ޕާޓްނަރޝިޕް ވިޔަފާރިއެއްގައި އެންމެ ގިނަވެގެން ހިމެނޭނެ މީހުންގެ ޢަދަދު، ޕާޓްނާޝިޕްގެ އެއްބަސްވުމުގައި ބަޔާން ކުރަންޖެހޭގޮތަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ.
ސަރުކާރުގެ ފަރާތުން ގެމަނަފުށީ ދާއިރާގެ މެމްބަރު ޖަމީލް އުޘްމާން މި ޤާނޫނަށް ހުށައެޅުއްވައި، މިއަދު ފާސްކުރެއްވި އިޞްލާޙުގައި ވަނީ، ލިމިޓެޑް ޕާޓްނަރޝިޕްގައި ބައިވެރިވެވޭ ފަރާތްތަކުން ޢަދަދު ކަނޑައެޅުމުގެ ފުރުޞަތު، އެ ޕާޓްނަރޝިޕްގައި ބައިވެރިވާ ފަރާތްތަކަށް ލިބޭނެކަމަށެވެ. ޕާޓްނަރޝިޕްގެ ޤާނޫނުގައި މިހާރު ބުނެފައި ވަނީ ޕާޓްނާޝިޕެއްގައި ގިނަވެގެން ތިބޭނީ 20 މީހުންނަށް ކަމަށެވެ.
ޖަމީލް ހުށަޅުއްވި އިޞްލާޙުގައި ބުނެފައި ވަނީ، ކޮންމެ ޕާޓްނާޝިޕެއްގައި މެނޭޖިންގ ޕާޓްނަރެއް ހުންނަންވާނެ ކަމަށާއި، ލިމިޓެޑް ލައިބިލިޓީ ޕާޓްނަރޝިޕެއްގެ މެނޭޖިންގ ޕާޓްނަރެއްގެ ގޮތުގައި ތަބީޢީ ޝަޙްސެއް ނުވަތަ ޤާނޫނީ ޝަޚްސެއް ޢައްޔަން ކުރެވިދާނެ ކަމަށެވެ. މިހާރު ޤާނޫނުގައިވަނީ، ކޮންމެ ޕާޓްނަރޝިޕެއްގައި މެނޭޖިންގ ޕާޓްނަރެއް ހުންނަންވާނެ ކަމަށެވެ. މި އިޞްލާޙަށް ބަހުސްކުރެއްވި ބައެއް މެމްބަރުން ވިދާޅުވީ، މިފަދަ އިޞްލާހުތަކުން ޒުވާނުންނަށް ވިޔަފާރީގެ ފުރުޞަތުތަށް ހުޅުވިގެން ދާނެކަމަށެވެ. އަދި ވިޔަފާރީގެ އިތުރު ފުރުޞަތުތައް ތަނަސްވާނެކަމަށްވެސް ވިދާޅުވިއެވެ.