއަށް ހުށަހެޅުއްވި މައްސަލައަކީ، އޭނާ ހައިކޯޓުގެ ދެކުނު ގޮއްޕަށް ބަދަލުކުރެއްވި މައްސަލާގައި ޖުޑިޝަލް ސަރވިސް ކޮމިޝަން (ޖޭއެސްސީ) ޖަވާބެއް ދެއްވާފައިނުވާތީ އެކަން ބައްލަވައިދެއްވުމަށް އެދިވަޑައިގެން ހުށަހެޅުއްވި މައްސަލައެކެވެ. އަދި އައްޑޫ ސިޓީގައި ހުންނަ ދެކުނު ގޮތްޕަށް އޭނާގެ ރުހުމެއް ނެތި ބަދަލު ކުރެއްވުމުން ގިނަ ޙައްގުތަކެއް ގެއްލިފައިވާކަމަށް އެމައްސަލާގައި ބަޔާންކުރައްވާފައިވޭ. ނަމަވެސް ޖުޑީޝަލް ސަރވިސް ކޮމިޝަނަކީ މިނިވަން މުއައްސަސާއަކަށް ވާތީ، އެ މުއައްސަސާތަކުގެ ނިންމުންތައް ބެލުމުގެ އިޙްތިސާސް އެ ކޮމެޓީއަށް ލިބިގެން ނުވާކަމަށް މިނިވަން މުއައްސަސާތަކާބެހޭ ކޮމިޓީން ވަނީ ނިންމަވާފައެވެ.
ރާއްޖޭގެ ދެ ސަރަޙައްދެއްގައި އުފައްދަވަންޖެހޭ ހައިކޯޓުގެ ގޮފިތަކުގެ ތެރެއިން ދެކުނު ގޮފީގެ މަސައްކަތް ފަށްޓަވާފައިވަނީ މިދިޔަ އަހަރުގެ ޑިސެމްބަރު މަހުގެ ސޯޅަ ވަނަ ދުވަހުގައެވެ.
ސ. ހުޅުމީދޫގައި ހުންނަ އެ ގޮފީގައި ކުރިއަށް ގެންދަވަނީ މައްސަލަތައް ބަލައިގަތުމާއި ރަޖިސްޓްރީ ކުރުމާއި އެހެން ޤާނޫނީ މަސައްކަތްތައް ބެއްލެވުމެވެ. ހައިކޯޓުގެ ދެކުނު ގޮފީގައި 3 ފަނޑިޔާރުން ތިއްބަވައެވެ. އެއީ ފަނޑިޔާރު އަބްދުލްޣަނީ މުޙައްމަދާއި، ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު ޝުޢައިބު ޙުސައިން ޒަކަރިއްޔާއެވެ.