އިޤްތިޞާދު ދެގުނަކޮށް 2028ގައި ހުށައަޅާނީ އަރަނި ބަޖެޓެއް: ރައީސް

ރާއްޖޭގެ އިޤްތިޞާދު ދެގުނަކޮށް 2028 ވަނަ އަހަރު ރައްޔިތުންގެ މަޖިލީހަށް ހުށައަޅުއްވާނީ އަރަނި ބަޖެޓެއްކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ކެމްޕެއިންގައި ތ.ގާދިއްފުށްޓަށް ވަޑައިގެން ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ، ކުދި އަބާދީތަކަށް އަޅާލައި އެރަށްރަށް ބޭނުންވާ ކަންކަން ކުރުމަކީ ކުރީ ސަރުކާރުގެ އެޖެންޑާގައި އޮތްކަމެއް ނޫންކަމަށެވެ. އެގޮތުން ގާދިއްފުށްޓަކީ އާބާދީ ކުޑަ ރަސެއްކަމުން ކުރީގެ ސަރުކާރުތަކުން ވަރަަސް ބޮޑަށް އިހުމާލުވެ ބާކީކޮށްފައިވާރަށެއްކަމަށް ރައީސް ވިދާޅުވިއެވެ.

ނަމަވެސް 2018 ވަނަ އަހަރު މި ސަރުކާރުން އައީ އެފަދަ ރަށްތައްވެސް ތަރައްޤީކުރުމުގެ ސިޔާސަތާއެކުކަމަށާއި، ރާއްޖެ ތަރައްޤީވާނީ ހުރިހާ ރަށެއްގައިވެސް އަސާސީ ޚިދުމަތްދީ ހަމަހަމަ ފުރުޞަތު ދީގެންކަމަށް ޤަބޫލުކޮށްގެންކަމަށެވެ. އެގޮތުން މިސަރުކާރުގެ 5 އަހަރުތެރޭ އާބާދީ ކުދި ރަށްތަކުގައި ގިނަ ކަންކަން ކުރައްވާފައިވާކަން ފާހަގަކުރައްވާ ރައީސް ވިދާޅުވީ އެކަން ރައްޔިތުން ޤަބޫލުކުރާކަމަށެވެ.

"ފެނާ ނަރުދަމާ، ބަނދަރު، ރަށްގިރުން، ސިއްޙީ ޚިދުމަތް ދަށަށްގޮތުން، ސްކޫލް ފެންވަރުވެސް އޮތީ އެގޮތަށް. އެހެންކަމުން އަޅުގަނޑުމެންގެ އަމާޒަކަށްވީ މިފަދަ ރަށްރަށް އިސްކަންދީގެން ކަންތައްތަކެއް ކޮށްދިނުން." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.

ގާދިއްފުށްޓަށް ކޮށްދެއްވާފައިވާ އަދި ކުރިއަށްދާ މަޝްރޫޢުތަކަށް އަލިއަޅުއްވާލައްވާ ރައީސް ވިދާޅުވީ އެރަށުގައި އައު އިންޖީނުގެއެއް އަޅައި، ފެނާ ނަރުދަމާ މަޝްރޫޢު ނިންމާފައިވާކަމަށެވެ. އަދި އެރަށު ބަނދަރު ބޮޑުކުރުމަށް ކޮންޓެކްޓުކޮށް، ސްކޫލަށް ބޭނުންވާ ވަސީލަތް ހަމަކުރުމުގެ މަސައްކަތް ކުރިއަށްދާކަން ރައީސް ފާހަގަކުރެއްވިއެވެ.

ރައީސް ވިދާޅުވީ ކުރިއަށް އޮތް ދައުރުގައި ގާދިއްފުށްޓަށް ބިން އިތުރުކުރުކޮށް، ރަށަށް ބޭނުންވާ ބޯހިޔާވަހިކަމުގެ ދަތިކަން ހައްލު ކޮށްދެއްވާނެކަމަށެވެ. އަދި ރައްޔިތުން އެދޭގޮތަށް އެރަށާއި ކައިރީގައިއޮތް އުސްފުށި ޕިކްނިކް އައިލެންޑެއްގޮތަށް ހަމަޖައްސަވާނެކަމަށް ރައީސް ވިދާޅުވިއެވެ. މިވަގުތު އެއީ ވަރުވާއަށް ދީފައިވާ ރަށެކެވެ.

ރައީސް ވިދާޅުވީ ބިން އިތުރުކުރާއިރު މޫދަށް އެރެވޭނެ ސަރަހައްދެއްވެސް ޤާއިމްކޮށްދެއްވާނެކަމަށެވެ. އަދި އެރަށު ސިއްޙީ މަރުކަޒަށް އައު ޢިމާރާތެއް އިތުރުކޮށް އައު ޚިދުމަތްތަކެއް ފަށްޓަވާނެކަމަށްވެސް ރައީސް ވިދާޅުވިއެވެ. މީގެ އިތުރުން ޒުވާނުންނަށް ބޭނުންވާ ވޮލީކޯޓާއި އައުޓްޑޯރ ޖިމެއްވެސް އެރަށުގައި ޤާއިމްކޯށްދެއްވާނެކަމަށް އެމްޑީޕީގެ ރިޔާސީ ކެންޑިޑޭޓް ވިދާޅުވިއެވެ.

ރައީސް ވިދާޅުވީ ތަރައްޤީގެ އެފަދަ މަޝްރޫޢުތަށް ކުރިއަށް ގެންދަވާއިރު، ރާއްޖޭގެ އިޤްތިޞާދު ދެގުނަކުރުމަށްވެސް ގިނަ މަސައްކަތްތަކެއް ކުރައްވަމުން ގެންދަވާކަމަށެވެ. އެގޮތުން ރާއްޖޭގެ އެކި ކަންކޮޅުތަކުގައި އިޤްތީޞާދު ދެގުނަށްކުރުމަށް ބޭނުންވާ ޢުމްރާނީ ތަރައްޤީގެ ގިނަ މަޝްރޫޢުތަކެއް ކުރިއަށްދާކަން ފާހަގަކުރައްވާ ރައީސް ވިދާޅުވީ އެއަރޕޯޓްތަކާއި ބަނދަރުތަކާއި ޤައުމީ ދަތުރުފަތުރާއެކު ރައްޔިތުންގެ ފުދުންތެރިކަން އިތުރުވެ ދައުލަތަށް ލިބޭ އާމްދަނީ އިތުރުވާނެކަމަށެވެ. ރަށްރަށް ކަންތައްތަކެއް ކޮށްދެއްވުމަށް ވަޢުދުވެވަޑައިގަންނަވަނީ އެކަންކަމަށް ބިނާކޮށްކަމަށާއި، 2018 ވަނަ އަހަރުން 2028 ވަނަ އަހަރާއި ހަމައަށް ދާއިރު ރާއްޖޭގެ އިޤްތިޞާދު ދެގުނަކުރެވޭނެކމަށް ރައީސް ވިދާޅުވިއެވެ. 2028 ވަނަ އަހަރާއި ހަމައަށް ރާއްޖޭގެ އިޤްތިޞާދުގެ ސައިޒު 170 ބިލިއަނަށްވުރެ މަށްޗަށް ގެންދެވޭނެކަމަށާއި، އެއަހަރު މަޖިލީހަށް ހުށައަޅުއްވާނީ އަރަނި ބަޖެޓެއްކަމަށްވެސް ރައީސް ވިދާޅުވިއެވެ. އެ ޢަމާޒަށް މަސައްކަތްކުރައްވަމުން އަންނަކަމަށް ރައީސް ވިދާޅުވިއެވެ.

"އިޤްތިޞާދު ފުޅާކުރެވި ހަރަކާތްތައް އިތުރުވާން ފެށުމުން ދައުލަތަށް ވަންނަ ފައިސާވެސް އިރާދަކުރެއްވިއްޔާ އެދަނީ އިތުރުވަމުން. އަހަރަކަށްވުރެ އަހަރެއް. އެގޮތުން 2028 ވަނަ އަހަރު އަންނައިރު 45 ބިލިއަން ރުފިޔާ ހުރަސްކޮށް 50 ބިލިއަން ރުފިޔާއާއި ހަމައަށް އަމާޒުހިފާނަން. ނަތީޖާއަކީ ކުރަން ބޭނުންވާ ކަންކަމަށް ފައިސާ ހުރުން. 2028 ހުށައަޅާ ބަޖެޓަކީ އަރަނި ބަޖެޓަކަށް ވެގެންދާނެ." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.

ރައީސް ވިދާޅުވީ އެކަން ކުރިއަށް ގެންދިއުމަށް މިސަރުކާރު ދަމަހައްޓައި ކުރަން ފަށާފައިވާ މަސައްކަތްތައް ނުހުއްޓި ކުރިއަށް ދާންޖެހޭކަމަށެވެ. އެކަން ކުރެވޭނީ އުފާވެރި އަމާން ރާއްޖެއެއް ބިނާކުރެވިގެންކަމަށް އެމްޑީޕީގެ ރިޔާސީ ކެންޑިޑޭޓް އިބްރާހީމް މުޙައްމަދު ޞާލިޙް ވިދާޅުވިއެވެ.