އިންތިޚާބާ ގުޅޭ 29 މައްސަލައެއް އޭސީސީއަށް
-
އިންތިޚާބީ ރިޝްވަތުގެ 7 މައްސަލައެއް
-
މައްސަލަތައް ބަލަން ވަނީ ފަށާފައި
-
މައްސަލަ ހުށައަޅަން ޚާއްޞަ ޕޯޓަލެއް ޤާއިމްކޮށްފައިވޭ
ރިޔާސީ އިންތިޚަބާއި ގުޅޭ 29 މައްސަލައެއް މިހާތަނަށް ހުށައަޅާފައިވާކަމަށް އެންޓި-ކޮރަޕްޝަން ކޮމިޝަން، އޭސީސީން ވިދާޅުވެއްޖެއެވެ.
އެކޮމިޝަނުން ވިދާޅުވީ ރިޔާސީ އިންތިޚާބާއި ގުޅިގެން އިންތިޚާބީ ކޮރަޕްޝަންގެ މައްސަލައަތަކުގެ ގޮތުގައި މިހާތަނަށް ޖުމްލަ 29 މައްސަލަ އެކޮމިޝަނަށް ހުށައަޅާފައިވާކަމަށެވެ. މި މައްސަލަތަކުގެ ތެރެއިން 7 މައްސަލައެއް ތަހުޤީގުކުރަންޖެހޭކަމަށް ފެންނާތީ އެ މައްސަލަތަކުގެ ތަހުޤީގު މިހާރު ފަށްޓަވާފައިވާކަމަށް އޭސީސީން ވިދާޅުވިއެވެ. މީގެ ތެރޭގައި ދައުލަތުގެ މުދާލާއި ވަސީލަތްތައް ނަހަމަގޮތުގައި ބޭނުންކުރުމާއި، ރިޝްވަތާ ގުޅުހުންހުރި މައްސަލަ ހިމެނޭކަމަށް އޭސީސީން ވިދާޅުވިއެވެ.
މީގެ އިތުރުން ކޮމިޝަނަށް ހުށައެޅި ބަލަމުންގެންދާ މައްސަލަތަކުގެ ތެރޭގައި ހުޅުމާލެއިން ގޯތި ދޫކުރި ގޮތާއި، ގުރުއަތުލުން ކުރިއަށްގެންދިޔަ ގޮތާގުޅޭ މައްސަލައެއްވެސް ކޮމިޝަނުން ބަލާކަމަށް އޭސީސީން ވިދާޅުވިއެވެ. އަދި މި މައްސަލަތަކާއި ގުޅިގެން އަޅަންޖެހޭ ފިޔަވަޅުތައް ކޮމިޝަނުން އަޅުއްވަމުން ގެންދަވާކަމަށާއި، ބައެއް ފިޔަވަޅުތައް އެޅޭނީ ބައެއް ކަންކަން ދެނެގަނެ ކަށަވަރުކުރެވިގެން ކަމުގައިވާތީ އެކަންކަމާ ގުޅޭ އިތުރު މައުލޫމާތު ހޯދުމުގެ މަސައްކަތް މިހާރު ކުރައްވަމުން ގެންދަވާކަމަށްވެސް އޭސީސީން ވިދާޅުވިއެވެ.
އޭސީސީން ވަނީ އިންތިޚަބާއި ގުޅޭ މައްސަލަތަކާއި ޝަކުވާތައް ހުށައެޅުމަށް ޚާއްޞަ ޕޯޓަލެއް ތަޢާރަފްކޮށްފައެވެ. މި ޕޯޓަލަށް ވަނުމުން އިންތިޚާބީ ރިޝްވަތަކީ ކޮބައިކަމާއި އެއަށް ސަމާލުވާނެގޮތުގެ މައުލޫމާތު ހިމަނައިގެން އޭސީސީން ތައްޔާރުކުރައްވާފައިވާ ލުއިފޮތްވެސް ބަލައިލެވޭނެކަމަށް އެ ކޮމިޝަނުން ވިދާޅުވިއެވެ.
މިޕޯޓަލް މެދުވެރިކޮށް މައްސަލަ ހުށަހަޅާ ފަރާތުގެ މަޢުލޫމާތު ސިއްރުކޮށްދެވޭގޮތަށް އިންތިޒާމުކުރެވިފައިވީ ނަމަވެސް މައްސަލައިގެ އަޕްޑޭޓް ފޯރުކޮށްދެވޭނީ ކާކުކަން އެނގޭގޮތަށް މައްސަލަ ހުށަހަޅާ ފަރާތްތަށް ކަމަށް އޭސީސީން ވިދާޅުވިއެވެ.