ގދ.ގަމަކީ ގައްދޫ ރައްޔިތުންގެ ތަނަކަށް ހަދާނަން: މުޢިއްޒު

ގދ.ގަމަކީ އެއަތޮޅު ގައްދޫ ރައްޔިތުންގެ ތަނެއްގެ ގޮތުގައި ހަދާ މުޅި އަތޮޅަށް ނަފާ ލިބޭނެ ރަށަކަށް އެރަށް ހަދައިދޭނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރިޔާސީ އިންތިޚާބުގެ ކެމްޕެއިންގައި ގދ.ގައްދުއަށް ވަޑައިގެން، ބޭއްވި ޖަލްސާގައި މުޢިއްޒު ވަނީ، އެމަނިކުފާނުގެ ވެރިކަމެއްގައި ރައްޔިތުން ބޭނުނަވާ ގޮތަށް ޒަމާނުއްސުރެ ގައްދޫގެ ބައެއްގެ ގޮތުގައި އޮންނަ ގދ.ގަމަކީ ގައްދޫ ރައްޔިތުންގެ ތަނެއް ގޮތުގައި ހަދައި ދޭނެ ކަމުގައި ވިދާޅުވެފައެވެ. މިއާއެކު ގަން ވެގެންދާނީ ގައްދޫގެ ރައްޔިތުންގެ އިޤްތިޞާދީ، ފުދުންތެރި އަދި ޒުވާނުންގެ ވިޔަފާރިތައް ކުރިއެރުވުމަށްޓަކައި ކުރާ ހުރިހާ އުންމީދެއް ހާސިލްކުރެވޭނެ ތަނަކަށްކަމަށްވެސް މުޢިއްޒު ވިދާޅުވިއެވެ.

"ގަމަކީ މިރަށުގެ ތަނެއްގެ ގޮތުގައި ކަނޑައަޅާނަން. އަދި އޭގެ ނަފާ އަތޮޅުގެ ހުރިހާ ރައްޔިތުންނަށް އިރާދަކުރެއްވީޔާ ވާގޮތަށް ބައްޓަން ކުރެވި އުމްރާނީ ތަރައްގީއާ އިގްތިސާދީ ކުރިއެރުމަށް ފައިދާ ކުރާނެ." ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވިއެވެ.

މީގެއިތުރުން މުޢިއްޒު ވަނީ ގައްދޫގައި ހޮސްޕިޓަލް އެޅުމަށް ރައްޔިތުން ދެކެމުން އަންނަ ހުވަފެން ހަގީގަތަކަށް ހަދައިދޭނެކަމަށްވެސް ވިދާޅުވެފައެވެ. އަދި މާވާރުލު އެއާރޕޯޓް އަސާސީ ލެވެލްގެ ގިނަ ކަންކަން އަދިވެސް ފުރިހަމަ ނުވެހުރިކަމަށާއި، އެމަނިކުފާނުގެ ވެރިކަމެއްގައި އެއާޕޯޓް ފުރިހަމަ ކޮއްދެއްވާނެކަމަށް މުޢިއްޒު ވިދާޅުވިއެވެ.

މުޢިއްޒު ވަނީ ގައްދުއާއި އެސަރަހައްދުގެ ޓޫރިޒަމް ފުޅަކުރެއްވުމަށްވެސް ވަޢުދުވެވަޑައިގެންފައެވެ. އަދި ގައްދޫގެ ރައްޔިތުންނަށް ބޭނުންވާ ބޯހިޔާވަހިކަން ފޯރުކޮށްދެއްވާނެކަމަށްވެސް މުޢިއްޒު ވިދާޅުވިއެވެ.