ކުރީގެ ރައީސް މުޙައްމަދު ނަޝީދުގެ ވެރިކަމުން ފެށިގެން މިއަދާއި ހަމައަށް ސަރުކާރުގެ އިދާރާތަކުން ހިންގާފައިވާ ޚިޔާނާތުގެ މައްސަލަތަކާއި، އެ މައްސަލަތަކުގެ ތަޙްޤީޤް ކުރިއަށް ގޮސްފައިވާ ހިސާބެއް ބެލުމަށް ރައްޔިތުންގެ މަޖިލީހުގެ މާލިއްޔަތުގެ ކޮމިޓީގެ ކުޑަ ކޮމިޓީން ފާސްކުރައްވައިފިއެވެ.
ކޮމިޓީން މިގޮތަށް ފާސްކުރެއްވީ، މިއަދު ބޭއްވި އެކޮމިޓީގެ ބައްދަލުވުމުގައެވެ. މާލިއްޔަތު ކޮމިޓީގެ ކުޑަ ކޮމިޓީއަކީ މޯލްޑިވްސް މާރކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ކޮރަޕްޝަން މައްސަލައާއި ގުޅިގެން ކިނބިދޫ ދާއިރާގެ މެމްބަރު ޢަބްދުﷲ ރިޔާޒް ހުށައެޅުއްވި މައްސލަ ބެއްލެވުމަށް އެކުލަވާލެއްވި ކޮމިޓީއެކެވެ. ކޮމިޓީން ވަނީ އެންޓި-ކޮރަޕްޝަން ކޮމިޝަން ފިޔަވާ ސަރުކާރުގެ ހުރިހާ އިދާރާތަކުން އެމްއެމްޕީއާރުސީގެ މައްސަލައާއި ގުޅިގެން އެއްކޮށްފައިވާ މައުލޫމާތު ހޯއްދެވުމަށްވެސް މިއަދު ފާސްކުރައްވާފައެވެ.
ކޮމިޓީގެ މުޤައްރިރު ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވީ، އެ އިދާރާތަކުން މަޢުލޫމާތު ހޯއްދެވުމަށްފަހު ކޮމިޓީއަށް ހާޟިރުކުރަންޖެހޭ ފަރާތްތައް އެކޮމެޓީއަށް ހާޟިރުކުރައްވާނެކަމަށެވެ.
މި މައްސަލައާ ގުޅިގެން މިއަދު ބޭއްވެވި ބައްދަލުވުމުގައި މެމްބަރުން ވިދާޅުވީ، އެމްއެމްޕީއާރްސީގެ ކޮރަޕްޝަނުގެ މައްސަލަ ބައްލަވަން ސަރުކާރަށް ނިސްބަތްވެވަޑައިގަންނަވާ ހުރިހާ މެމްބަރުންވެސް ބޭނުންފުޅުކަމަށެވެ. އަދި އެމްޑީޕީގެ ސަރުކާރުގައި އިސް ބައެއް ބޭފުޅުން ދައުލަތުގެ ފައިސާއަށް ޚިޔާނާތްތެރިވާކަމަށާއި، އެމައްސަލަތައްވެސް ބެއްލެވުމަށްވެސް މެމްބަރުން ގޮވާލެއްވިއެވެ. ބައެއް މެމްބަރުން ވިދާޅުވީ، އެމްއެމްޕީއާރްސީގެ ޚިޔާނާތާއި ގުޅިގެން މަޖިލިސް މެންބަރުންނަށް ބޮޑެތި ތުހުމަތުތަކާއި ފާޑު ކިޔުންތަކެއް އަމާޒުވެފައިވާތީ އެކަމުގެ ހަގީގަތްތައް ހޯދަން ޖެހޭ ކަމަށެވެ. އެހެންކަމުން ކޮމިޓިން ވަނީ ކުރީގެ ރައީސް މުޙައްމަދު ނަޝީދުގެ ސަރުކާރުން ފެށިގެން މިއަދާއި ހަމައަށް ހިނގާފައިވާ ކޮރަޕްޝަންގެ މައްސަލަތައް ބެލުމަށް ނިންމާފައެވެ.