ސިއްރުން އެތެރެކުރި 10.99 ކިލޯ ރަނުން ދައުލަތަށް 10 މިލިއަނަށްވުރެ ގިނަ ރުފިޔާ

ފާއިތުވެ ދިޔަ އަހަރެއްހާ ދުވަހުގެ ތެރޭގައި ފޮރުވައިގެން ދިވެހިރާއްޖެއަށް އެތެރެކުރަން އުޅުނު ރަނުން 10 މިލިއަނަށްވުރެ ގިނަ ރުފިޔާ ދައުލަތައް ލިބިފައިވާކަމަށް ޕްރޮސެކިއުޓަރ ޖެނެރަލްގެ އޮފީހުން ވިދާޅުވެއްޖެއެވެ.

ޕީޖީ އޮފީހުން ވިދާޅުވީ މިދިޔަ އަހަރެއްހާ ދުވަހުގެ ތެރޭގައި ރާއްޖެއަށް ސިއްރުން ރަން އެތެރެކުރަން އުޅުނު ގިނަ މީހުން ކަސްޓަމްސްއިން ކުރެއްވި މަސައްކަތުން އަތުލައިގަނެފައިވާ ކަމަށެވެ. އަދި އެހުރިހާ މައްސަލަތަކެއްގައި ޖިނާއީ ދަޢުވާކޮށް ސިއްރުން އެތެރެކޮށްފައިވާ ރަން ދަޢުލަތަށް ނަގާފައިވާ ކަމަށެވެ.

ޕްރޮސެކިއުޓަރ ޖެނެރަލްގެ އޮފީހުގެ ތަފާސްހިސާބުތަކުން ދައްކާގޮތުގައި ފާއިތުވެދިޔަ އަހަރެއްހާ ދުވަހުގެ ތެރޭގައި ފޮރުވައިގެން ރާއްޖެއަށް ރަން އެތެރެކުރި މައްސަލަތަކުގައި އެކިއެކި ގޮތްގޮތައް ސިއްރުކޮށްގެން ރާއްޖެއަށް އެތެރެކުރަން އުޅުނު 10.99 ކިލޯގެ ރަން އަތުލައިގަނެފައިވާކަމަށް އެ އޮފީހުން ވަނީ ހާމަކޮށްފައެވެ.

ދުނިޔޭގެ މާކެޓްގައި ރަނުގެ އަގަށް ބަލާއިރު، ޢާންމު ގޮތެއްގައި އުޅެނީ، ކިލޯއެއް 60،000 އެމެރިކާ ޑޮލަރާއި 70،000 އެމެރިކާ ޑޮލަރާއި ދެމެދުގެ އަގެއްގައެވެ.

އެހެންކަމުން މިދިޔަ އަހަރެއްހާ ދުވަހު، ކުށްކޮށްގެން ހޯދި މުދާ ދައުލަތަށް ނަގައިގެން، ދައުލަތަށް ނެގި ރަނުގެ އަގުގެ ގޮތުން، މަދުވެގެން 659،000 އެމެރިކާ ޑޮލަރު ނުވަތަ 10،167،948 ރުފިޔާ ދައުލަތަށް ލިބިފައިވާކަމަށް ޕީޖީ އޮފީހުން ވަނީ ވދާޅުވެފައެވެ.

ޕްރޮސިކިއުޓަރ ޖެނެރަލްގެ އޮފީހަކީ ޖިނާއީ ދަޢުވާކުރާ އިދާރާއެކެވެ. އެ އޮފީހުގެ ސިޔާސަތުތައް ބައްޓަންކޮށްފައިވާނީ ކުށް ކުރުން ހުއްޓުވުމާއި، ކުށް ކުރުމަށް ދަތިކުރުމުގެ މައްޗަށެވެ.

ދިވެހިރާއްޖޭގެ ބޯޑަރުން އެއްވެސް އެއްޗެއް އެތެރެކުރުމުގެ އަދި ބޭރުކުރުމުގެ ކުރިން ދިވެހިރާއްޖޭގެ ކަސްޓަމްސްގެ ހުއްދަ ހޯދަން ޖެހެއެވެ. އަމިއްލަ ބޭނުންތަކަށް ގެންނަ މުދަލުގެ އަގު 6000 ރުފިޔާއަށްވުރެ ބޮޑު ނުވާނަމަ، އަދި އެއީ ދިވެހިރާއްޖެއަށް އެތެރެކުރުމަށް ވަކި ޚާއްސަ ހުއްދައެއް ބޭނުންނުވާ ނުވަތަ ދިވެހިރާއްޖެ އެތެރެކުރުން މަނާ އެއްޗަކަށް ނުވާނަމަ، އެ އެއްޗެއް ދިވެހިރާއްޖޭގެ ކަސްޓަމްސްއަށް ޑިކްލެއަރ ކުރުމެއް ނެތި އެތެރެކުރުން، މިދެންނެވި އުޞޫލުން އިސްތިސްނާވެގެންވެއެވެ.