ޓްރާންސްޕޯޓް އޮތޯރިޓީއަށް ޤާނޫނީ ބާރުވެރިކަންދީ، ގިނަ ޒިންމާތަކެއް މަތިކުރުމަށްފަހު "މޯލްޑިވްސް ޓްރާންސްޕޯޓް އޮތޯރިޓީގެ ބިލު" ރައްޔިތުންގެ މަޖިލީހުން މިއަދު ފާސްކުރައްވައިފިއެވެ.
މި ބިލް މަޖިލީހަށް ހުށައަޅުއްވާފައި ވަނީ ސަރުކާރުގެ ފަރާތުން މަޑުއްވަރީ ދާއިރާގެ މެމްބަރު މުޙައްމަދު އަމީތު އަޙްމަދު މަނިކެވެ.
މި ބިލުގެ މަޤްޞަދުގައި ބަޔާންކުރައްވާފައި ވަނީ، ރާއްޖޭގެ އެއްގަމާއި ކަނޑު ދަތުރުފަތުރުގެ އެންމެހާ ކަންކަން ސަލާމަތާއި ރައްކާތެރިކަމާ އެކު ހަރުދަނާ ނިޒާމެއްގެ ދަށުން ބެލެހެއްޓުވުންކަމަށެވެ. އަދި އެއްގަމާއި ކަނޑު ދަތުރުފަތުރާއި ގުޅޭ ކަންކަން ތަންޒީމު ކުރުމަށްޓަކައި ޤާާނޫނަކުން އުފައްދާ އިދާރާއަކުން ކަމާ ގުޅޭ އެންމެހާ ކަންކަން ހިންގައި ބެލެހެއްޓުމަށް މަގުފަހި ކުރުންކަމަށްވެސް ބަޔާންކޮށްފައިވެއެވެ. މި ބިލް ދިރާސާކުރެއްވި އިޤްތިޞާދީ ކޮމިޓީގެ ރިޕޯޓަށް ބަހުސްކުރެއްވި މެމްބަރުން ވިދާޅުވީ، މި ބިލް ޤާނޫނަކަށްވުމުން ރާއްޖޭގެ އެއްގަމާއި ކަނޑުދަތުރުފަތުރުގެ ކަންތައް މިހާރަށް ވުރެ ހަރުދަނާ ނިޒާމަކުން ހިންގުމުގައި ޤާނޫނީ ބާރުވެރިކަން އެ އޮތީރިޓީއަށް ލިބިގެންދާނެކަމަށެވެ. އަދި ބައެއް މެމްބަރުން ވަނީ އެކުލަވާލެވޭ ޤަވާއިދެއްގެ މަތިން ދަތުރުފަތުރުކުރާ އުޅަނދުތައް ހެޔޮ އަގެއްގައި އިންޝިއުރަންސް ކުރެވޭނެގޮތް ހަމަޖެއްސުމަށް ގޮވާލައްވާފައެވެ. އަދި މި ބިލް ޤާނޫނަކަށް ވުމުން ޓްރާންސްޕޯޓްގެ ޚިދުމަތް ދިނުން މިހާރަށް ވުރެ ހަރުދަނާ ވާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.
މިހާރު އޮތް ގޮތާ ޚިލާފަށް ޓްރާންސްޕޯޓް އޮތޯރިޓީ ހިންގާ އެންމެ އިސް ވެރިއެއްގެ ގޮތުގައި ހުންނަވާނީ ޑިރެކްޓަރ ޖެނެރަލެއް ކަމަށް މި ބިލިގައި ބަޔާންކޮށްފައިވާއިރު، އެ އޮތޯރިޓީގެ ސިޔާސަތުތައް ކަނޑައެޅުމަށާއި އޮތޯރިޓީ ހިންގުމަށް ބޭނުންވާ ލަފައާއި އިރުޝާދު ދިނުމަށް ޓަކައި ބޯޑެއް އެކުލަވައިލަން ވާނެ ކަމަށް ބުނެފައިވެއެވެ. އެ ބޯޑުގައި 5 މެމްބަރުން ތިއްބަވާއިރު، ބޯޑަށް މެމްބަރުން އައްޔަން ކުރައްވާނީ ރައީސުލްޖުމްހޫރިއްޔާކަމަށް ބަޔާންކޮށްފައިވެއެވެ.