ހިޔާ ކުންފުނި ފްލެޓްތަކުގެ މަޝްރޫޢު އަލުން ކުރިއަށްގެންދާނަން: މުޢިއްޒު

ހިޔާ މަޝްރޫޢުގައި ހިމަނައިގެން ކުންފުނިތަކަށް ޚާއްސަކުރި ބޯހިޔާވަހިކަމުގެ މަޝްރޫޢު އަލުން ފައްޓަވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ފުވައްމުލަކުގައި ބޭއްވި ކެމްޕެއިން ޖަލްސާގައި ވާހަކަދައްކަވަމުން ޑރ.މުޢިއްޒު ވިދާޅުވީ، ކުންފުނިތަކުގެ ތެރެއިން ޕަބްލިކް ސަރވިސް މީޑިއާގެ ޕްރޮޖެކްޓާއި މޯލްޑިވްސް ނެޝަނަލް ޔުނިވަރސިޓީގެ ޕްރޮޖެކްޓް ކުރިއަށް ނުގެންދިއުމުގެ ޝަކުވާ ވަރަށް ގިނަ ފަރާތްތަކުން ސަމާލްކަމަށް ގެނެސްފައިވާކަމަށެވެ.

މުޢިއްޒު ވިދާޅުވީ ހިޔާ މަޝްރޫޢުގައި ގިނަ ކުންފުނިތަަކެއްގެ މުވައްޒަފުންނަށް ބޯހިޔާވަހިކަން ހޯދައިދިނުމަށް ނިންމާ، އެ މަސައްކަތް ފެށިކަމަށެވެ. ނަމަވެސް އާ ސަރުކާރު މިމަޝްރޫޢު ވުޖޫދުން ފޮހެލެއްވީ ކަމަށް މުޢިއްޒު ތުހުމަތުކުރެއްވިއެވެ.

ޚާއްސަކޮށް ޕަބްލިކް ސަރވިސް މީޑިއާ ފާހަގަކުރައްވައި މުޢިއްޒު ވިދާޅުވީ ފަސްސަތޭކައެއްހާ މުވައްޒަފުން މަސައްކަތްކުރާ އެ ކުންފުނީގެ މުވައްޒަފުން، އަދިވެސް މިމަޝްރޫޢަށް ވަރަށް ބޮޑަށް ބޭނުންވެފައި ތިބިކަމަށެވެ.

އަދި ގައުމީ ޔުނިވަރސިޓީފަދަ ބައެއް އިދާރާތަކުން، ފްލެޓް ލިބޭ މީހުންގެ ލިސްޓްވެސް ނެރުއްވި ކަމަށް މުޢިއްޒު ވިދާޅުވިއެވެ. އެހެންކަމުން، މި މަޝްރޫޢު އަލުން ވުޖޫދުކޮށް، ޕްރޮޖެކްޓްގައި ބައިވެރިވި ކުންފުނިތަކަށް އަލުން ފުރުޞަތު ދެއްވާނެކަމުގެ ޔަގީންކަން މުޢިއްޒު ވަނީ ދެއްވާފައެވެ.

"ހަމަ ކުރީގެ ސަރުކާރުގެ ސިޔާސަތާ އެއްގޮތަށް މި ޕްރޮޖެކްޓް އަލުން ފަށާނަން. ހުޅުމާލޭގައި ކުންފުނިތަކުގެ ފްލެޓް އަޅައިދޭނަން." މުޢިއްޒު ވިދާޅުވިއެވެ.

މުޢިއްޒު ވިދާޅުވީ ސިޔާސީ ބޭނުމަށް ކުންފުނިތަކުން މުސާރައިގެ އޮނިގަނޑަށް ބަދަލުގެނެސް ވަކި ބަޔަކަށް މަންފާކޮށްދޭ ގޮތަށް އޮތް އޮތުން ބަދަލުކުރައްވާ، ހަމަހަމަ އުސޫލުން މުސާރައިގެ ކުރިއެރުންވެސް ހޯއްދަވައިދެއްވާނެކަމަށެވެ.

ހިޔާ މަޝްރޫޢުގައި 25 ބުރީގެ 62 ޓަވަރު އެޅުމަށް ހިމެނިއެވެ. އެއީ މިހާރު މީހުން ދިރިއުޅެން ފަށާފައިވާ ޓަވަރުތަކާއި، ޚާއްސަ ކެޓަގަރީތަކުން ހުޅުވާލި ފްލެޓްތައް އަދި ކުންފުނިތަކަށް ޚާއްސަކުރި ފްލެޓްތަކެވެ. ނަމަވެސް މީގެތެރެއިން ކުރިއަށްގެންދެވިފައިވަނީ، މަދު ޓަވަރުތަކެއްގެ މަސައްކަތެވެ.

ކުންފުނިތަކުގެ ތެރެއިން މަސައްކަތް ކުރިއަށްގެންގޮސް، މުވައްޒަފުންނަށް ދެވޭވަރުވީ 4 ކުންފުންޏެއްގެ ފްލެޓެވެ.