އެންމެ ކުރިއަރައިފައިވާ ޤައުމުތަކުން ލިބޭފަދަ ޞިއްޙީ ޚިދުމަތް ފޯރުކޮށްދޭނަން: ޒަމީލް

ސިއްޙީ ފަރުވާގެ ފެންވަރު އެންމެ ރަނގަޅު ޤައުމުތަކުގައިވެސް ފޯރުކޮށްދެވޭނެ މިންވަރަށް ރާއްޖޭގެ ސިއްޙި ފަރުވާ ތަރައްޤީކުރެއްވުމަށް ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ކެންޑިޑޭޓް އަލްއުސްތާޛް ޙަސަން ޒަމީލް ވަޢުދުވެވަޑައިގެންފިއެވެ.

އެހެން ކެނޑިޑޭޓުންނާ ހިލާފަށް ޒަމީލްގެ ކެމްޕެއިން ކުރިއަށް ގެންދަވަނީ ހަމައެކަނި ސޯޝަލް މީޑިއާގައެވެ. މިގޮތުން ޒަމީލް ވަނީ އެމަނިކުފާނުގެ މެނިފެސްޓޯ ރޭ ސޯޝަލް މީޑިއާގައި އާންމުކުރައްވާފައެވެ. ޖުމްލަ 10 ޞަފްހާގެ މައްޗަށް އެކުލެވޭ އެ މެނިފެސްޓޯގައި ސިއްހީ ފަރުވާގެ ދަށުން، ޒަމީލް ވަނީ ސިއްހީ ޚިދުމަތް އެންމެ ރަނގަޅު ގައުމު ތަކުގައި ފޯރުކޮއްދޭ މިންވަރަށް ރާއްޖޭގައި އެ ޚިދުމަތް ތަރައްގީ ކުރައްވާނެކަމަށް ވިދާޅުވެފައެވެ.

އަދި މިކަން ހާސިލްކުރުމަށްޓަކައި ރާއްޖޭގައި ސިއްހީ ފަރުވާދޭ ޕްރައިވެޓް ހޮސްޕިޓަލްތަކާއި ކްލިނިކްތަކާއި، ރާއްޖެއިން ބޭރުގައި މަސައްކަތް ކުރާ މިދާާއިރާގައި މަސައްކަތް ކުރާ ޕްރޮފެސަނަލުންނަށް ލިބޭ އިނާޔަތްތައް ބަލައި އެމިންވަރުގެ ނުވަތަ އެއަށް ވުރެވެސް ރަނގަޅު އިނާޔަތެއް ދިނުމައް ޒަމީލް ވަނީ ނިންމަވާފައެވެ.

ޒަމީލް ވަނީ އައިޖީއެމްއެޗްގެ ވަސީލަތްތައް ފުރިހަމަ ކޮއްދެއްވުމަށްވެސް ވައުދުވެވަޑައިގެންފައެވެ. އަދި މާލެއިން ފެށިގެން ގިރާވަރުފަޅާއި ހަމައަށް ބްރިޖަކުން ގުޅާލުމުގެ މަސައްކަތް މިހާރު ކުރަމުން އަންނައިރު، ގުޅިފަޅު އަދި ގިރާވަރުފަޅުގައި އާބާދުވާ މީހުންނަށް ސިއްހީ ފަރުވާގެ އެންމެހައި ހިދުމަތެއް ގާއިމް ކުރުމާއި، އާސަންދަ ނިޒާމު މުރާޖާކޮށް އިސްލާހް ގެނައުމަކީވެސް ޒަމީލްގެ ރިޔާސީ ވައުދުފުޅެކެވެ.

މީގެ އިތުރުން މަސްތުވާތަކެއްޗަށް އޮންނަ ޑިމާންޑު ނައްތާލުމާއި މަސްތުވާތަކެއްޗަށް ދެވިހިފާފައިވާ ފަރާތްތަކަށް ދެވޭ ފަރުވާގެ ފެންވަރު ރަނގަޅުކޮށް އެފަރާތްތަކަކީ މުޖުތަމަޢުއަށް ފައިދާހުރި މަސައްކަތްތަކުގައި ޝާމިލުވާ ބައެއްގެ ގޮތުގައި އަލުން ނެރުމަށްވެސް މެނިފެސްޓޯގައި ހިމަނުއްވާފައިވެއެވެ.

ތަޢުލީމީ ސިޔާސަތުގެ ތެރޭގައި ވަނީ ޓެސްޓުން ފާސްވުމަށްޓަކައި ކިޔަވައިދިނުމުގެ ބަދަލުގައި ދަރިވަރުން މަސައްކަތުގެ އެކި މާހައުލުތަކަށް ހޭލުންތެރިކުރުވައި އެތަންތަނުން ނުކުންނަ ދަރިވަރުންނަނީ ތަންދޮރު އޮޅުންފިލާފައިވާ ބަޔަކަށް ހެދުމަށެވެ. އަދި ފެންވަރު ރަނގަޅު އެކި ކަންކަމަށް ވިސްނުންހިންގާ ހުނަރުވެރި ދަރިވަރުންތަކެއް ހެދުމަށްވެސް ތަޢުލީމީ ސިޔާސަތުގައި ހިމަނާފައިވެއެވެ.

ޒަމީލް ވަނީ ނުކުޅެދުންތެރިކަން ހުންނަ ދަރިވަރުންނަށް ބޭނުންވާނެ އެކި ޚާއްޞަ ތެރަޕީތައްވެސް އެފަދަ ދަރިވަރުންނަށް ކިޔަވައިދޭ މާހައުލުން ލިބޭނެގޮތް ހެދުމަށްވެސް ކަނޑައަޅުއްވާފައެވެ.

ދަރިންބެލުމާއި ގޭތެރޭގައި ކުރަންޖެހޭ މަސައްކަތްތައް ކުރުމަށް ގޭގައި ހުންނަ ކޮންމެ ބެލެނިވެރިއަކަށްވެސް މުސާރަދީ، އާއިލާގެ ފުދުންތެރިކަން އިތުރުކޮށް ދިވެހީންގެ އާބާދީ އިތުރުކުރުމަށް ހިތްވަރު ދިނުންވެސް ޒަމީލްގެ ސިޔާސަތުގައި ހިމެނެއެވެ.

ޢުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނަށް ދެވޭ ޚިދުމަތްތައް އިތުރަށް ރަނގަޅުކޮށް، އިނާޔަތުގެ ގޮތުގައި ދެވޭ އެއްޗަކީ ދިރިއުޅުމުގެ އަސާސީ ކަންކަމަށް ބޭނުންކުރާ، ތަކެތީގެ ބާޒާރުގެ އަގުތަކާ އެކަށީގެންވާ އެއްޗަކަށް ހެދުމަށްވެސް ޒަމީލްގެ މެނިފެސްޓޯގައިވެއެވެ.

މީގެ އިތުރުން ހަނޑޫ، ހަކުރު، ފުށުގެ ސަބްސިޑީ މުރާޖަޢާކޮށް އިސްލާހުކުރުމާއި، ކަރަންޓާއި ފެނުގެ ސަބްސިޑީއަށް ބޭނުންޖެހިފައިވާ ފަރާތްތައް ދެނެގަނެ އެފަރާތްތަކަށް އެހީ އަމާޒުކުރަށްވެސް ޒަމީލް ވަނީ ނިންމަވާފައެވެ. އަދި މުސާރައިގެ ތަފާތުކުރުންތައް ނައްތާލައި، އަންހެނުން ބާރުވެރިކުރުވުމަކީވެސް ޒަމީލްގެ ސިޔާސަތެއްކަމަށް މެނިފެސްޓޯގައި ކަނޑައަޅުއްވާފައިވެއެވެ.