ދާއިރާގެ މައްސަލަތައް ހައްލުކުރުމަށް ކޮންސްޓްރަކްޝަން އިންޑަސްޓްރީ ފޯރަމް

އިމާރާތް ކުރުމުގެ ސިނާއަތާއި ގުޅޭގޮތުން މަޝްވަރާކުރުމަށް ފުރަތަމަ ފަހަރަށް ”ކޮންސްޓްރަކްޝަން އިންޑަސްޓްރީ ފޯރަމް“ ފަށައިފިއެވެ.

1 ދުވަހުގެ ނިޔަލަށް ކުރިއަށްދާ މި ފޯރަމް އިންތިޒާމްކޮށްފައިވަނީ މީޑިއަމް އިވެންޓްގެ ފަރާތުންނެވެ. އަދި މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، މަސީން ވަނީ މި އިވެންޓް އެންޑޯޒްކޮށްފައެވެ.

މިއީ ރާއްޖޭގެ އިމާރާތްކުރުމުގެ ސިނާއަތައް ދިމާވެފައިވާ މައްސަލަތަކާއި މެދު މަޝްވަރާކޮށް އެކަންކަން ހައްލުކުރުމަށް ކުރެވިދާނެ ކަންކަން ދެނެގަތުމަށް ބާއްވާ ފޯރަމްއެއްކަމަށް މީޑިއަމް އިވެންޓްސްއިން މައުލޫމާތުދެއެވެ.

މި ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން މަސީގެ ރައީސް މުހައްމަދު އަލީ ޖަނާހް ވިދާޅުވީ، މީޑިއަމް އިވެންޓްސްގެ ފަރާތުން މިފަދަ އިވެންޓެއް ބޭއްވުން މިއީ ވަރަށް ރަނގަޅު ކަމެއްކަމަށެވެ. އަދި މި ފޯރަމްގައި ކީނޯޓް ސްޕީކަރުންގެ ގޮތުގައި ބައިވެރިވާ ފަރާތްތަކަކީވެސް ދާއިރާގައި މިވަގުތު ތިބި އެންމެ ޤާބިލް ފަރާތްތައްކަމަށާއި އަދި މި ފޯރަމްގެ ސަބަބުން ރާއްޖޭގެ އިމާރާތްކުރުމުގެ ސިނާއަތައް ކުރިއެރުންތަކެއް ލިބޭނެކަމަށް އުންމީދުކުރާކަމަށް ޖަނާހް ވިދާޅުވިއެވެ.

މި ފޯރަމްގައި އަލިއަޅުވާލާ ބައިތަކުގެ ތެރޭގައި އިންފްރާސްޓްރަކްޗަރ، ހައުސިން، އިމާރާތްކުރުމަށް ބޭނުންވާ ތަކެތި ހޯދުމަށް ހުރި ގޮންޖެހުންތަކާއި، ގަނޫނާއި ގަވައިދުގެ ދާއިރާ ހިމެނެއެވެ.

އިމާރާތްކުރުމުގެ ސިނާއަތުގައި ހަރަކާތްތެރިވާ ސަރުކާރާއި އަދި އަމިއްލަ ފަރާތްތަކުންވެސް މި ކޮންފަރެންސްގައި ބައިވެރިވެއެވެ. 80 އަށްވުރެ ގިނަ ފަރާތުން މި ކޮންފަރެންސްގައި ބައިވެރިވާއިރު ރާއްޖެއިން ބޭރުގެ ފަރާތްތައްވެސް ހިމެނޭކަމަށް މީޑިއަމް އިވެންޓްސްއިން ބުނެއެވެ.

އިމާރާތްކުރުމުގެ ސިނާއަތަކީ ރާއްޖޭގެ އިޤްތިޞާދުގައި 2 ވަނައަށް އެންމެ ބޮޑު ސިނާއަތެވެ. އަދި މި ސިނާއަތުގައި ގިނަ އަދަދެއްގެ މުވައްޒަފުން ދަނީ މަސައްކަތްކުރަމުންނެވެ. އިމާރާތްކުރުމުގެ ސިނާއަތަށް އިތުރުވަމުންދާ އެކިއެކި ޕްރޮޖެކްޓްސް ތަކާއިއެކު މި ސިނާއަތް ދަނީ އިތުރަށް ފުޅާވަމުންނެވެ.