ކެންޑިޑޭޓުންގެ ކެމްޕެއިން ނިންމުމަށް މާލޭގައި މިއަދު ފޯރިގަދަ ގިނަ ހަރަކާތްތަކެއް

މާދަމާ ބާއްވާ ރިޔާސީ އިންތިޚާބަކީ ރާއްޖޭގެ ތާރީޚުގައި އެންމެ ގިނަ ކެންޑިޑޭޓުން ވާދަކުރައްވާ އިންތިޚާބެވެ. މި އިންތިޚާބުގައި 8 ކެންޑިޑޭޓުން ވާދަކުރާއިރު، ސިޔާސީ ޕާޓީތަކުގެ ޓިކެޓުގައި 5 ކެންޑިޑޭޓުން އަދި އަމިއްލަގޮތުން 3 ކެންޑިޑޭޓުން ވާދަކުރައްވައެވެ.

އިންތިޚާބު ބާއްވަން ކުޑަތަންވަމުން އަންނައިރު ކޮންމެއަކަސް އިންތިޚާބުގެ ފޯރި މުޅި ރާއްޖޭގައި އޮތީ ހިފާފައެވެ. މިއަދަކީ ކެންޑިޑޭޓުންނާސި ސިޔާސީ ޕާޓީތަކުން މި އިންތިޚާބަށް ކެމްޕެއިންކުރާނެ އެންމެ ފަހު ދުވަހެވެ. ކެންޑިޑޭޓުންނަށް ކެމްޕެއިން ކުރަން ދީފައިވާ މުއްދަތު މިއަދުގެ އިރުއޮއްސި 6 ޖެހުމާއި ހަމައަށް ހަމަވާނެއެއެވެ.

ކެމްޕެއިންގެ ފޯރި އެންމެ ބޮޑަށް އޮތީ ވެރިރަށް މާލޭގައެވެ. ދިދަފަތިތަކާއި ބެނާތަކާއެކު މާލޭގެ މަގުތަކުން ފެނަނީ ސިޔާސީ ޢީދެކެވެ. ސިޔާސީ އެކި ވަޢުދުތަކެވެ. އެއް ކެންޑިޑޭޓަކު އަނެއް ކެންޑިޑޭޓާކާއި، އެއް ޕާޓީ އަނެއް ޕާޓީއަށް އޮތް ވާދަވެރިކަން ހަމަ ރަނގަޅަށްވެސް ފެނެއެވެ.

ކެމްޕެއިން ޖަގަހަތައް ހުޅުވުމުގެ ހަރަކާތްތައް ރެޔާއި ހަމައަށްވެސް ކުރިއަށްދިޔައެވެ. އަދި ކެންޑިޑޭޓުންނާއި ރަނިންމޭޓުންނާއި ޕާޓީތައްކުން ތާޢީދު ހޯދުމުގެ ކެމްޕެއިން ދަތުރުތަކުގައި މިއަދުވެސް އުޅުނެވެ.

މާލޭގެ ވަށަމަގުތަކުގައި ހުރި ބޮޑެތި ބިލްބޯޑުތަކާއި ޕޯސްޓަރުތަކުންވެސް ފެންނަނީ، އެކަމުގައިވެސް ވާދަވެރިކަމެވެ. އެއް ކެންޑިޑޭޓަށްވުރެ އަނެއް ކެންޑިޑޭޓުގެ ފޮޓޯޖެހި ބޯޑުތަކުގެ ސައިޒު ބޮޑެވެ.

ކެންޑިޑޭޓުންގެ ވަޢުދުތަކާއި މެނިފެސްޓޯގައި ހިމަނާފައިވާ ކަންކަން ލިޔެ، ވީހާވެސް ގިނަ މީހުންނަށް ފެންނާނެގޮތަށް ދަމާފައިވާ ބެނާތަކުން މަގުތައް ވަނީ ފުރާލާފައެވެ.

ހަމަ މި ފޯރި އަތޮޅުތަކުގައި ރަށްރަށުގައި މިގޮތުގައި އެބައޮތެވެ.

އިރުއޮއްސި 6 ގެ ފަހުން ކެމްޕެއިންގެ އެއްވެސް ހަރަކާތެއް ދެން ކުރިއަަކަށް ނުގެންދެވޭނެއެވެ.

ކެމްޕެއިން ނިންމުމަށް މިއަދު ހަވީރުގެ ހަރަކާތްތަކަށް ހުރިހާ ޕާޓީތަކުންނާއި، އަމިއްލަ ގޮތުން ވާދަކުރާ ކެންޑިޑޭޓުންވެސް އަންނަނީ ވަރަށް ފޯރިޔާއެކު ތައްޔާރުވަމުންނެވެ. ކެމްޕެއިން ނިންމުން ސަޕޯޓަރުންނާއެކު ފާހަގަކުރުމުގެ ތައްޔާރީތައް މާލޭގެ އެކި ސަރަޙައްދުތަކުގައި އަންނަނީ ވަމުންނެވެ.

މިހާރު ރާއްޖޭގައި އޮތް އެންމެ ބޮޑު ސިޔާސީ ޕާޓީ، އެމްޑީޕީން ކެމްޕެއިން ނިންމުމުގެ ހަރަކާތް ބާއްވަނީ އުސްފަސްގަނޑު ސަރަޙައްދުގައެވެ.

ޕީޕީއެމްއިން ކެމްޕެއިން ނިންމުން ފާހަގަކުރަނީ އަރޓިފިޝަލް ބީޗުގައެވެ. ޖުމްހޫރީ ޕާޓީގެ ހަރަކާތް އޮންނަނީ މަޖީދީ މަގުން ހެންވޭރުކޮޅުގައި އަރޓިފިޝަލް ބީޗް ކައިރީގައެވެ. ދަ ޑިމޮކްރެޓްސްގެ ކެމްޕެއިން ފަހު ހަރަކާތް ރަސްފަންނުގައި ބޭއްވުމަށް ހަމަޖެހިފައިވާއިރު، މޯލްޑިވްސް ނެޝަނަލް ޕާޓީ، އެމްއެންޕީގެ ކެމްޕެއިން ނިންމުމުގެ ހަރަކާތް އޮންނާނީ ހުޅުމާލެ ސެންޓްރަލް ޕާކުގައެވެ.

މީގެއިތުރުން، އަމިއްލަ ކެންޑިޑޭޓުންގެ ހަރަކާތްތައްވެސް މާލޭގައި އޮންނާނެއެވެ.

ރަށްރަށުގައިވެސް ކެމްޕެއިން ހަރަކާތްތައް ނިންމުމަށް، ޖަގަހަތަކުގައާއި އެކި މ ަގުތަކުގައި ހިނގާލުމުގެ ހަރަކާތްތައް ބޭއްވުމަށް ވަނީ ރާވާފައެވެ.

2023 ރިޔާސި އިންތިޚާބުގެ ވޯޓުލުން ފަށާނީ މާދަމާ ހެނދުނު 08:00ގައެވެ. 16:00ގައި ވޯޓު ފޮށިތައް ބަންދުކޮށް، 16:30ގައި ވޯޓު ގުނަން ފަށާނެއެވެ.

ކޮންމެއަކަސް މާދަމާ ރޭ ގާތްގަނޑަކަށް ދިހައެއް ޖެހުމާއި ހަމައަށްދާއިރު، އިންތިޚާބުގެ ކޮންމެވެސް ނަތީޖާއަކާއި ހަމައަށް ދެވޭނެކަމަށް ޤަބޫލުކުރެވެއެވެ. މި އިންތިޚާބު އެއްބުރުން ނުނިމިއްޖެނަމަ ދެވަނަ ބުރެއްގެ ވޯޓުލުން މިމަހުގެ 30 ވަނަ ދުވަހު އޮންނާނެއެވެ.

ހުރިހާ ދިވެހިންވެސް ތިބީ މި އިންތިޚާބުގެ ނަތީޖާ ނިކުންނާނެ ގޮތަކާމެދު ކުރެވޭ އިންތިޒާރުގައެވެ.