ކުރިއަށް އޮތް އަހަރެއްހާ ދުވަހުގެ ތެރޭގައި ދިވެހި ސިފައިންނަށާއި، ފުލުހުންނަށް ބޭނުންވާ ހައުސިންގ ފްލެޓްތައް ހުޅުމާލޭގައި ހަމަޖެހިގެންދާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ "ސުނާމީ ބިނާ މައިޒާން" ހުޅުވުމަށް ރޭ ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ޢަބްދުﷲ ޔާމީިން ޢަބްދުލްޤައްޔޫމް ވިދާޅުވީ، ޤައުމުގައި ހަމަޖެހުން ޤާއިމުކުރުމުގައި ދިވެހި ސިފައިންނާއި ފުލުހުންގެ ދައުރު ވަރަށް ބޮޑު ކަމަށާއި، ޤާނޫނު ތަންފީޒުކުރުމުގައިވެސް އެންމެ ކުރީ ސަފުގައި ހަރަކާތްތެރިވަނީ ފުލުހުންނާއި ސިފައިންކަމަށެވެ. އެހެންކަމުން މިފަދަ ޤައުމީ މަސައްކަތެއް އަދާކުރަމުންދާ ފަރާތްތަކަށް ދަތިވާ ކަންކަން ޙައްލުކުރެއްވުމަކީވެސް ސަރުކާރުގެ ޒިންމާއެއްކަމަށާއި، މި ދެ މުއައްސަސާއަށްވެސް މިވަގުތު ދިމާވެފައިވާ އެއް މައްސަލައަކީ ހައުސިންގ މަޝްރޫޢުކަން އެމަނިކުފާނު ފާހަގަކުރެއްވިއެވެ.
ރައީސް ޔާމިން ވިދާޅުވީ، މި މައްސަލަ ހައްލުކުރެއްވުމަށް ކުރީގެ ސަރުކާރުތަކުންވެސް އެކި މިންވަރަށް މަސައްކަތް ކުރައްވާފައިވާ ކަމަށާއި، ދައުލަތުން ވަސީލަތްތަކެއް ތަނަވަސްކޮށްދެއްވި ނަމަވެސް، މިމައްސަލައަށް އެދެވޭ ހައްލެއް ލިބިފައިނުވާކަމަށެވެ.
މިކަން ހައްލުކުރެއްވުމަށް ސަރުކާރުން ވަރަށް ބޮޑު އިސްކަމެއް ދެއްވައިގެން މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ ރައީސް ވިދާޅުވީ، ކުރިއަށް އޮތް އަހަރެއްހާ ދުވަހުގެ ތެރޭގައި ފުލުހުންނާއި ސިފައިންނަށް ބޭނުންވާ ހައުސިންގ ފްލެޓްތައް ހުޅުމާލޭގައި ޤާއިމުވެގެންދާނެ ކަމަށެވެ. އަދި ފްލެޓް ދޫކުރައްވާނެ ގޮތުގެ އުސޫލުތަކާއި، އަގުތައް މިހާރު ކަނޑައެޅިފައިވާ ކަމަށް އެމަނިކުފާނު ވިދާޅުވިއެވެ.