ރާއްޖޭގެ ގޭބިސީތަކުގައި ދިރިއުޅޭ މީހުންގެ ސިއްޙީ މަޢުލޫމާތު ދެނެގަތުމުގެ ސަރވޭ މިއަދު ފަށްޓަވައިފިއެވެ.
މިސަރވޭގައި ތޭރަ ހާހަށްވުރެ ގިނަ މީހުން ބައިވެރިކުރެވޭއިރު، މާލެއާއެކު 147 ރަށެއްގައި މިސަރވޭ ކުރިއަށްގެންދެވޭނެކަމަށް ހެލްތް މިނިސްޓްރީން ވިދާޅުވެެއެވެ. މިސަރވޭ މިއަދު މާލޭގައި ފަށްޓަވާފައިވާއިރު، އަތޮޅުތަކުގައި އަންނަ މަހު ސަރވޭ ކުރިއަށްގެންދެވޭނެކަމަށް ހެލްތް މިނިސްޓްރީން ވިދާޅުވެއެވެ.
މޯލްޑިވްސް ޑިމޮގްރަފިކް އެންޑް ހެލްތް ސަރވޭގެ ނަމުގައި ކުރިއަށްގެންދާ މިސަރވޭގައި މަޢުލޫމާތު އެއްކުރެވިގެންދާނީ، ރާއްޖޭގެ ދަރިމައިވާ އުމުރުގެ ނުވަތަ 15 އަހަރާއި 49 އަހަރާ ދެމެދުގެ އަންހެނުންނާއި ފިރިހެނުންގެ ޞިއްޙަތާއި ގުޅުން ހުރި މަޢުލޫމާތުތަކާއި މައިންނާއި ޅަދަރިންގެ ޞިއްޙީ ޙާލަތު ވަޒަންކޮށްދޭ ތަފާސް ހިސާބުތައްކަމަށެވެ. އަދި ދަރިމައިވުމުގެ ނިސްބަތާއި، ޅަފަތުގައި ކުދިން މަރުވާ ނިސްބަތާއި، ދަރިމައިވުމުގައި މީހުން އިޚްތިޔާރުކުރާގޮތާއި، އާއިލާ ރޭވުމުގައި ވަޞީލަތްތައް ބޭނުންކުރެވޭ ނިސްބަތާއި މައިންނާއި ޅަދަރިންގެ ޞިއްހީ ޚިދުމަތް ބޭނުންކުރެވޭގޮތާއި މިންވަރު ދެނެގަނެވޭނެކަމަށް ހެލްތް މިނިސްޓްރީން ވިދާޅުވެއެވެ. އަދި ގައިން ގަޔަށް ނާރާ ބަލިތަކާބެހޭ މަޢުލޫމާތު ލިބިފައިވާ މިންވަރާއި ބަލިތަކާމެދު ދެކޭގޮތާއި މީހުންގެ ޢަމަލުތައް ބަހައްޓާގޮތުގެ މަޢުލޫމާތު މިސަރވޭ އިން ދެނެގަނެވޭނެކަމަށެވެ. މިސަރވޭގައި އެނީމިއާ ހުރި މިންވަރު ދެނެގަތުމަށް އަންހެނުންނާއި ކުޑަކުދިންގެ ލޭ ޓެސްޓްކުރެވޭނެކަމަށްވެސް އެމިނިސްޓްރީން ވިދާޅުވެއެވެ.
ހެލްތް މިނިސްޓަރ އިރުތިޝާމް އާދަމް ވިދާޅުވީ މިސަރވޭ އިން އެއްކުރާ މަޢުލޫމާތުން ރާއްޖޭގެ މައިގަނޑު ސިއްޙީ ޙާލަތު ދެނެގަނެވި ކުރިމަގުގައި ސިއްޙީ ކަންކަން ކަނޑައެޅުމަށް ބޭނުންވާ މިންގަނޑުތައް އެނގިގެންދާނެކަމަށެވެ. އަދި މިދިރާސާއިން ލިބޭ މަޢުލޫމާތުގެ އަލީގައި ބައިނަލްއަޤްވާމީ ފެންވަރުގައި ރާއްޖެ އޮތް ހާލަތު ވަޒަންކުރެވިގެންދާނެކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މިސަރވޭގައި އެއްކުރެވޭ ސިއްރުވެރި މަޢުލޫމާތުތައ ސިއްރުވެރިކަމާއެކީގައި އެއްކުރެވި ބެލެހެއްޓޭނެ މަޢުލޫމާތުތަކެއްކަމަށެވެ.
ޑިމޮގްރެފިކް ހެލްތް ސަރވޭއަކީ ބައިނަލްއަޤްވާމީ ފެންވަރެއްގައި އާބާދީއާއި ސިއްޙަތާއި ގުޅުން ހުރި މިންގަނޑުތަކާއި އާބާދީގެ މައިގަނޑު ސިއްޙީ ޙާލަތާއި ޚިދުމަތްތަކުގެ ޙާލަތު ދެނެގަތުމަށްޓަކައި ކޮންމެ 5 އަހަރަކުން 1 އަހަރު ކުރާ ދިރާސާއެކެވެ. މިސަރވޭގައި އަށްހާސް ނުވަސަތޭކަ ތިރީސްހަ އަންހެނުނާއި، ހަތަރުހާސް ހަތަރުސަތޭކަ އަށްޑިހައެއް ފިރިހެނުން ބައިވެރިކުރެވޭނެކަމަށް ހެލްތް މިނިސްޓްރީން ވިދާޅުވެއެވެ.