މޯލްޑިވްސް މާރކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ކޮރަޕްޝަން މައްސަލަތަކާ ގުޅިގެން މާލިއްޔަތު ކޮމެޓީއަށް ހުށައަޅުއްވާފައިވާ ކޮރަޕްޝަނުގެ ހުރިހާ މައްސަލައެއް ބެއްލެވުމަށް 5 މެންބަރުންގެ ސަބް-ކޮމެޓީއެއް މިއަދު އެކުލަވައިލައްވައިފިއެވެ.
ތ.ކިނބިދޫ ދާއިރާގެ މެމްބަރު ޢަބްދުﷲ ރިޔާޒު މާލިއްޔަތު ކޮމެޓީއަށް ހުށައެޅުއްވި މި މައްސަލައަކާ ގުޅިގެން މިއަދު ބޭއްވެވި މާއްލިއްޔަތު ކޮމިޓީގެ ބައްދަލުވުމުގައި އެ މައްސަލަ ބެއްލެވުމަށް މެމްބަރުން ތާއީދުކުރެއްވިއެވެ. އެހެންކަމުން ކޮމެޓީގައި ބައިވެރިވެވަޑައިގެންނެވި މެމްބަރުންގެ އިއްތިފާޤުން ވަނީ އެ މައްސަލަ ބެއްލެވުމަށް ފަސް މެމްބަރުންގެ ކޮމިޓީއެއް އެކުލަވާލައްވާފައެވެ.
މެމްބަރުން ވިދާޅުވީ، އެމްއެމްޕީއާރްސީގެ ކޮރަޕްޝަނުގެ މައްސަލަ ބައްލަވަން ސަރުކާރަށް ނިސްބަތްވެވަޑައިގަންނަވާ ހުރިހާ މެމްބަރުންވެސް ބޭނުންފުޅުކަމަށެވެ. އަދި އެމްޑީޕީގެ ސަރުކާރުގައި އިސް ބައެއް ބޭފުޅުން ދައުލަތުގެ ފައިސާއަށް ޚިޔާނާތްތެރިވާކަމަށް ބުނެ، އެކަން ބެއްލެވުމަށްވެސް ބައެއް މެމްބަރުން ގޮވާލެއްވިއެވެ.
އެމްއެމްޕީއާރުސީގެ ކޮރަޕްޝަންގެ މައްސަލަ 1.22 ބިލިއަން ރުފިޔާއަށް އަރައެވެ. މި ކޮރަޕްޝަންގެ މައްސަލަ ދައުލަތުގެ މުއައްސަސާތަކުން ގެންދަވަނީ ތަޙްޤީގްކުރައްވަމުންނެވެ.