ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިޤްތިޞާދީ އިންޤިލާބެއް މި ޤައުމަށް ގެންނަވާފައިވާކަމަށް އިކޮނޮމިކް މިނިސްޓަރ މުޙައްމަދު ސައީދު ވިދާޅުވެއްޖެއެވެ. މިނިސްޓަރ މިހެން ވިދާޅުވީ، 2018 ވަނަ އަހަރަށް ޕީޕީއެމް ކެމްޕެއިން ލީޑަރުން ތައްޔާރުކުރުމުގެ މަހާސިންތާގައި ވާހަކަފުޅު ދައްކަވަމުންނެވެ.
ޕީޕީއެމް ކެމްޕެއިން ލީޑަރުން ތައްޔާރުކުރުމުގެ މަހާސިންތާ ފެށުމަށް ބޭއްވެވި ރަސްމިއްޔާތުގައި ވާހަކަފުޅު ދައްކަވަމުން، ވޯލްޑް ޓްރޭޑް އޯގަނައިޒޭޝަން ޑަބްލިއު.ޓީ.އޯގެ ޓްރޭޑް ރިވިއުގައި ހިމެނިވަޑައިގަންނަވާ 19 ޤައުމަކުން ރާއްޖޭގެ އިޤްތިޞާދު ކުރު މުއްދަތެއްގެ ތެރޭގައި ކުރިއަރައިގެންދާ މިންވަރާއި ގުޅޭގޮތުން ތަޢުރީފްކޮށް ސުވާލުކުރައްވާފައިވަކަމަށް ވިޔަފާރިއާއި އިޤްތިޞާދާއި ބެހޭ ވަޒީރު މުޙައްމަދު ސައީދު ވިދާޅުވިއެވެ. މިކަމުންވެސް ހާމަވަނީ ރައީސް ޢަބްދުﷲ ޔާމީން އިޤްތިޞާދީ އިންޤިލާބެއް ރާއްޖެ އަށް ގެންނަވާފައިވާކަން ކަމަށް މިނިސްޓަރ ސައީދު ވިދާޅުވިއެވެ.
މިނިސްޓަރ ސައީދު ވަނީ ކުރީގެ އެމްޑީޕީ ސަރުކާރުގެ 3 އަހަރާއި ރައީސް ޔާމީންގެ 2 އަހަރާއި ބައިގެ މުއްދަތުގައި ޤައުމަށް ކޮށްދެއްވާފައިވާ ކަންކަމުގެ ތަފްސީލަށް އަލިއަޅުއްވާލައްވާ ވަހަކަފުޅު ދައްކަވާފައެވެ. މިނިސްޓަރ ވިދާޅުވީ، ކުރީ ސަރުކާރުން އިސްރާއިލާއި އެހެނިހެން އިސްލާމް ނޫން ޤައުމުތަކާ ގާތް ގުޅުމެއް ގެންގުޅުއްވާފައިވާ ކަމަށެވެ. ނަމަވެސް ރައީސް ޔާމީންގެ ވެރިކަމުގެ ތަފާތަކީ، އިސްލާމީ ޤައުމުތަކާއި ހީނަރުވެފައިވާ ގުޅުން ކުރިއަރުއްވާ ވަރުގަދަކޮށް، ސަޢޫދީ އަރަބިއްޔާއާއި، ޔޫއޭއީ އާއި ޤަތަރު ފަދަ އިސްލާމީ ޤައުމުތައް ރާއްޖޭގެ ތަރައްޤީގެ ބޮޑެތި ބައިވެރިންކަމުގައި ހައްދަވާފައިވާކަމަށް ވިދާޅުވިއެވެ. ކުރީ ސަރުކާރުން ރާއްޖެއަކީ ދުނިޔޭގެ އެކި ޤައުމުތަކުގައި ޓެރަރިޒަމް ޢަމަލު ހިންގާ ހަނގުރާމައަށް މީހުން ފޮނުވާ ތަނެއްގެ ގޮތުގައި ސިފަކުރައްވާ، އިންޑިއާ އެކު އޮތް ގުޅުން ކުޑަވިނަމަވެސް، މި ސަރުކާރުން ދިވެހި އައު ޕާސްޕޯޓާއި އައު ނޫޓާއި، ޒަމާނީ ތަހުޒީބަށް ފަހި ޤައުމަކަށް، ދިވެހިން ފަޚުރުވެރިވާ އެތައް ކަމެއް ފަށްޓަވާފައިވާކަމަށް މިނިސްޓަރ ވިދާޅުވިއެވެ.
ރާއްޖެއަކީ އަމާން ދިރިއުޅެން ފަހިތަނެއްގެ ގޮތުގައި އިޝްތިހާރުކުރަމުން ގެންދަވާކަމަށްވެސް މިނިސްޓަރ ވިދާޅުވިއެވެ. ކުރީ ސަރުކާރުގައި ބޭރު ދުނިޔޭގައި ރާއްޖެ ބަދުނާމު ކޮށްފައި ވީނަމަވެސް، ރައީސް ޔާމީންގެ ސަރުކާރުގެ ތަފާތަކީ، ބޭރު ދުނިޔެއަށް ރާއްޖޭގައި އިންވެސްޓްކުރުމަށް ދަޢުވަތުދީ، އިންވެސްޓަރުންނަށް ފަހި، ވިޔަފާރިއަށް ފަހި މާހައުލެއްގެ ގޮތުގައި ހުޅުވާލާފައިވާ ކަމަށެވެ. ކުރީ ސަރުކާރުން ރާއްޖޭގެ ފަތުރުވެރިކަމުގެ އަގު ވައްޓާލާފައިވާ ކަމަށާއި، ނަމަވެސް މި ސަރުކާރުން ގިނަ ރިސޯޓުތައް ހުޅުއްވައި، ފަތުރުވެރިންނަށް އެތައް ޚިދުމަތްތަކެއް، އަދި އައު ރިސޯޓްތައް ހުޅުވަމުން ގެންދަވާކަމަށް މިނިސްޓަރ ވިދާޅުވިއެވެ.
އިކޮނޮމިކް މިނިސްޓަރ މުޙައްމަދު ސައީދު ވިދާޅުވީ، 2011 ވަނަ އަހަރު ދައުލަތުގެ ތަނަވަސްކަން ދަށްވެގެންގޮސް ހަމައަށް މުސާރަ ނުދެވޭ ވަރަށް ދިޔަކަމަށާއި، ނަމަވެސް މިއަދު ޤައުމީ ރިޒާވް 600 މިލިއަން އެމެރިކާ ޑޮލަރަށް އިތުރުވެ ދައުލަތުގެ އާމްދަނީ ދެގުނައަށް އިތުރުކުރުމަށް އަމާޒުކޮށް ދެއަހަރާއި ބައިގެ ތެރޭގައި ތިލަފަތް ހަމަ ބަޖެޓަކަށް ޤައުމު މިސްރާބު ޖަހާފައިވާކަމަށެވެ. މިނިސްޓަރ ވިދާޅުވީ، އަތޮޅުތަކުގެ ރަށްރަށުގައި ވިޔަފާރި ތަޢާރަފްކޮށް ރައްޔިތުންނަށް ވިޔަފާރީގެ ބާރުވެރިކަން ފޯރުކޮށްދިނުމަށް މަސައްކަތް ކުރައްވަމުން ގެންދަވާކަމަށެވެ. ބޭރު ދުނިޔޭގައި ރާއްޖެއަށް ފިއްތުންތައް އިންތިހާއަށް ބޮޑުއިރުވެސް ކުޑަވެސް މަޑުޖެހުމެއްނެތި ޤައުމު ތަރައްގީވަމުން އަންނަކަމަށް އިކޮނޮމިކް މިނިސްޓަރ ސައީދު ވިދަޅުވިއެވެ.