ނިޒާމީ ވޯޓާގުޅޭ ސުވާލުތަކެއް ހުރުމުން ޖަވާބު ހޯދަން އީސީން މަޖިލީހަށް

ނިޒާމީ ވޯޓެއް ނެގުމަށް ރައްޔިތުންގެ މަޖިލީހުން އިލެކްޝަންސް ކޮމިޝަނަށް ހުށައެޅުއްވިނަމަވެސް، އެކަމުގައި ސުވާލު އުފެދޭ ބައެއް ކަންކަން ހުރުމުން، ޖަވާބު ހޯދުމަށް އިލެކްޝަންސް ކޮމިޝަނުން ރައްޔިތުންގެ މަޖިލީހަށް ހުށައަޅުއްވައިފިއެވެ.

ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް، ރައްޔިތުންގެ މަޖިލީހުން ފާސްކުރައްވަފައިވާ ގަރާރު، އިލެކްޝަންސް ކޮމިޝަނަށް ވަނީ މިއަދު ފޮނުވާފައިވެއެވެ. މިއާއެކު އެކޮމިޝަނުން ވަނީ އެ ޤަރާރާއި ގުޅޭގޮތުން ޤާނޫނީ ލަފާ ހޯއްދަވާފައެވެ.

އިލެކްޝަންސް ކޮމިޝަނުގެ ނާއިބު ރައީސް އިސްމާޢީލް ހަބީބު ވިދާޅުވީ، ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް، ރައްޔިތުންގެ މަޖިލީހުން ފާސްކުރައްވާފައިވާ ގަރާރާ މެދު، ކޮމިޝަނުން ޢަމަލު ކުރާނޭގޮތުގެ ޤާނޫނީ ލަފާ ހޯދުމަށްފަހު، އެފަދަ ވޯޓެއް ނެގުމުގެ ކުރީން، ޖަވާބު ބޭނުންވާ ކަންކަމާ ގުޅޭގޮތުން، އިލެކްޝަންސް ކޮމިޝަނުން ރައްޔިތުންގެ މަޖިލީހުގެ އިދާރާގައި މިއަދު ދަންނަވާފައިވާކަމަށެވެ.

މިހާރު ރާއްޖޭގައި އޮންނަން ފެންނަނީ ރިޔާސީ ނިޒާމެއްތޯ ނުވަތަ ބަރުލާމާނީ ނިޒާމެއްތޯ ބެލުމަށް، ރައްޔިތުންގެ ޚިޔާލު ހޯދުމަށް ޢާންމު ވޯޓެއް އަންނަ އޮކްޓޫބަރު މަހުގެ 30 ގެ ކުރިން ނެގުމަށް ރައްޔިތުންގެ މަޖިލީހަށް ޤަރާރު ހުށަހެޅުއްވީ ދަ ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބެވެ.

މި ޤަރާރު ބުދަ ދުވަހުގެ ޖަލްސާއިން ފާސްކުރެއްވީ ޖަލްސާއަށް ޙާޒިރުވެތިއްބެވި 39 މެންބަރުންގެ ތެރެއިން ވޯޓުގައި ބައިވެރިވެވަޑައިގެންނެވި 35 މެންބަރުންގެ ވޯޓުންނެވެ.

ނިޒާމީ ވޯޓެއް ނެގުމަށް ރައްޔިތުންގެ މަޖިލީހުން އިލެކްޝަންސް ކޮމިޝަނަށް ހުށައެޅުއްވިނަމަވެސް، އެކޮމިޝަނުން މީގެ ކުރިން ވިދާޅުވެފައިވަނީ މަދުވެގެން 30 ދުވަހާއި 45 ދެމެދުގެ މުއްދަތެއް އެއިންތިޚާބު ބޭއްވުމުގެ ކަންކަން ހަމަޖެއްސުމަށް ބޭނުންވާނެކަމަށެވެ. މިވަގުތު ނިޒާމީ ވޯޓެއް ނެގުމަކީ ވާނޭ ކަމެއް ނޫންކަމަށް އިލެކްޝަންސް ކޮމިޝަނުން ވިދާޅުވެފައިވަނީ މިމަހުގެ 30ގައި ރިޔާސީ އިންތިޚާބުގެ ވޯޓުލުންވެސް އޮތުމާއެކުއެވެ. ނިޒާމީ ވޯޓެއް ނަގަން ޖެހިއްޖެނަމަ އެފަދަ ވޯޓަކަށް ޢާއްމުން ހޭލުންތެރިކުރުވުމަކީ ޤާނޫނީގޮތުން އިލެކްޝަން ކޮމިޝަނަށް މަތިކޮށްފައިވާއިވާ މަސްއޫލިއްޔަތެއްކަމަށާއި، އެކަން ކުރުމަށް މަސްދުވަހަށްވުރެ މަދުނޫން މުއްދަތެއް ބޭނުންވާނެ ކަމަށް އިލެކްޝަން ކޮމިޝަންގެ ނައިބު ރައީސް އިސްމާޢީލް ޙަބީބް ވަނީ ވިދާޅުވެފައެވެ.

ޙަބީބް ވިދާޅުވީ، ނިޒާމު ބަދަލުކުރުމުގައި އެނިޒާމެއްގެ ފައިދާއާއި ގެއްލުމާއި ގުޅޭގޮތުން ވޯޓުލާ މީހުން ހޭލުންތެރިކުރަންޖެހޭކަމަށެވެ. އަދި ނިޒާމު ބަދަލުކުރުމުގެ ވޯޓުގެ މަޤްސަދު ރައްޔިތުންނަށް އަންގާ އެކަންކަމާއި ގުޅޭގޮތުން ޢާއްމުން ހޭލުންތެރިކުރުވުމަކީ ޤާނޫނީ ގޮތުން އިލެކްޝަންސް ކޮމިޝަންގެ ޒިންމާއެއްކަމަށް ޙަބީބް ވިދާޅުވިއެވެ.

އެފަދަ އިންތިޚާބެއް ބޭއްވުމަށް މިހާރު އިންތިޒާމުތައް ހުރިގޮތުން ގާތްގަނޑަކަށް 40 މިލިއަން ރުފިޔާ ޚަރަދުވާނެކަމަށް އިލެކްޝަންސް ކޮމިޝަނުން ވަނީ ވިދާޅުވެފައެވެ.

ޤާނޫނު އަސާސީގައި ބަޔާންކޮށްފައިވާގޮތުން ރާއްޖޭގައި އޮންނަން ފެންނަ ވެރިކަމުގެ ނިޒާމެއް ކަނޑައަޅާނީ ސީދާ ރައްޔިތުންގެ ފެންނަ ނުފެންނަ ވޯޓަކުންނެވެ. ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށް ރައްޔިތުން ނިންމާފައިވަނީ 2007 ވަނަ އަހަރު ނެގި ފެންނަ ނުފެންނަ ވޯޓުންނެވެ.