ބެންކޮކް އެއަރލައިންގެ ދަތުރުތައް އަންނަ މަހު ރާއްޖެއަށް

ބެންކޮށް އެއަރވޭސްއިން އަންނަ މަހު ރާއްޖެއަށް ދަތުރު ފެށުމަށް ނިންމައިފިއެވެ. މިއީ މިއަހަރުގެ ފިނި މޫސުމާއި ދިމާކޮށް އެ އެއަރލައިނުން ކުރާ ދަތުރުތަކެކެވެ.

މިދިޔަ އަހަރުވެސް ފިނި މޫސުމާއި ދިމާކޮށް ބެންކޮކް އެއަރވޭސްއިން ވަނީ ރާއްޖެއަށް ޗާޓަރ ދަތުރުތަކެއް ކޮށްފައެވެ.

ބެންކޮކް އެއަރވޭސްއިން ބުނީ އަންނަ މަހުގެ 1 ވަނަ ދުވަހުން ފެށިގެން އެއެއަރލައިންގެ ދަތުރުތައް އަނެއްކާވެސް ރާއްޖެއަށް ފަށާނެކަމަށެވެ. މިދަތުރުތައް ކުރާނީ މިއަހަރުގެ ޑިސެމްބަރ 31 ވަނަ ދުވަހާއި ހަމައަށް ކަމަށް ބެންކޮކް އެއަރވޭސްއިން ވަނީ ބުނެފައެވެ.

މި ދަތުރުތައް ކުރާނީ ބެންކޮކްގެ ސްވަރްނަބުމި އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ. 30 ސެޕްޓެމްބަރގެ ކުރިން ބުކިން ހައްދާ ފަރާތްތަކަށް އަގު ހެޔޮކޮށް ޓިކެޓް ލިބޭނެކަމަށް އެ އެއަރލައިނުން ވަނީ ބުނެފައެވެ. އެގޮތުން 2 ކޮޅު ޓިކެޓްގެ އަގު އުޅެނީ ގާތްގަނޑަކަށް 500 ޑޮލަރަށެވެ.

ބެންކޮކަކީ މިހާރު ފަތުރުވެރިންވެސް ރާއްޖެއަށް އަންނަ ކުރިއަރަމުން އަންނަ މާކެޓެކެވެ. އަދި ވިޔަފާރިއާއި ޗުއްޓީ ހޭދަކުރުމާއި އެނޫންވެސް ބޭނުންތަކަށް ދިވެހިންވެސް ގިނަ އަދަދަކަށް ބެންކޮކަށް ދަތުރުކުރެއެވެ. އެހެންކަމުން މިދަތުރުތަކުގެ ސަބަބުން ބޮޑު ފަސޭހައެއް ލިބޭނެއެވެ.